(vovworld) –ໂດຍຮັບຄຳເຊີນຈາກ ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ, ທ່ານນາຍົກລັດຖະມົນຕີສະຫະພັນ ລັດເຊຍ Dmitry Medvedevໄດ້ເລີ່ມຕົ້ນການຢ້ຽມຢາມຫວຽດນາມຢ່າງເປັນທາງການແຕ່ວັນທີ 5-7/4. ຕອນເຊົົ້າວັນທີ 6/4, ພາຍຫຼັງພິທີຕ້ອນຮັບ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ມີການເຈລະຈາກັບທ່ານນາຍົກລັດຖະມົນຕີສະຫະພັນ ລັດເຊຍ Dmitry Medvedev.
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ແລະ ທ່ານນາຍົກລັດຖະມົນຕີສະຫະພັນ ລັດເຊຍ Dmitry Medvedev ຢືນຢັນຢ່າງສະເໝີຕົ້ນສະເໝີປາຍສືບຕໍ່ປະຕິບັດແນວທາງເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ-ລັດເຊຍ, ຕອບສະໜອງຜົນປະໂຫຍດຍາວນານລະຫວ່າງປະຊາຊົນ 2 ປະເທດ ກໍຄືສືບຕໍ່ຄວາມມານະພະຍາຍາມຮ່ວມເພື່ອແນໃສ່ຊຸກຍູ້ການຮ່ວມມືໃນທຸກຂົງເຂດ. ກ່ຽວກັບການພົວພັນດ້ານການເມືອງ, ທ່ານນາຍົກລັດຖະມົນຕີ ທັງ 2 ເຫັນດີເປັນເອກະສັນຄວນສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນຕ່າງໆ, ເປັນຕົ້ນແມ່ນຂັ້ນສູງ, ຫັນການຮ່ວມມືໃນຂອບເຂດພັກ, ລັດ, ລັດຖະບານ, ສະພາແຫ່ງຊາດ, ບັນດາອົງການສົງຄົມເປັນຫຼາຍຮູບຫຼາຍແບບ, ສືບຕໍ່ສົມທົບກັນຢ່າງແໜ້ນແຟ້ນ ແລະ ສະໜັບສະໜູນບົນເວທີ່ປາໄສສາກົນ.
ທ່ານນາຍົກລັດຖະມົນຕີ ທັງ 2 ເຫັນດີເປັນເອກະສັນກັນວ່າ ຊຸກຍູ້ການລົງນາມໃນສັນຍາການຄ້າເສລີລະຫວ່າງຫວຽດນາມ - ສະຫະພັນເສດຖະກິດອາຊີ-ເອີລົບໃນໄລຍະ 6 ເດືອນຕົ້ນປີ 2015, ສູ້ຊົນນຳວົງເງິນການຄ້າ 2 ສົ້ນຂຶ້ນເປັນ 10 ຕື້ USD ໃນປີ 2020. 2 ຝ່າຍຢືນຢັນຊຸກຍູ້ການຜັນຂະຫຍາຍການກໍ່ສ້າງໂຮງງານໄຟຟ້ານິວເຄຼຍນິງຖ້ວນເລກ 1 ຄື ໄດ້ຕົກລົງກັນ. 2 ຝ່າຍຍັງເຫັນດີເປັນເອກະສັນສືບຕໍ່ເປີດກ້ວາງການພົວພັນ 2 ຝ່າຍໃນຂົງເຂດຕ່າງໆ. ທ່ານນາຍົກລັດຖະມົນຕີ ທັງ 2 ເຫັນດີເປັນເອກະສັນກັນຖືວ່າ ບັນດາການຂັດແຍ້ງຢູ່ເຂດທະເລຕາເວັນອອກຄວນໄດ້ຮັບການແກ້ໄຂດ້ວຍມາດຕະການໂດຍສັນຕິວິທີບົນພື້ນຖານເຄົາລົບກົດໝາຍສາກົນ, ຜົນຂະຫຍາຍປະຕິບັດຖະແຫຼງການ DOC ແລະ ກ້າວໄປເຖິງປະມວນຂໍ້ກຳນົດ COC ໂດຍໄວ.
