ນາຍົກລັດຖະມົນຕີຫງວຽນເຕີນຢູ້ງຕ້ອນຮັບເອກອັກຄະລັດຖະທູດອັງກິດແລະໂປໂລຍ
ທ່ານ Antony Stokes, ເອກອັກຄະລັດຖະທູດ ອັງກິດ ແລະ ທ່ານນາຍົກລັດຖະມົນຕີ ຫງວຽນເຕີນຢູ້ງ
(ພາບ: Đức Tám/TTXVN)
(vovworld) - ຕອນບ່າຍວັນທີ 9/7, ທີ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢູ້ງ ໃຫ້ການຕ້ອນຮັບເອກອັກຄະລັດຖະທູດ ອັງກິດ ທ່ານ Antony Stokes, ເອກອັກຄະລັດຖະທູດ ໂປໂລຍ Barbara Szymanowska. ທີ່ການຕ້ອນຮັບເອກອັກຄະລັດຖະທູດ ອັງກິດ Antony Stokes ເຂົ້າອຳລາເນື່ອງໃນໂອກາດສິ້ນສຸດໜ້າທີ່ປະຕິບັດງານຢູ່ ຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢູ້ງ ຢືນຢັນວ່າ: ຍາມໃດຫວຽດນາມ ກໍ່ຖືເປັນສຳຄັນ ແລະ ຈະມານະພະຍາຍາມຈົນສຸດຄວາມສາມາດຂອງຕົນເພື່ອພ້ອມກັບ ອັງກິດ ສືບຕໍ່ນຳການພົວພັນຮ່ວມມືລະຫວ່າງ 2 ປະເທດ ໃຫ້ນັບມື້ນັບກ້າວເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ. ທ່ານນາຍົກລັດຖະມົນຕີປາດຖະໜາ ອັງກິດ ຈະສືບຕໍ່ສະຫງວນ ODA ໃຫ້ແກ່ ຫວຽດນາມ. ຂອບອົບຂອບໃຈລາຊະອານາຈັກ ອັງກິດ ໄດ້ເຫັນດີເຫັນພ້ອມກັບບັນດາປະເທດ ຈີ 7, ອີຢູ ອອກສຽງຄັດຄ້ານການກະທຳຜິດພາດຂອງ ຈີນ ເມື່ອຕັ້ງຮ້ານເຈາະນ້ຳມັນຢ່າງຜິດກົດໝາຍໃນເຂດທະເລຂອງ ຫວຽດນາມ, ທ່ານນາຍົກລັດຖະມົນຕີຫວັງວ່າ ອັງກິດ ຈະສືບຕໍ່ອອກສຽງກ່າວປະນາມການກະທຳຜິດພາດຂອງ ຈີນຢ່າງແຮງ.
ຊົມເຊີຍເອກອັກຄະລັດຖະທູດ ໂປໂລຍ Barbara Szymanowska ມາຮັບໜ້າທີ່ການການທູດຢູ່ ຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢູ້ງ ຫວັງວ່າ: ທ່ານເອກອັກຄະລັດຖະທູດຈະສົບທົບກັນຢ່າງແໜ້ນແຟ້ນກັບບັນດາກະຊວງ, ຂະແໜງການກ່ຽວຂ້ອງຂອງ 2 ປະເທດ, ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນ ຮ່ວມມືຫຼາຍດ້ານລະຫວ່າງ ຫວຽດນາມ ແລະ ໂປໂລຍ. ທ່ານນາຍົກລັດຖະມົນຕີຫວັງວ່າ: 2 ຝ່າຍສືບຕໍ່ເພີ່ມທະວີໃນການເຄື່ອນໄຫວແລກປ່ຽນຄະນະຜູ້ແທນທຸກຂັ້ນ, ສະໜັບສະໜູນເຊິ່ງກັນ ແລະ ກັນໃນເວທີປາໄສສາກົນ ແລະ ພາກພື້ນ, ຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ວັດທະນະທຳ, ການສຶກສາ - ບຳລຸງສ້າງ, ພ້ອມທັງຫວັງວ່າ: ໂປໂລຍ ຈະໃຫ້ ຫວຽດນາມ ກູ້ຢຶມ ບັນດາບ້ວງເງິນບຸລິມະສິດເພື່ອຮັບໃຊ້ໃຫ້ບັນດາຈຸດໝາຍພັດທະນາ.