ທ່ານນາຍົກລັດຖະມົນຕີຫງວຽນເຕີນຢຸງຕ້ອນຮັບ
ລັດຖະມົນຕີຊ່ວຍວ່າການກະຊວງຍຸດທະສາດແລະການເງິນສ.ເກົາຫຼີ(vovworld) - ວັນທີ 19/06, ທີ່ການຕ້ອນຮັບທ່ານລັດຖະມົນຕີຊ່ວຍວ່າການກະຊວງຍຸດທະສາດແລະການເງິນສ.ເກົາຫຼີ Joo Hyung Hwan ພວມຢ້ຽມຢາມ ແລະ ເຮັດວຽກຢູ່ຫວຽດນາມ, ທ່ານາຍົກລັດຖະມົນຕີ ຫງວຽນເຕີນຢຸງ ໃຫ້ຮູ້ວ່າ, ລັດຖະບານຫວຽດນາມ ໄດ້ໃຫ້ສັດຕະຍາບັນສັນຍາການຄ້າເສລີຫວຽດນາມ - ສ.ເກົາຫຼີ; ພ້ອມທັງສະເໜີຝ່າຍສ.ເກົາຫຼີ ໃຫ້ສັດຕະຍາບັນໂດຍໄວ ເພື່ອນຳສັນຍາເຂົ້າສູ່ການປະຕິບັດຕົວຈິງ. ທ່ານ Joo Hyung Hwan ຢືນຢັນວ່າ, ກະຊວງຍຸດທະສາດແລະການເງິນສ.ເກົາຫຼີ ຈະສືບຕໍ່ສົມທົບກັບບັນດາອົງການທີ່ມີໜ້າທີ່ຂອງຫວຽດນາມ ຢ່າງແໜ້ນແຟ້ນ ໃນການຜັນຂະຫຍາຍບັນດາຂໍ້ຕົກລົງຮ່ວມມືດ້ານການເງິນ ເຊິ່ງການນຳຂັ້ນສູງ 2 ປະເທດໄດ້ເປັນເອກະພາບແລ້ວ, ໃນນັ້ນມີເລື່ອງກໍ່ສ້າງບັນດາໂຄງການຮ່ວມມືໃນການພັດທະນາພື້ນຖານໂຄງລ່າງຄົມມະນາຄົມຂອງຫວຽດນາມ ຜ່ານບ້ວງສິນເຊື່ອໃຫ້ບຸລິມະສິດ 12 ຕື້ USD ເຊິ່ງສ.ເກົາຫຼີ ໃຫ້ຄຳໝັ້ນສັນຍາສະຫງວນ ໃຫ້ຫວຽດນາມ. ກ່ຽວກັບສັນຍາ FTA ຫວຽດນາມ - ສ.ເກົາຫຼີ, ທ່ານ Joo Hyung Hwan ໃຫ້ຮູ້ວ່າ, ລັດຖະບານສ.ເກົາຫຼີ ພວມຮີບເຮັ່ງກະກຽມບັນດາລະບຽບການທີ່ຈຳເປັນເພື່ອຍື່ນສະເໜີຕໍ່ສະພາແຫ່ງຊາດສ.ເກົາຫຼີ ໃຫ້ສັດຕະຍາບັນສັນຍາດັ່ງກ່າວໂດຍໄວ. ທ່ານ Joo Hyung Hwan ກໍ່ປາດຖະໜາວ່າ, ລັດຖະບານຫວຽດນາມ ສືບຕໍ່ສ້າງເງື່ອນໄຂສະດວກເພື່ອໃຫ້ບັນດາທະນາຄານສ.ເກົາຫຼີ ເປີດສາຂາຕ່າງໆຢູ່ຫວຽດນາມ ເພື່ອແນໃສ່ໜູນຊ່ວຍໃຫ້ວິສາຫະກິດສ.ເກົາຫຼີ ລົງທຶນເຂົ້າຫວຽດນາມ.