(vovworld) - ຕອນເຊົ້າວັນທີ 09/01, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເຂົ້າຮ່ວມ ແລະ ກ່າວປາໄສຊີ້ນຳກອງປະຊຸມຜັນຂະຫຍາຍໜ້າທີ່ປີ 2013 ຂອງຂະແໜງທະນາຄານ. ທ່ານນາຍົກລັດຖະມົນຕີ ຫງວຽນເຕີນຢຸງ ເນັ້ນໜັກວ່າ ໜຶ່ງໃນບັນດາໜ້າທີ່ສຳຄັນຂອງຂະແໜງທະນາຄານແມ່ນສຸມໃສ່ປະຕິບັດຄາດໝາຍຄວບຄຸມໄພເງິນເຟີ້ຕໍ່າກວ່າປີ 2012 ໃຫ້ໄດ້. ພ້ອມກັບການບໍລິຫານດອກເບ້ຍ ແລະ ສິນເຊື່ອໃຫ້ເໝາະສົມກັບການຜັນແປຂອງເສດຖະກິດມະຫາພາກ ແລະ ຄາດໝາຍຄວບຄຸມໄພເງິນເຟີ້, ສ້າງເງື່ອນໄຂໜູນຊ່ວຍວິສາຫະກິດກູ້ຢືມທຶນ, ໜູນຊ່ວຍການເຕີບໂຕເສດຖະກິດ, ທ່ານນາຍົກລັດຖະມົນຕີ ຮຽກຮ້ອງໃຫ້ທະນາຄານແຫ່ງລັດ ສືບຕໍ່ຜັນຂະຫຍາຍບັນດາມາດຕະການຢ່າງຄົບຊຸດ ເພື່ອຮັບປະກັນການຊ້ຳລະ ແລະ ການເຄື່ອນໄຫວຂອງລະບົບບັນດາອົງການສິນເຊື່ອ ແລະ ພື້ນຖານເສດຖະກິດ; ສຸມແຫຼ່ງທຶນໃຫ້ແກ່ບັນດາຂົງເຂດບຸລິມະສິດຄື; ກະສິກຳ, ຊົນນະບົດ, ຂາອອກ, ອຸດສາຫະກຳສຳຮອງ, ວິສາຫະກິດຂະໜາດກາງ ແລະ ນ້ອຍ... ທ່ານນາຍົກລັດຖະມົນຕີກໍຮຽກຮ້ອງໃຫ້ທະນາຄານແຫ່ງລັດສືບຕໍ່ສົມທັບກັບບັນດາກະຊວງ, ຂະແໜງການຢ່າງແໜ້ນແຟ້ນ ເພື່ອມີມາດຕະການຕ່າງໆໜູນຊ່ວຍໃຫ້ແກ່ບັນດາຂະແໜງການ, ຂົງເຂດຜະລິດດຳເນີນທຸລະກິດ. ບໍລິຫານອັດຕາແລກປ່ຽນ ແລະ ຕະຫຼາດເງິນຕາຕ່າງປະເທດຢ່າງແໜ້ນແຟ້ນ, ຮັບປະກັນມູນຄ່າຂອງສະກຸນເງິນດົງ; ຄຸ້ມຄອງຕະຫຼາດເງິນຄຳຢ່າງມີປະສິດທິຜົນ, ປະກອບສ່ວນເຂົ້າໃນຄາດໝາຍຮັກສາເສດຖະກິດມະຫາພາກເປັນປົກກະຕິ. ທ່ານນາຍົກລັດຖະມົນຕີຫງວຽນເຕິນຢຸງ ເນັ້ນໜັກວ່າ:
”ປະຕິບັດບົດບາດໜ້າທີ່ຂອງທະນາຄານແຫ່ງລັດໃຫ້ດີກວ່າ, ໝາຍຄວາມວ່າການຄຸ້ມຄອງລັດໄດ້ດີກວ່າ, ບົດບາດໜ້າທີ່ຂອງທະນາຄານສູນກາງແມ່ນບໍລິຫານນະໂຍບາຍເງິນຕາ. ໂດຍແມ່ນທະນາຄານແມ່, ກ່ອນອື່ນໝົດແມ່ນຕ້ອງປະຕິບັດການບໍລິຫານນະໂຍບາຍເງິນຕາໃຫ້ດີກວ່າ, ມີປະສິດທິຜົນກວ່າ ແລະ ໝັ້ນຄົງກວ່າອີກ. ແຕ່ສິ່ງສຳຄັນແມ່ນບໍລິຫານນະໂຍບາຍເງິນຕາຢ່າງມີໄຫວພິບກວ່າ, ມີປະສິດທິຜົນກວ່າ, ໄກ້ສິດກັບຊີວິດກວ່າ ເພື່ອຄວບຄຸມໄພເງິນເຟີ້ໃຫ້ຢູ່ໃນລະດັບຕຳ່ກວ່າປີ 2012. ນີ້ແມ່ນຄວາມຕັດສິນໃຈຂອງພັກ, ສະພາແຫ່ງຊາດ ແລະ ລັດຖະບານ”.