ພາຍຫຼັງການເຈລະຈາ , ທ່ານນາຍົກລັດຖະມົນຕີ ທັງ 2 ໄດ້ເປັນສັກຂີພິຍານພິທີລົງນາມໃນເອກະສານບາງສະບັບໃນຂົງເຂດພະລັງງານ, ການລົງທຶນ, ທະນາຄານ, ສາທາລະນະສຸກ ແລະ ຄົມມະນາຄົມຂົນສົ່ງ.
ຕອນບ່າຍວັນທີ 6/4, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ກໍໄດ້ໃຫ້ການຕ້ອນຮັບທ່ານນາຍົກລັດຖະມົນຕີສະຫະພັນ ລັດເຊຍ Dmitry Medvedev. ທີ່ການຕ້ອນຮັບ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຢືນຢັນວ່າ ຫວຽດນາມ ບໍ່ມີວັນຈະຫຼົງລືມການຊ່ວຍເຫຼືອຢ່າງໃຫຍ່ຫຼວງຂອງອະດີດສະຫະພາບໂຊຫວຽດ ກໍຄື ສະຫະພັນລັດເຊຍໃນປະຈຸບັນ, ພ້ອມທັງເນັ້ນໜັກວ່າ ນ້ຳໃຈມິດຕະພາບທີ່ເປັນມູນເຊື້ອອັນດີງາມລະຫວ່າງ 2 ປະເທດ ຈະນັບມື້ນັບສະໜິດຕິດພັນ ແລະ ໄດ້ຮັບການປັບປຸງຢ່າງບໍ່ຢຸດຢັ້ງ.
ແລະ ກໍໃນຕອນບ່າຍຂອງວັນດຽວກັນ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ກໍໄດ້ຕ້ອນຮັບ ທ່ານນາຍົກລັດຖະມົນຕີສະຫະພັນ ລັດເຊຍ Dmitry Medvedev, ປະທານພັກປະເທດລັດເຊຍເອກະພາບ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຢືນຢັນວ່າ ຫວຽດນາມມີທັດສະນະສະເໝີຕົ້ນສະເໝີປາຍຖືເປັນສຳຄັນການພັດທະນາການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານກັບສະຫະພັນລັດເຊຍ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຫວັງວ່າ ສັນຍາການຄ້າເສລີລະຫວ່າງຫວຽດນາມ - ສະຫະພັນເສດຖະກິດອາຊີ-ເອີລົບ ຈະໄດ້ຮັບການລົງນາມໂດຍໄວ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຕີລາຄາສູງວິວັດການພັດທະນາອັນດີງາມໃນການພົວພັນຮ່ວມມືລະຫວ່າງພັກກອມມູນິດຫວຽດນາມ ແລະ ພັກປະເທດລັດເຊຍເອກະພາບ.
ສິ້ນສຸດການເຮັດວຽກ, ທ່ານເລຂາທິການໃຫຍ່ພັກກອມູນິດຫວຽດນາມ ຫງວຽນຟູ້ຈ້ອງ ແລະ ທ່ານນາຍົກລັດຖະມົນຕີສະຫະພັນ ລັດເຊຍ Dmitry Medvedev, ປະທານພັກປະເທດລັດເຊຍເອກະພາບ ໄດ້ເປັນສັກຂີພິຍານພິທີລົງນາມໃນບົດບັນທຶກວ່າດ້ວຍການເປີດກ້ວາງ ແລະ ເຮັດໃຫ້ການພົວພັນຮ່ວມມືຮອບດ້ານໄລຍະ 2015-2017 ລະຫວ່າງພັກກອມມູນິດຫວຽດນາມ ແລະ ພັກປະເທດລັດເຊຍເອກະພາບເລິກເຊິ່ງຂຶ້ນຕື່ມ.
