(vovworld) – ຕອນເຊົ້າວັນທີ 19/10, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ໄດ້ກັບເມືອຮອດ ຮ່າໂນ້ຍ, ສິ້ນສຸດການຢ້ຽມຢຽມລາຊະອານາຈັກ ແບນຊິກ, ສະຫະພາບ ເອີລົບ (ອີຢູ), ສ. ສະຫະພັນ ເຢຍລະມັນ, ເຂົ້າຮ່ວມກອງປະຊຸມຂັ້ນສູງ ອາຊີ - ເອີລົບ ຄັ້ງທີ 10 (ASEM – 10) ຢູ່ ມີລານ, ປະເທດ ອີຕາລີ ແລະ ຢ້ຽມຢາມສຳນັກ ວາຕີກັງ ເປັນທາງການຢ່າງຈົບງາມ. ທ່ານຮອງລັດຖະມົນຕີການຕ່າງປະເທດ ຫວຽດນາມ ບຸ່ຍແທງເຊີນ ໄດ້ຕອບສຳພາດຕໍ່ສື່ມວນຊົນກ່ຽວກັບໝາກຜົນຂອງການຢ້ຽມຢາມຄັ້ງນີ້. ທ່ານຮອງລັດຖະມົນຕີ ບຸ່ຍແທງເຊີນ ໃຫ້ຮູ້ວ່າ: ຄະນະຜູ້ແທນຂັ້ນສູງ ຫວຽດນາມ ໂດຍທ່ານນາຍົກລັດຖະມົນຕີ ຫງວຽນເຕີນຢູ້ງ ນຳໜ້າມີການປະກອບສ່ວນພົ້ນເດັ່ນຫຼາຍຢ່າງທີ່ກອງປະຊຸມ ASEM 10. ພາຍຫຼັງຫຼາຍປີ ຫວຽດນາມ ໄດ້ສົມທົບກັບບັນດາປະເທດສະມາຊິກ ອາຊຽນ ແລະ ອີຢູ ຈັດຕັ້ງກອງປະຊຸມຂັ້ນສູງບໍ່ເປັນທາງການຄັ້ງທຳອິດລະຫວ່າງ ອາຊຽນ - ອີຢູ ສຳເລັດຜົນ. ກອງປະຊຸມໄດ້ວາງອອກບັນດາມາດຕະການເພື່ອແນໃສ່ຍົກລະດັບການພົວພັນທຸກດ້ານ, ສອດຄ່ອງກັບຄວາມມຸ່ງມາດປາດຖະໜາລວມຂອງ 2 ຝ່າຍມຸ່ງໄປເຖິງການພົວພັນຄູ່ຮ່ວມມືຍຸດທະສາດ. ທັດສະນະນີ້ຂອງ ຫວຽດນາມ ໄດ້ສະແດງອອກຢ່າງຈະແຈ້ງໃນຖະແຫຼງການຂອງປະທານກອງປະຊຸມຂັ້ນສູງ ASEM 10 ໃນການແກ້ໄຂບັນດາການທ້າທາຍທົ່ວໂລກ ກໍ່ຄືບັນດາບັນຫາພົ້ນເດັ່ນໃນປະຈຸບັນ, ໃນນັ້ນມີບັນຫາທະເລຕາເວັນອອກ. ທ່ານຮອງລັດຖະມົນຕີ ບຸ່ຍແທງເຊີນ ໃຫ້ຮູ້ວ່າ:
“ຖະແຫຼງການຂອງປະທານ ASEM 10 ເນັ້ນໜັກເຖິງເລື່ອງຕ້ອງການຮັບປະກັນຄວາມປອດໄພ, ຄວາມເສລີໃນການເດີນທະເລຢູ່ບັນດາເຂດທະເລໃນໂລກ, ພິເສດແມ່ນຢູ່ທະເລຕາເວັນອອກ. ໃນກອງປະຊຸມຄັ້ງນີ້, ມີຫຼາຍຄຳເຫັນຖືວ່າຕ້ອງຮັກສາບັນດາຫຼັກການທີ່ເປັນພື້ນຖານໃນການພົວພັນສາກົນ, ໝາຍຄວາມວ່າຕ້ອງເຄົາລົບກົດໝາຍສາກົນ, ເຄົາລົບສົນທິສັນຍາກົດໝາຍວ່າດ້ວຍທະເລປີ 1982 ແລະ ນຳໃຊ້ບັນດາມາດຕະການສັນຕິເພື່ອແກ້ໄຂບັນດາຄວາມຂັດແຍ້ງກັນຫາກບໍ່ໄດ້ນຳໃຊ້ກຳລັງອາວຸດ ຫຼື ນາບຂູ່ນຳໃຊ້ກຳລັງອາວຸດ, ຫຼືບັນດາການກະທຳພຽງລຳພັງຝ່າຍດຽວເພື່ອປ່ຽນແປງສະພາບການ.”
