(vovworld) - ພິທີຊັກທຸງລະດັບຊາດທີ່ກຳປັ່ນດຳນ້ຳ 2 ລຳທຳອິດຂອງຫວຽດນາມ ແມ່ນກໍ່າປັ່ນ HQ 182 ຮ່າໂນ້ຍ ແລະ HQ 183 ນະຄອນໂຮ່ຈິມິນ ຖືກດຳເນີນໄປຢ່າງສົມກຽດ ໃນຕອນເຊົ້າວັນທີ 03/04 ຢູ່ທ່າກໍ່າປັ່ນ ກາມແຣງ, ແຂວງ ແຄ໋ງຮ່ວາ.
ກ່າວຄຳເຫັນພາຍຫຼັງພິທີຊັກທຸງ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ເນັ້ນໜັກວ່າ, ນີ້ແມ່ນເຫດການເປັນຂີດໝາຍບາດກ້າວພັດທະນາໃໝ່ ແລະມີຄວາມສຳຄັນພິເສດຂອງກອງທັບເຮືອຫວຽດນາມ ເວົ້າສະເພາະ ແລະ ຂອງກອງທັບປະຊາຊົນຫວຽດນາມ ເວົ້າລວມ. ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງວ່າ.
“ທົ່ວພັກ, ທົ່ວກອງທັບ ແລະ ທົ່ວປະຊາຊົນ ຕ້ອງຮ່ວມແຮງຮ່ວມໃຈ, ພ້ອມກັບການພັດທະນາຢ່າງວ່ອງໄວ, ໝັ້ນຄົງດ້ານເສດຖະກິດ -ສັງຄົມ, ຕ້ອງສຸມກຳລັງສ້າງກອງທັບປະຊາຊົນ, ຕຳຫຼວດປະຊາຊົນທີ່ໝັ້ນຄົງ, ເຂັ້ມແຂງຢ່າງຮອບດ້ານ. ເນື່ອງໃນໂອກາດນີ້, ພວກເຮົາຕ້ອງຢືນຢັນແນວທາງການປ້ອງກັນຊາດຂອງຫວຽດນາມອີກເທື່ອໜຶ່ງ ແມ່ນເພື່ອສັນຕິພາບ ແລະ ປ້ອງກັນຕົວ. ຫວຽດນາມ ຫັນກອງທັບເປັນທັນສະໄໝແມ່ນເພື່ອປ້ອງກັນ, ປັກປັກຮັກສາປະເທດຊາດ, ບໍ່ແນໃສ່ບໍ່ວ່າປະເທດໃດໆ”.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຂອບໃຈເພື່ອນມິດສາກົນ, ພິເສດແມ່ນລັດຖະບານສະຫະພັນລັດເຊຍ ທີ່ໄດ້ສະຫງວນການສະໜັບສະໜູນ, ການຊ່ວຍເຫຼືອອັນລ້ຳຄ່າໃນວິວັດການຫັນກອງທັບປະຊາຊົນຫວຽດນາມ, ກອງທັບເຮືອປະຊາຊົນຫວຽດນາມ ເປັນທັນສະໄໝ.
ແລະກໍ່ໃນຕອນເຊົ້າວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ລົງກວດກາວຽກງານຝຶກອົບຮົມ, ກຽມພ້ອມການສູ້ຮົບຢູ່ບາງກົມກອງທີ່ຕັ້ງທັບຢູ່ທ່າກໍາປັ່ນການທະຫານ ກາມແຣງ.