(vovworld) - ຕອນບ່າຍວັນທີ 13/09, ຢູ່ຫປະຊຸມໃຫຍ່, ທີ່ປັກກິງ, ປະເທດຈີນ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ພົບປະກັບທ່ານເລຂາທິການໃຫຍ່ພັກກອມມູນິດຈີນ, ປະທານປະເທດຈີນ ສີຈີ້ນຜິງ. ທີ່ການພົບປະ, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ, ຫວຽດນາມ ຖືເປັນສຳຄັນການເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ປັບປຸງ ແລະ ເສີມຂະຫຍາຍການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດຢ່າງບໍ່ຢຸດຢັ້ງ; ປາດຖະໜາຢາກພ້ອມກັບຈີນ ມານະພະຍາຍາມຊຸກຍູ້ບັນດາຂົງເຂດຮ່ວມມືຢ່າງແທດຈິງ, ບັນລຸບາດກ້າວພັດທະນາໃໝ່; ສະເໜີໃຫ້ 2 ຝ່າຍຄວບຄຸມຄວາມບໍ່ລົງລອຍກັນບົນທະເລ, ເຄົາລົບບັນດາຂໍ້ຕົກລົງ ແລະ ຄວາມຮັບຮູ້ລວມຂອງການນຳຂັ້ນສູງ 2 ປະເທດ, ຊຸກຍູ້ບັນດາກົນໄກເຈລະຈາໃຫ້ມີບາດກ້າວແທດຈິງໂດຍໄວ, ປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ເປັນຢ່າງດີ, ສ້າງ ແລະ ລົງນາມກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ, ຕັ້ງໜ້າປະກອບສ່ວນໃຫ້ສະພາບເປັນປົກກະຕິ, ເພື່ອສັນຕິພາບ, ການຮ່ວມມື ແລະ ພັດທະນາ.
ກ່ຽວກັບການຮ່ວມມືທາງດ້ານເສດຖະກິດການຄ້າ, ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ, ຫວຽດນາມ ຖືເປັນສຳຄັນເລື່ອງເປີດກວ້າງ ແລະ ຍົກສູງປະສິດທິຜົນໃນການຮ່ວມມືທຸກດ້ານທີ່ຕ່າງຝ່າຍຕ່າງມີຜົນປະໂຫຍດກັບຈີນ, ຊົມເຊີຍບັນດາວິສາຫະກິດຈີນ ລົງທຶນເຂົ້າຫວຽດນາມ ເໝາະສົມກັບຄວາມຮຽກຮ້ອງຕ້ອງການພັດທະນາຂອງທັງ 2 ຝ່າຍ…
ສ່ວນທ່ານເລຂາທິການໃຫຍ່, ປະທານປະເທດຈີນ ສີຈີ້ນຜິງ ຢືນຢັນວ່າ, ຈີນ ຖືເປັນສຳຄັນເລື່ອງຊຸກຍູ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບຫວຽດນາມ; ຈີນ ຈະສົ່ງເສີມບັນດາວິສາຫະກິດມີກຳລັງຄວາມສາມາດ, ລະດັບຄວາມຮູ້ດ້ານເຕັກໂນໂລຊີສູງເຂົ້າມາລົງທຶນ, ດຳເນີນທຸລະກິດຢູ່ຫວຽດນາມ ແລະ ຈະຕັ້ງໜ້າສົມທົບກັບຫວຽດນາມ ແກ້ໄຂບັນດາບັນຫາຍັງຄົງຄ້າງໃນການຮ່ວມມືດ້ານເສດຖະກິດ, ການຄ້າລະຫວ່າງ 2 ປະເທດ.
ແລະກໍ່ໃນຕອນບ່າຍວັນທີ 13/09, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມ, ພົບປະ ແລະ ໂອ້ລົມກັບພະນັກງານສະຖານທູດຫວຽດນາມ ແລະ ພໍ່ແມ່ປະຊາຊົນ, ນັກສຶກສາ ຫວຽດນາມ ທີ່ພວມດຳລົງຊີວິດ, ອອກແຮງງານ ແລະ ຮ່ຳຮຽນຢູ່ນະຄອນຫຼວງປັກກິງ.