ນາຍົກລັດຖະມົນຕີ ຫງວຽນເຕີນຢູງ ຢ້ຽມຢາມ ຝຣັ່ງ ຢ່າງເປັນທາງການ
ທ່ານນາຍົກລັດຖະມົນຕີ ຫງວຽນເຕີນຢູງ ມີບົດກ່າວປາໄສສຳຄັນຢູ່ ສະຖາບັນຄົ້ນຄ້ວາພົວພັນສາກົນ ຝຣັ່ງ
(ພາບ: Chinhphu.vn/VGP/Nhật Bắc)
(vovworld) – ໃນຂອບເຂດການຢ້ຽມຢາມ ສ. ຝຣັ່ງ ຢ່າງເປັນທາງການ, ຕອນຄຳ່ວັນທີ 24/9, ຕາມເວລາ ຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ໄປຢ້ຽມຢາມສະຖາບັນຄົ້ນຄ້ວາພົວພັນສາກົນ ຝຣັ່ງ ຢູ່ນະຄອນຫຼວງ ປາຣີ. ນະທີ່ນີ້, ທ່ານນາຍົກລັດຖະມົນຕີ ຫງວຽນເຕີນຢູງ ມີບົດກ່າວປາໄສສຳຄັນດ້ວຍຫົວຂໍ້ວ່າ: “ຄູ່ຮ່ວມມືຍຸດທະສາດ ຫວຽດນາມ - ຝຣັ່ງ: ສ້າງຄວາມໄວ້ເນື້ອເຊື່ອໃຈຍຸດທະສາດເພື່ອສັນຕິພາບ, ການຮ່ວມມື ແລະ ຄວາມວັດທະນາຖາວອນ”.
ກ່ອນໜ້ານັ້ນ, ໃນການຕ້ອນຮັບເລຂາທິການທົ່ວປະເທດພັກກອມມູນິດ ຝຣັ່ງ Pierre Laurent, ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ: ຫວຽດນາມ ຖືເປັນສຳຄັນການເພີ່ມທະວີການພົວພັນກັບບັນດາພັກກອມມູນິດ ແລະ ກຳມະກອນ, ບັນດາພັກຝ່າຍຊ້າຍ, ບັນດາກຳລັງປະຊາທິປະໄຕ, ກ້າວໜ້າໃນໂລກ. ທ່ານເລຂາທິການ Pierre Laurent ສະແດງຄວາມປາດຖະໜາຢາກພັດທະນາການພົວພັນລະຫວ່າງ 2 ພັກຜ່ານການແລກປ່ຽນບັນດາຄະນະຄົ້ນຄ້ວາ, ທັງກ່ຽວກັບດ້ານທິດສະດີ ແລະ ພຶດຕິກຳຕົວຈິງ, ແລກປ່ຽນບົດຮຽນ ໂດຍສະເພາະແມ່ນກ່ຽວກັບການກໍ່ສ້າງພັກ ກໍ່ຄືການຮ່ວມມືໃນບັນດາຂົງເຂດອື່ນ, ປະກອບສ່ວນຊຸກຍູ້ການພົວພັນລະຫວ່າງ 2 ລັດ, ປະຊາຊົນ 2 ປະເທດ ຫວຽດນາມ - ຝຣັ່ງ. ທ່ານເລຂາທິການ Pierre Laurent ເຊື່ອໝັ້ນວ່າ: ນ້ຳໃຈມິດຕະພາບ ແລະ ການຮ່ວມມືລະຫວ່າງ 2 ພັກ ແລະ ປະຊາຊົນ 2 ປະເທດ ຈະພັດທະນາຢ່າງແຮງ ແລະ ແທດຈິງໃນອະນາຄົດ.
ກ່າວຄຳເຫັນທີ່ການຕ້ອນຮັບຄະນະຜູ້ແທນສະມາຄົມມິດຕະພາບ ຝຣັ່ງ - ຫວຽດນາມ ໂດຍທ່ານປະທານ Patrice Jorland ນຳໜ້າ, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນໜັກວ່າ: ຫວຽດນາມ ຖືສະມາຄົມມິດຕະພາບ ຝຣັ່ງ - ຫວຽດນາມ ແມ່ນຊ່ອງແລກປ່ຽນຂໍ້ມູນຂ່າວເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງ ປະຊາຊົນ 2 ປະເທດ, ປັບປຸງ ແລະ ພັດທະນາການພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງ ຫວຽດນາມ - ຝຣັ່ງ. ທ່ານນາຍົກລັດຖະມົນຕີ ຫງວຽນເຕີນຢູງ ຫວັງວ່າ: ສະມາຄົມມິດຕະພາບ ຝຣັ່ງ - ຫວຽດນາມ ແລະ ທ່ານ Patrice Jorland ຈະສືບຕໍ່ແມ່ນຂົວເຊື່ອມຕໍ່ເພື່ອຊ່ວຍໃຫ້ເພື່ອນມິດ ຝຣັ່ງ ເວົ້າສະເພາະ ແລະ ເພື່ອນມິດສາກົນເວົ້າລວມນັບມື້ນັບເຂົ້າໃຈ ແລະ ຮັກແພງ ຫວຽດນາມ ກ່ວາອີກ, ປະກອບສ່ວນຢ່າງແທດຈິງເຂົ້າໃນການພັດທະນາການພົວພັນລະຫວ່າງ 2 ປະເທດ ແລະ ປະຊາຊົນ ຫວຽດນາມ - ຝຣັ່ງ. ທ່ານປະທານ Patrice Jorland ຢືນຢັນ, ສະມາຄົມມິດຕະພາບ ຝຣັ່ງ - ຫວຽດນາມ ຈະສືບຕໍ່ແມ່ນຂົວເຊື່ອມຕໍ່ຊຸກຍູ້ການພົວພັນຮ່ວມມືລະຫວ່າງ 2 ປະເທດຢ່າງມີປະສິດທິຜົນ.