ທ່ານ ຮອງປະທານປະເທດ ລາວ ບຸນຍັງ ວໍລະຈິດ ແລະ ທ່ານນາຍົກລັດ
ຖະມົນຕີ ຫງວຽນເຕີນຢູ້ງ
|
(vovworld) – ວັນທີ 30/4, ຢູ່ນະຄອນ ໂຮ່ຈີມິນ, ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງບັນດາປະເທດ: ລາວ, ກຳປູເຈຍ ແລະ ກູບາ ເນື່ອງໃນໂອກາດບັນດາຄະນະມາເຂົ້າຮ່ວມພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ. ຄະນະຜູ້ແທນລາວ ໂດຍທ່ານ ບຸນຍັງ ວໍລະຈິດ, ຮອງປະທານປະເທດ ລາວ ນຳໜ້າ. ຄະນະຜູ້ແທນລາຊະອານາຈັກ ກຳປູເຈຍ ໂດຍທ່ານນາງ Men Xom On, ຮອງນາຍົກລັດຖະມົນຕີ ລາຊະອານາຈັກ ກຳປູເຈຍ ນຳໜ້າ. ຄະນະຜູ້ແທນ ກູບາ, ໂດຍທ່ານ Jose Ramon Balaguer Cabrera, ເລຂາສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດ ກູບາ ນຳໜ້າ.
ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ໄຊຊະນະປະຫວັດສາດວັນທີ 30/4/1975 ຂອງປະຊາຊົນ ຫວຽດນາມ ບໍ່ສາມາດແຕກແຍກອອກຈາກການສະໜັບສະໜູນ, ການຊ່ວຍເຫຼືອອັນລ້ຳຄ່າຂອງບັນດາປະເທດສັງຄົມນິຍົມ, ຂອງປະຊາຊົນ ໂຊວຽດ, ຈີນ, ລາວ, ກຳປູເຈຍ, ກູບາ ແລະ ເພື່ອນມິດສາກົນໄດ້. ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ຫົວໜ້າຄະນະຜູ້ແທນ 3 ປະເທດ ລາວ, ກຳປູເຈຍ, ກູບາ ເຫັນດີເປັນເອກະສັນເພີ່ມພຸນຄຸນສ້າງ, ປັບປຸງ ແລະ ພັດທະນາການພົວພັນມິດຕະພາບ ທີ່ເປັນມູນເຊື້ອອັນດີງາມ ແລະ ການຮ່ວມມືຮອບດ້ານລະຫວ່າງ ຫວຽດນາມ -ລາວ, ຫວຽດນາມ - ກຳປູເຈຍ ແລະ ຫວຽດນາມ - ກູບາ ຢ່າງບໍ່ຢຸດຢັ້ງ, ເພື່ອສັນຕິພາບ, ສະຖຽນລະພາບ, ການພັດທະນາຢູ່ພາກພື້ນ ແລະ ຢູ່ໃນໂລກ.