(vovworld) - ເນື່ອງໃນໂອກາດໄປຢ້ຽມຢາມ ແລະ ເຮັດວຽກຢູ່ແຂວງ ຟູ໋ອຽນ, ຕອນເຊົ້າວັນທີ 7/4, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ລົງຢ້ຽມຢາມພະນັກງານ, ນັກຮົບກອງພັນໃຫຍ່ກອງທັບອາກາດ 910. ທ່ານນາຍົກລັດຖະມົນຕີ ເນັ້ນໜັກວ່າ: ກຳລັງປະກອບອາວຸດເວົ້າລວມ, ເຫຼົ່າທັບປ້ອງກັນອາກາດ, ກອງທັບອາກາດ ແລະ ກອງພັນໃຫຍ່ກອງທັບອາກາດ 910 ເວົ້າສະເພາະ ຍາມໃດກໍ່ຍົກສູງຈິດໃຈລະວັງຕົວ ແລະ ກຽມພ້ອມສູ້ຮົບສູງ, ສືບຕໍ່ກໍ່ສ້າງກອງທັບອາກາດປະຊາຊົນ ຫວຽດນາມ ໃຫ້ໝັ້ນຄົງເຂັ້ມແຂງຢ່າງຮອບດ້ານຕາມທິດປະຕິວັດ, ກຳລັງຫຼວງ, ຍອດຢ້ຽມ, ວ່ອງໄວ ແລະ ທັນສະໄໝ, ສຸມໃສ່ສ້າງບັນດາກົມກອງໝັ້ນຄົງເຂັ້ມແຂງທາງດ້ານການເມືອງ, ເປັນພື້ນຖານເພື່ອຍົກສູງຄຸນນະພາບສັງລວມ ແລະ ຄວາມສາມາດກຽມພ້ອມສູ້ຮົບ. ທ່ານນາຍົກລັດຖະມົນຕີ ຫງວຽນເຕີນຢູງ ຮຽກຮ້ອງໃຫ້ກອງພັນໃຫຍ່ກອງທັບອາກາດ 910 ສຶກສາພະນັກງານ, ນັກຮົບເປັນປະຈຳ ເພື່ອຍົກສູງສະຕິລະວັງຕົວຕໍ່ໜ້າກົນອຸບາຍ, ເລ່ຫຼ່ຽມຂອງບັນດາອິດທິກຳລັງທີ່ເປັນປໍລະປັກ. ກອງພັນໃຫຍ່ກອງທັບອາກາດ 910 ຄວນຕັ້ງໜ້າຄົ້ນຄ້ວາ, ປ່ຽນໃໝ່ເນື້ອໃນ, ວິທີຝຶດອົບຮົມ, ພິເສດແມ່ນເນື້ອໃນລາຍການບຳລຸງສ້າງນັກບິນ, ອັບເດັດບັນດາຄວາມຮູ້ ແລະ ວິທີການທີ່ທັນສະໄໝຂອງໂລກ ແລະ ພາກພື້ນ, ພ້ອມທັງຮັບປະກັນວຽກງານເຕັກນິກການບິນ ແລະ ພາລະທິການຮັບໃຊ້ການຝຶກອົບຮົມເປັນຢ່າງດີ.
ແລະກໍ່ໃນຕອນເຊົ້າວັນທີ 7/4, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ລົງກວດກາຄວາມຄືບໜ້າຂອງໂຄງການກໍ່ສ້າງສະຖານີຮັບແຂກຂອງສະໜາມບິນ ຕຸຍຮ່ວາ (Tuy Hoa), ແຂວງຟູ໋ອຽນ. ຄາດວ່າໂຄງການຈະໄດ້ຮັບການກໍ່ສ້າງສຳເລັດໃນເດືອນ 8 ຈະມາເຖິງ.