ເນື່ອງໃນໂອກາດການຢ້ຽມຢາມຂອງທ່ານນາຍົກລັດຖະມົນຕີລັດເຊຍ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຕອບສຳພາດສຳນັກຂ່າວສານ Itar Tass, ຂອງລັດເຊຍ. ທ່ານນາຍົກລັດຖະມົນຕີ ຫງວຽນເຕີນຢຸງ ໃຫ້ຮູ້ວ່າ, ທ່ານ ແລະ ທ່ານນາຍົກລັດຖະມົນຕີລັດເຊຍ Dmitry Medvedev ຈະປຶກສາຫາລື, ຕີລາຄາປະສິດທິຜົນບັນດາການເຄື່ອນໄຫວຮ່ວມມື 2 ຝ່າຍໃນໄລຍະຜ່ານມາ, ແລກປ່ຽນຄຳເຫັນກ່ຽວກັບທິດທາງ, ມາດຕະການລະອຽດເພື່ອຍູ້ແຮງການພົວພັນຮ່ວມມືລະຫວ່າງ 2 ປະເທດໃນທຸກຂົງເຂດຄື: ການເມືອງ, ເສດຖະກິດ, ການຄ້າ, ການລົງທຶນ, ພະລັງງານ, ເຕັກນິກການທະຫານ, ບຳລຸງສ້າງແຫຼ່ງຊັບພະຍາກອນມະນຸດ ແລະ ບັນດາຂົງເຂດອື່ນໆອີກ. 2 ຝ່າຍຈະປຶກສາຫາລືບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. ກ່າວຄຳເຫັນທີ່ການປະຊຸມຂ່າວ, ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງວ່າ : " ຂ້າພະເຈົ້າ ແລະ ທ່ານນາຍົກລັດຖະມົນຕີລັດເຊຍ Dmitry Medvedevໄດ້ເຫັນດີຖືວ່າ "ບັນດາການຂັດແຍ້ງຢູ່ເຂດທະເລຕາເວັນອອກຄວນໄດ້ຮັບການແກ້ໄຂ ດ້ວຍມາດຕະການໂດຍສັນຕິວິທີບົນພື້ນຖານເຄົາລົບກົດໝາຍສາກົນ, ຜົນຂະຫຍາຍປະຕິບັດຖະແຫຼງການ DOC ແລະ ກ້າວໄປເຖິງປະມວນຂໍ້ກຳນົດ COC ໂດຍໄວ. ຂ້າພະເຈົ້າ ແລະ ທ່ານນາຍົກລັດຖະມົນຕີລັດເຊຍ Dmitry Medvedev ສືບຕໍ່ເປີດກ້ວາງບັນດາໂຄງການຮ່ວມມືດ້ານນ້ຳມັນອາຍແກັສຢູ່ເຂດເສດຖະກິດພິເສດ ແລະ ໄຫຼ່ທະວີບຂອງຫວຽດນາມ"
ໃນຂະນະນັ້ນ, ບັນດາໜັງສືພິມໃຫຍ່ຂອງຫວຽດນາມ ສະບັບອອກວັນທີ 06/04, ໄດ້ໃຫ້ຂ່າວ, ບົດກ່ຽວກັບການຢ້ຽມຢາມຫວຽດນາມ ຂອງທ່ານນາຍົກລັດຖະມົນຕີລັດເຊຍ. ບົດນຳໜັງສືພິມປະຊາຊົນດ້ວຍຫົວຂໍ້ວ່າ “ຂີດໝາຍໃໝ່ໃນການພົວພັນມິດຕະພາບທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານຫວຽດນາມ - ສະຫະພັນລັດເຊຍ” ໄດ້ຢືນຢັນການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີລັດເຊຍ Dmitry Medvedev ແມ່ນເພື່ອແນໃສ່ຊຸກຍູ້ການພົວພັນຮ່ວມມືລະຫວ່າງ 2 ປະເທດໃນທຸກຂົງເຂດຢ່າງແຮງ, ໂດຍສະເພາະກ່ຽວກັບດ້ານເສດຖະກິດ, ການຄ້າ, ການລົງທຶນ. ບົດນຳທີ່ມີຫົວຂໍ້ວ່າ “ເພີ່ມຂີດໝາຍສຳຄັນໃນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ສະຫະພັນລັດເຊຍ” ຂອງນັງສືພິມກອງທັບປະຊາຊົນຫວຽດນາມ ໄດ້ສະແດງຄວາມເຊື່ອໝັ້ນວ່າການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີລັດເຊຍ ຈະປະສົບຜົນສຳເລັດຢ່າງຈົບງາມ, ປະກອບສ່ວນປັບປຸງ ແລະ ເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ສະຫະພັນລັດເຊຍ.