(vovworld) - ຕອນບ່າຍວັນທີ 21/8, ຢູ່ສຳນັກງານລັດຖະບານຫວຽດນາມ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ໃຫ້ການຕ້ອນຮັບຄະນະ ກອງບັນຊາການກອງທັບສູງສຸດລາຊະອານາຈັກໄທ ໂດຍພົນເອກທະນະສັກ ປະຕິມາປຣະກອນ, ຜູ້ບັນຊາການ ເປັນຫົວໜ້າຄະນະ ທີ່ພວມຢ້ຽມຢາມ ແລະ ເຮັດວຽດຢູ່ຫວຽດນາມ. ທ່ານນາຍົກລັດຖະມົນຕີ Nguyen Tan Dung ຕີລາຄາສູງໝາກຜົນຂອງການເຮັດວຽກລະຫວ່າງກອງບັນຊາການກອງທັບສູງສຸດໄທ ກັບກອງທັບປະຊາຊົນຫວຽດນາມ ແລະ ຖືວ່າໝາກຜົນຂອງການຢ້ຽມຢາມຈະປະກອບສ່ວນຢ່າງແທດຈິງເຂົ້າໃນການພົວພັນລະຫວ່າງສອງປະເທດ. ທ່ານນາຍົກລັດຖະມົນຕີ ໄດ້ເນັ້ນໜັກວ່າ, ໂດຍເປັນເພື່ອນມິດຖານບ້ານໃກ້ເຮືອນຄຽງ, ຫວຽດນາມ ສະແດງຄວາມປິຕິຊົມຊື່ນຕໍ່ການພົວພັນຮ່ວມມືມິດຕະພາບ ລະຫວ່າງສອງປະເທດ ທີ່ພວມພັດທະນາຢ່າງດີງາມໃນທຸກຂົງເຂດ, ໂດຍສະເພາະແມ່ນໃນຂົງເຂດເສດຖະກິດ, ການຄ້າ, ການລົງທຶນ, ທ່ອງທ່ຽວ, ປ້ອງກັນຄວາມສະຫງົບ; ການຮ່ວມມືລະຫວ່າງກອງທັບສອງປະເທດ ໃນການລາດຕາເວັນຮ່ວມບົນທະເລ ກໍໄດ້ຮັບການຜັນຂະຫຍາຍຢ່າງມີປະສິດທິຜົນ, ປະກອບສ່ວນເພີ່ມທະວີຄວາມສາມັກຄີ, ການຮ່ວມມືລະຫວ່າງສອງປະເທດ. ທ່ານນາຍົກລັດຖະມົນຕີ ປາດຖະໜາວ່າ ກອງທັບສອງປະເທດຜັນຂະຫຍາຍບັນດາຂໍ້ຕົກລົງຮ່ວມມືກ່ຽວກັບການແລກປ່ຽນບົດຮຽນ, ບຳລຸງສ້າງ, ກູ້ໄພກູ້ຊີບຢ່າງມີປະສິດທິຜົນ, ພິເສດແມ່ນສືບຕໍ່ປະຕິບັດການລາດຕາເວັນຮ່ວມລະຫວ່າງກອງທັບເຮືອສອງປະເທດເປັນຢ່າງດີ. ທ່ານນາຍົກລັດຖະມົນຕີ ໄດ້ສະເໜີໃຫ້ສອງຝ່າຍຮ່ວມມືໃນກົນໄກປ້ອງກັນຊາດອາຊຽນເປີດກວ້າງ (ADMM+) ຢ່າງມີປະສິດທິຜົນ, ໃນນັ້ນມີບັນຫາທະເລຕາເວັນອອກ, ເພື່ອສັນຕິພາບ, ສະຖຽນລະພາບ, ຮ່ວມມື ແລະ ພັດທະນາໃນພາກພື້ນ ແລະ ຢູ່ໃນໂລກ.