ນາຍົກລັດຖະມົນຕີຫງວຽນເຕີນຢູ້ງຕ້ອນຮັບປະທານສະພາເສນາທິການໃຫຍ່ກຳລັງທະຫານປະສົມອາເມລິກາ
(vovworld) – ຕອນບ່າຍວັນທີ 14/8, ທີ່ການຕ້ອນຮັບທ່ານພົນເອກ Martin Dempsey, ປະທານສະພາເສນາທິການໃຫຍ່ກຳລັງທະຫານປະສົມ ອາເມລິກາ ທີ່ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ ເປັນເວລາ 4 ວັນ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກເຖິງຄວາມສະມາດບົ່ມຊ້ອນ ແລະ ຂົງເຂດຮ່ວມມືລະຫວ່າງ ຫວຽດນາມ ແລະ ອາເມລິກາ ຍັງໃຫຍ່ຫຼວງຢູ່. ຫວຽດນາມ ປາດຖະໜາຢາກພ້ອມກັບ ອາເມລິກາ ນຳການພົວພັນລະຫວ່າງ 2 ປະເທດສືບຕໍ່ພັດທະນາໃນທຸກຂົງເຂດໃຫ້ນັບມື້ນັບແທດຈິງ, ມີປະສິດທິຜົນ, ຈາກການເມືອງ - ການທູດ, ເສດຖະກິດ, ການຄ້າການລົງທຶນຕະຫຼອດຮອດວັດທະນະທຳ, ການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຢີ, ສິ່ງແວດລ້ອມ ແລະ ຮັບມືກັບການປ່ຽນແປງຂອງດິນຟ້າອາກາດ ກໍ່ຄືການປ້ອງກັນຊາດ - ປ້ອງກັນຄວາມສະຫງົບ.
ທ່ານນາຍົກລັດຖະມົນຕີ ສະໜັບສະໜູນເລື່ອງສືບຕໍ່ຜັນຂະຫຍາຍ 5 ເນື້ອໃນການຮ່ວມມືປ້ອງກັນຊາດ ເຊິ່ງ 2 ຝ່າຍໄດ້ຕົກລົງ, ໃນນັ້ນມີການຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມ, ການຮ່ວມມື ແລະ ໜູນຊ່ວຍ ຫວຽດນາມ ເຂົ້າຮ່ວມກຳລັງຮັກສາສັນຕິພາບຂອງ ສປຊ, ຍົກເລີກຄຳສັ່ງຫ້າມຂາຍອາວຸດໃຫ້ ຫວຽດນາມ ໂດຍໄວ.
ປະທານສະພາເສນາທິການໃຫຍ່ກຳລັງທະຫານປະສົມ ອາເມລິກາ, ທ່ານພົນເອກ Martin Dempsey ຢືນຢັນວ່າ: ການຢ້ຽມຢາມ ຫວຽດນາມ ຂອງທ່ານແມ່ນຄຳໝັ້ນສັນຍາ ສຳລັບສັນຕິພາບ ແລະ ສະຖຽນລະພາບໃນພາກພື້ນ. ອາເມລິກາ ປາດຖະໜາຢາກກາຍເປັນຄູ່ຮ່ວມມືທີ່ດີຂອງ ຫວຽດນາມ. ທ່ານພົນເອກ Martin Dempseyຊີ້ແຈ້ງວ່າ: ອາເມລິກາ ໃຫ້ຄຳໝັ້ນສັນຍາຮ່ວມມືດ້ານປ້ອງກັນປະເທດ ກັບ ຫວຽດນາມ ໃນ 5 ຂົງເຂດທີ່ໄດ້ຮັບການຕົກລົງ, ໃຫ້ຄຳໝັ້ນສັນຍາພ້ອມກັບ ຫວຽດນາມ ແກ້ໄຂຜົນຮ້າຍຢ້ອນຫຼັງຈາກສົງຄາມ ແລະ ຖືວ່ານີ້ແມ່ນບັນຫາເຊິ່ງ ອາເມລິກາຖືເປັນສຳຄັນ ແລະ ໃຫ້ບຸລິມະສິດ. ອາເມລິກາ ກໍ່ສະໜັບສະໜູນ ຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ, ປາດຖະໜາຢາກຮ່ວມມືກັບ ຫວຽດນາມ ໃນຂົງເຂດຄວາມໝັ້ນຄົງໃນການເດີນທະເລ ແລະ ຊ່ວຍຫວຽດນາມ ແກ້ໄຂບັນດາສິ່ງທ້າທາຍກ່ຽວກັບການປົກປັກຮັກສາອະທິປະໄຕບົນທະເລ. ທ່ານ ປະທານສະພາເສນາທິການໃຫຍ່ກຳລັງທະຫານປະສົມ ອາເມລິກາ ໃຫ້ຮູ້ວ່າ ຝ່າຍ ອາເມລິກາ ຈະຊອກຫາເສັ້ນທາງ ແລະ ແບບວິທີເພື່ອຍົກເລີກຄຳສັ່ງຫ້າມຂາຍອາວຸດໃຫ້ ຫວຽດນາມ ໂດຍໄວ.