(vovworld) – ທີ່ການຕ້ອນຮັບທ່ານນາງລັດຖະມົນຕີ ກະຊວງການຄ້າ ອາເມລິກາ Penny Pritzker ໃນຕອນບ່າຍວັນທີ 2/6, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ການພົວພັນ ຫວຽດນາມ - ອາເມລິກາ ພວມພັດທະນາອັນດີງາມໃນຫຼາຍຂົງເຂດ. ຫວຽດນາມ ປາດຖະໜາຢາກ ພ້ອມກັບ ອາເມລິກາ ສືບຕໍ່ມານະພະຍາຍາມນຳການພົວພັນຮ່ວມມືລະຫວ່າງ 2 ປະເທດໃນຂົງເຂດ: ເສດຖະກິດ, ການຄ້າ, ການລົງທຶນໃຫ້ຂຶ້ນສູ່ລະດັບສູງໃໝ່. 2 ຝ່າຍສືບຕໍ່ນຳໃຊ້ບັນດາກາລະໂອກາດ, ຂຸດຄົ້ນບັນດາທ່າແຮງໃນການຮ່ວມມືເສດຖະກິດລະຫວ່າງ 2 ປະເທດ ຢ່າງສູງສຸດ, ໃນນັ້ນສຸມໃສ່ຊຸກຍູ້ການຮ່ວມມືລົງທຶນໃນບັນດາຂົງເຂດເຊິ່ງ ອາເມລິກາ ມີທ່າແຮງ ແລະ ຫວຽດນາມ ມີຄວາມຕ້ອງການ. ເມື່ອເຕື້ອງເຖິງການເຈລະຈາສັນຍາ TPP, ທ່ານນາຍົກລັດຖະມົນຕີ ຫງວຽນເຕີນຢູ້ງ ຖືວ່າ: ການເຈລະຈາສັນຍານີ້ສຳເລັດຈະສືບຕໍ່ນຳມາເຊິ່ງຜົນປະໂຫຍດທີ່ແທດຈິງໃຫ້ແກ່ທຸກໆປະເທດສະມາຊິກເຂົ້າຮ່ວມ. ຢັ້ງຢືນ ຫວຽດນາມ ຈະສືບຕໍ່ສ້າງເງື່ອນໄຂອຳນວຍຄວາມສະດວກເພື່ອໃຫ້ບັນດານັກລົງທຶນ ອາເມລິກາ ເຂົ້າມາຮ່ວມມືລົງທຶນ. ທ່ານນາຍົກລັດຖະມົນຕີ ຫງວຽນເຕີນຢູ້ງ ກໍ່ສະເໜີໃຫ້ບັນດາວິສາຫະກິດ ອາເມລິກາ ສະໜັບສະໜູນ ຫວຽດນາມ ໃນການເຈລະຈາ TPP, ສະໜັບສະໜູນເພື່ອໃຫ້ລັດຖະບານ ອາເມລິກາ ຮອງຮັບ ຫວຽດນາມ ແມ່ນພື້ນຖານເສດຖະກິດການຕະຫຼາດ...ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢູ້ງ ຢາກໃຫ້ ອາເມລິກາກ່າວປະນາມການກະທຳຜິດກົດໝາຍ, ບໍ່ຫົວຊາຕໍ່ກົດໝາຍສາກົນຂອງ ຈີນ ຢູ່ທະເລຕາເວັນອອກ.
ເມື່ອເນັ້ນໜັກຄວາມສາມາດບົ່ມຊ້ອນການຮ່ວມມືເສດຖະກິດ ລະຫວ່າງ ຫວຽດນາມ ແລະ ອາເມລິກາ ຍັງໃຫຍ່ຫຼວງຢູ່, ພິເສດແມ່ນໃນການຮ່ວມມືໃນຂົງເຂດການບິນ, ກໍ່ສ້າງ, ພະລັງງານ... ທ່ານນາງລັດຖະມົນຕີ ກະຊວງການຄ້າ ອາເມລິກາ Penny Pritzker ຫວັງວ່າ ລັດຖະບານ ຫວຽດນາມ ສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ບັນດາວິສາຫະກິດ ອາເມລິກາ ແລກປ່ຽນການຄ້າ, ຊຸກຍູ້ການຮ່ວມມືລົງທຶນ ເພື່ອຜົນປະໂຫຍດຂອງທັງ ອາເມລິກາ ແລະ ຫວຽດນາມ. ທ່ານນາງລັດຖະມົນຕີ Penny Pritzker ກໍ່ໃຫ້ຮູ້ວ່າ: ອາເມລິກາ ຈະຮ່ວມມືຢ່າງແໜ້ນແຟ້ນກັບບັນດາປະເທດເຂົ້າຮ່ວມການເຈລະຈາ ໃນນັ້ນມີ ຫວຽດນາມ ເພື່ອແນໃສ່ຊຸກຍູ້ການເຈລະຈາ TPP ສຳເລັດຜົນ, ຜ່ານນັ້ນສ້າງເງື່ອນໄຂເພື່ອຊຸກຍູ້ການພົວພັນຮ່ວມມືດ້ານເສດຖະກິດລະຫວ່າງບັນດາປະເທດສະມາຊິກ TPP ໃນນັ້ນມີ ຫວຽດນາມ ແລະ ອາເມລິກາ.