ນາຍົກລັດຖະມົນຕີລາວສະເໜີສອງປະເທດລາວຫວຽດນາມເພີ່ມທະວີການຮ່ວມມືກ່ຽວກັບຄວາມປອດໄພທາງເຄືອຂ່າຍອິນເຕີແນດ
ທ່ານນາຍົກລັດຖະມົນຕີລາວ ທອງລຸນ ສີສຸລິດ
ຕ້ອນຮັບທ່ານລັດຖະມົນຕີ ເຈືອງມິງຕ໋ວນ
(vovworld) - ຕອນບ່າຍວັນທີ 19/9, ຢູ່ນະຄອນຫຼວງວຽງຈັນ, ທ່ານນາຍົກລັດຖະມົນຕີລາວ ທອງລຸນ ສີສຸລິດ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງຖະແຫຼງຂ່າວ ແລະ ສື່ສານ ຫວຽດນາມ, ໂດຍທ່ານລັດຖະມົນຕີ ເຈືອງມິງຕ໋ວນ, ນຳໜ້າ, ພວມມີການຢ້ຽມຢາມ ແລະ ເຮັດວຽກຢູ່ ລາວ. ທ່ານນາຍົກລັດຖະມົນຕີ ທອງລຸນ ສີສຸລິດຊົມຕີລາຄາສູງໝາກຜົນແຫ່ງການຮ່ວມມືລະຫວ່າງສອງກະຊວງໃນໄລຍະຜ່ານມາ; ເນັ້ນໜັກວ່າ, ບັນດາຜົນງານດັ່ງກ່າວບໍ່ພຽງແຕ່ປະກອບສ່ວນເພີ່ມທະວີ ແລະ ແລະ ຊຸກຍູ້ການພົວພັນລະຫວ່າງສອງກະຊວງເທົ່ານັ້ນ, ຫາກຍັງຊ່ວຍປົກປັກຮັກສາ ແລະ ຮັດແໜ້ນການພົວພັນພິເສດ ລາວ - ຫວຽດນາມກວ່າອີກ. ທ່ານນາຍົກລັດຖະມົນຕີ ທອງລຸນ ສີສຸລິດ ສະເໜີ ກະຊວງຖະແຫຼງຂ່າວ ແລະ ສື່ສານ ຫວຽດນາມ ແລະ ກະຊວງໄປສະນີ ໂທລະຄົມມະນາຄົມ ລາວ ສືບຕໍ່ຮ່ວມມືຢ່າງແໜ້ນແຟ້ນໃນຂົງເຂດຮັບປະກັນຄວາມປອດໄພທາງເຄືອຂ່າຍອິນເຕີແນັດ, ໜູນຊ່ວຍ ແລະ ຊ່ວຍເຫຼືອລາວໃນການກໍ່ສ້າງລັດຖະບານເອເລັກໂຕນິກ. ນອກນັ້ນ, ທ່ານນາຍົກລັດຖະມົນຕີ ທອງລຸນ ສີສຸລິດ ກໍ່ສະເໜີ ກະຊວງຖະແຫຼງຂ່າວ ແລະ ສື່ສານ ຫວຽດນາມ ກໍ່ຄືລັດຖະບານ ຫວຽດນາມ ຊ່ວຍເຫຼືອເພື່ອໃຫ້ລາວນຳໃຊ້ ແລະ ຂຸດຄົ້ນລະບົບເຄືອຂ່າຍອິນເຕີແນັດດາວທຽມ LAOSAT ຢ່າງມີປະສິດທິຜົນທີ່ສຸດ.