ນາຍົກລັດຖະມົນຕີຫງວຽນເຕີນຢູງເຮັດວຽກກັບການນຳນະຄອນໂຮ່ຈີມິນ
ນາຍົກລັດຖະມົນຕີຫງວຽນເຕີນຢູງເຮັດວຽກກັບການນຳນະຄອນໂຮ່ຈີມິນ
(ພາບ: Thanh Vũ – TTXVN)
(vovworld) – ຕອນເຊົ້າວັນທີ 7/12, ຢູ່ນະຄອນ ໂຮ່ຈີມິນ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ມີການເຮັດວຽກກັບຄະນະພັກ, ຄະນະກຳມະການປະຊາຊົນ ນະຄອນ ໂຮ່ຈີມິນ ກ່ຽວກັບສະພາບການເສດຖະກິດ - ສັງຄົມປີ 2013 ແລະ ແຜນການ ປີ 2014. ກ່າວຄຳເຫັນທີ່ການເຮັດວຽກ, ທ່ານນາຍົກລັດຖະມົນຕີ ຫງວຽນເຕີນຢູງ ຕີລາຄາສູງຄວາມມານະພະຍາຍາມ ແລະ ການພັດທະນາຮອບດ້ານຂອງ ນະຄອນ ໂຮ່ຈີມິນ. ພິເສດກ່ຽວກັບດ້ານເສດຖະກິດ, ນະຄອນມີຫຼາຍມາດຕະການລະອຽດ, ຕັ້ງໜ້າ, ປະກອບສ່ວນຮັກສາເສດຖະກິດມະຫາພາກໃຫ້ເປັນປົກກະຕິ, ຄວບຄຸມໄພເງິນເຟີ້, ຮັບປະກັນຊີວິດສັງຄົມ. ທ່ານນາຍົກລັດຖະມົນຕີເນັ້ນໜັກພິເສດເຖິງບົດບາດນຳພາຂອງການນຳນະຄອນ ໂຮ່ຈີມິນ ໃນການພັດທະນາເສດຖະກິດຕິດພັນກັບການຮ່ວມສຳພັນລະຫວ່າງເຂດ ແລະ ພາກພື້ນ. ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ:
“ນະຄອນຕ້ອງສູ້ຊົນເພື່ອບັນລຸຄາດໝາຍທີ່ໄດ້ວາງອອກໃນລະດັບສູງສຸດ. ນະຄອນພັດທະນາບໍ່ພຽງແຕ່ປະກອບສ່ວນໃຫ້ນະຄອນເທົ່ານັ້ນ ຫາກຍັງປະກອບສ່ວນໃຫ້ປະເທດຊາດອີກດ້ວຍ. ປະຈຸບັນ, ພວກເຮົາທັງຮັກສາເສດຖະກິດມະຫາພາກ, ເປັນປົກກະຕິທັງຟື້ນຟູການເຕີບໂຕ ຕິດພັນກັບການຫັນປ່ຽນ, ສ້າງໂຄງປະກອບພື້ນຖານເສດຖະກິດຄືນໃໝ່, ຫັນຮູບແບບການເຕີບໂຕ, ຕິດພັນກັບການປະຕິບັດ 3 ບາດກ້າວບຸກທະລຸ. ບົດບາດຂອງນະຄອນຍັງຕິດພັນກັບການຮ່ວມສຳພັນເຂດ, ຮ່ວມສຳພັນພາກພື້ນໃນ 3 ຂົງເຂດ: ອຸດສາຫະກຳ - ກະສິກຳ - ການບໍລິການ, ຈາກນັ້ນ ເສີມຂະຫຍາຍມູນເຊື້ອອັນດີງາມ, ປະຕິບັດບົດບາດນຳໜ້າພື້ນຖານເສດຖະກິດຂອງທົ່ວປະເທດ.”
ເມື່ອຕີລາຄາກ່ຽວກັບກາລະໂອກາດຂອງນະຄອນໃນໄລຍະຈະມາເຖິງ, ທ່ານນາຍົກລັດຖະມົນຕີ ຫງວຽນເຕີນຢູງ ຖືວ່າ: ຄາດວ່າ, ປີ 2014 ເສດຖະກິດໂລກຈະເຕີບໂຕສູງກ່ວາປີ 2013, ເສດຖະກິດພາຍໃນປະເທດກໍ່ມີທ່າອ່ຽງຟື້ນຟູ, ຮັບປະກັນເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ ແລະ ຮັກສາສະຖຽນລະພາບດ້ານການເມືອງ, ສັງຄົມ ນີ້ແມ່ນຄວາມສະດວກເພື່ອເຕີບໂຕເສດຖະກິດ, ແມ່ນໂອກາດເພື່ອໃຫ້ນະຄອນສືບຕໍ່ຟື້ນຟູ ແລະ ເຕີບໂຕໃຫ້ດີກ່ວາ.