(vovworld) – ວັນທີ 16/10, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ພ້ອມກັບຄະນະຜູ້ແທນຂັ້ນສູງ ຫວຽດນາມ ເດີນທາງອອກຈາກນະຄອນຫຼວງ ແບກລີນ, ສິ້ນສຸດການຢ້ຽມຢາມ ສ. ສະຫະພັນ ເຢຍລະມັນ ຕາມຄຳເຊີນຂອງທ່ານນາຍົກລັດຖະມົນຕີ Angela Merkel ຢ່າງຈົບງາມ ແລະ ເດີນທາງໄປຍັງ ມີລານ (ປະເທດ ອີຕາລີ) ເຂົ້າຮ່ວມກອງປະຊຸມຂັ້ນສູງ ອາຊີ - ເອີລົບ ຄັ້ງທີ 10 (ASEM 10). ເຂົ້າຮ່ວມກອງປະຊຸມ ASEM 10, ທີ່ກອງປະຊຸມນີ້ຄະນະຜູ້ແທນ ຫວຽດນາມ ສືບຕໍ່ເປັນເຈົ້າການປະກອບສ່ວນເຂົ້າບັນດາເນື້ອໃນສຳຄັນຂອງກອງປະຊຸມ, ສົມທົບກັບບັນດາປະເທດໃນບັນດາບັນຫາພັດທະນາ, ປ້ອງກັນຄວາມສະຫງົບ, ເພີ່ມທະວີການຮ່ວມມື 2 ຝ່າຍກັບບັນດາປະເທດສະມາຊິກ.
ກ່ອນໜ້ານັ້ນ, ໃນຂອບເຂດການຢ້ຽມຢາມ ເຢຍລະມັນ ຢ່າງເປັນທາງການ, ວັນທີ 15/10, ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ພົບປະເຈລະຈາກັບທ່ານປະທານາທິບໍດີ ເຢຍລະມັນ Joachim Gauck, ພົບປະກັບທ່ານລັດຖະມົນຕີການຕ່າງປະເທດ ເຢຍລະມັນ Frank Walter – Steimneier. ທີ່ການຕ້ອນຮັບ, ທ່ານປະທານາທິບໍດີ Joachim Gauck ຢືນຢັນວ່າ: ຍາມໃດ ເຢຍລະມັນ ກໍ່ຖືເປັນສຳຄັນການຊຸກຍູ້ສາຍພົວພັນມິດຕະພາບ, ການຮ່ວມມືກັບ ຫວຽດນາມ.
ສ່ວນທ່ານລັດຖະມົນຕີການຕ່າງປະເທດ Frank Walter – Steimneier ຢືນຢັນວ່າ: ເຢຍລະມັນ ສະໜັບສະໜູນ ຫວຽດນາມ ເພີ່ມທະວີການຮ່ວມມືຮອບດ້ານກັບ ອີຢູ, ຊຸກຍູ້ການເພີ່ມທະວີການຮ່ວມມືກັບ ຫວຽດນາມ ທີ່ບັນດາເວທີປາໄສຫຼາຍຝ່າຍ ແລະ ອົງການສາກົນ.
ທີ່ການເຈລະຈາກັບທ່ານນາງນາຍົກລັດຖະມົນຕີ ເຢຍລະມັນ Angela Merkel, ຝ່າຍ ເຢຍລະມັນ ຢັ້ງຢືນຈະສືບຕໍ່ຮັກສາ ODA ໃຫ້ແກ່ ຫວຽດນາມ ໃນໄລຍະຈະມາເຖິງ, ສຸມໃສ່ເຂົ້າໃນ 3 ຂົງເຂດບຸລິມະສິດແມ່ນພະລັງງານ, ປົກປັກຮັກສາສິ່ງແວດລ້ອມ ແລະ ສອນວິຊາຊີບ. ກໍ່ທີ່ການເຈລະຈາ, ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາງນາຍົກລັດຖະມົນຕີ Angela Merkel ເຫັນດີເປັນເອກະສັນເພີ່ມທະວີການຮ່ວມມື, ການສະໜັບສະໜູນເຊິ່ງກັນ ແລະ ກັນບົນເວທີປາໄສຫຼາຍຝ່າຍ ແລະ ອົງການຈັດຕັ້ງສາກົນ. ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາງນາຍົກລັດຖະມົນຕີ Angela Merkel ໄດ້ຕອບຫຼາຍຄຳຖາມຂອງສື່ມວນຊົນທີ່ກ່ຽວຂ້ອງເຖິງບັນຫາທະເລຕາເວັນອອກ. ທ່ານນາຍົກລັດຖະມົນຕີ ຫງວຽນເຕີນຢູ້ງ, ເນັ້ນໜັກວ່າ:
“ເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນແມ່ນສິ່ງທີ່ສັກກະລະບູຊາສຳລັບທຸກໆປະເທດໃນໂລກ. ຫວຽດນາມ ກໍ່ຄືທຸກໆປະເທດຈະນຳໃຊ້ທຸກໆມາດຕະການເພື່ອປົກປ້ອງເອກະລາດ, ອະທິປະໄຕຂອງຕົນໃຫ້ຖືກຕ້ອງຕາມກົດໝາຍສາກົນ. ຂ້າພະເຈົ້າຖືວ່າ, ມາດຕະການນິຕິກຳແມ່ນມາດຕະການສັນຕິ, ຄວາມກ້າວໜ້າເຊິ່ງທົ່ວໂລກ ແລະ ມວນມະນຸດລ້ວນແຕ່ສະໜັບສະໜູນ.”
ທ່ານນາງນາຍົກລັດຖະມົນຕີ Angela Merkel ໃຫ້ຮູ້ວ່າ: ທັດສະນະຂອງ ເຢຍລະມັນ ສະໜັບສະໜູນຫຼັກໝັ້ນຂອງ ຫວຽດນາມ ແກ້ໄຂຄວາມຂັດແຍ້ງກັນດ້ວຍມາດຕະການສັນຕິວິທີ, ບົນພື້ນຖານກົດໝາຍສາກົນ, ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982, ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC):
“ເຢຍລະມັນເອົາໃຈໃສ່ເຖິງເລື່ອງມີເສັ້ນທາງເດີນທະເລເສລີ ແລະ ປອດໄພ. ດັ່ງນັ້ນ, ພວກເຮົາເວົ້າເຖິງບັນຫານີ້ໃນຂອບເຂດ 2 ຝ່າຍ ແລະ ຢູ່ສະຫະພາບເອີລົບ ເປັນປະຈຳ, ພວກຂ້າພະເຈົ້າກໍ່ຈະສືບຕໍ່ເຕື້ອງເຖິງບັນຫານີ້. ພວກຂ້າພະເຈົ້າສະໜັບສະໜູນບັນດາຝ່າຍແກ້ໄຂຄວາມເຄັ່ງຕຶງດ້ວຍມາດຕະການສັນຕິພາບ ແລະ ບັນດາປະເທດປະຕິບັດບັນດາຄຳໝັ້ນສັນຍາຂອງຕົນຢ່າງຖືກຕ້ອງ. ບໍ່ພຽງແຕ່ ເຢຍລະມັນ ເທົ່ານັ້ນຫາກຍັງ ສະຫະພາບເອີລົບ ຈະແລກປ່ຽນບັນຫານີ້ຢູ່ກອງປະຊຸມ ASEM ເພື່ອສ້າງຕັ້ງເສັ້ນທາງເດີນທະເລຢ່າງເສລີ, ປອດໄພຢ່າງແນ່ນອນ.”