ທ່ານຮອງລັດຖະມົນຕີ ບຸ່ຍແທງເຊີນ ຢືນຢັນວ່າ: ການຢ້ຽມຢຽມລາຊະອານາຈັກ ແບນຊິກ, ສະຫະພາບ ເອີລົບ (ອີຢູ), ສ. ສະຫະພັນ ເຢຍລະມັນ, ສຳນັກ ວາຕີກັງ ກໍ່ບັນລຸຜົນສຳເລັດ ແລະ ລ້ວນແຕ່ບັນລຸໄດ້ໝາກຜົນຢ່າງຈົບງາມ. ການນຳແບນຊິກ, ອີຢູ ແລະ ເຢຍລະມັນ ກໍ່ຄື ສຳນັກ ວາຕີກັງ ລ້ວນແຕ່ຢືນຢັນ ຢາກຊຸກຍູ້ການຮ່ວມມືກັບ ຫວຽດນາມ ຢ່າງເລິກເຊິ່ງ ແລະ ກ້ວາງຂວາງກ່ວາອີກ. ການນຳ ສະວິດ, ອີຢູ ແລະ ເຢຍລະມັນ ລ້ວນແຕ່ເອົາໃຈໃສ່ເຖິງບັນຫາສັນຕິພາບ, ຄວາມສະຫງົບໃນພາກພື້ນ ອາຊີ - ປາຊີຟິກ ກໍ່ຄືກ່ຽວກັບບັນຫາທະເລຕາເວັນອອກ. ທ່ານຮອງລັດຖະມົນຕີ ບຸ່ຍແທງເຊີນ, ໃຫ້ຮູ້ຕື່ມອີກວ່າ:
“ນາຍົກລັດຖະມົນຕີ ມາຢ້ຽມຢາມ ສຳນັກ ວາຕີກັງ ຄັ້ງນີ້, ໄດ້ພົບປະກັບສັນຕະປາປາ, ພ້ອມທັງເຈລະຈາກັບນາຍົກລັດຖະມົນຕີ ສຳນັກ ວາຕີກັງ ດ້ວຍສານຈະແຈ້ງທີ່ວ່າ: ພັກ, ລັດ ຫວຽດນາມ ຖືເປັນສຳຄັນການເຫຼື້ອມໃສສາສະໜາຂອງພໍ່ແມ່ປະຊາຊົນຊາວ ຫວຽດນາມ ຢູ່ພາຍໃນປະເທດ, ພ້ອມທັງໜູນຊ່ວຍ, ສ້າງເງື່ອນໄຂສະດວກທີ່ສຸດໃຫ້ພໍ່ແມ່ປະຊາຊົນຊາວຄຼິດກໍ່ຄືບັນດາສາສະໜາອື່ນເຂົ້າຮ່ວມຢ່າງຕັ້ງໜ້າໃນພາລະກິດພັດທະນາເສດຖະກິດ - ສັງຄົມຂອງປະເທດຊາດ ແລະປົກປັກຮັກສາປະເທດຊາດ”
ສັນຕະປາປາ Francis ກໍ່ສະແດງຄວາມວິຕົກວັງວົນກ່ຽວກັບສະພາບຄວາມເຄັ່ງຕຶງຢູ່ທະເລຕາເວັນອອກ ແລະ ຢັ້ງຢືນປາດຖະໜາຢາກປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ປ້ອງກັນຄວາມສະຫງົບຢູ່ພາກພື້ນ ແລະ ຢູ່ໃນໂລກ.