(vovworld) - ຕອນເຊົ້າວັນທີ 29/4, ຢູ່ນະຄອນວິແທງ, ແຂວງເຫົ້າຢາງ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ເຂົ້າຮ່ວມພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ ແລະ ມອບນາມມະຍົດ “ແມ່ຫວຽດນາມວິລະຊົນ“. ໃນບົດກ່າວປາໄສທີ່ພິທີ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຊີ້ແຈ້ງວ່າ: ມະຫາໄຊລະດູບານໃໝ່ປີ 1975 ປົດປ່ອຍພາກໃຕ້, ໂຮມປະເທດຊາດເປັນເອກະພາບ ແມ່ນຂີດໝາຍປະຫວັດສາດວິລະຊົນອັນສະຫງ່າລາສີຂອງຊາດຫວຽດນາມໃນການຕໍ່ຕ້ານຕ້ານອາເມລິກາກູ້ຊາດ, ຍາດເອົາເອກະລາດແຫ່ງຊາດ, ໂຮມປະເທດຊາດເປັນເອກະພາບ, ໃນນັ້ນມີການປະກອບສ່ວນຂອງອັນໃຫຍ່ຫຼວງຂອງອົງຄະນະພັກ, ອຳນາດການປົກຄອງ, ທະຫານ ແລະ ປະຊາຊົນເຫົ້າຢາງວິລະຊົນ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ເນັ້ນໜັກວ່າ:
“ຄວາມສະຫງ່າລາສີນິ້, ກ່ອນອື່ນໝົດແມ່ນຂຶ້ນກັບບັນດາວິລະຊົນທີ່ໄດ້ເສຍສະຫຼະຊີວິດ, ບັນດາແມ່ຫວຽດນາມວິລະຊົນ, ບັນດາວິລະຊົນກຳລັງປະກອບອາວຸດປະຊາຊົນ...ພວກເຮົາຈົດຈຳບຸນຄຸນບັນດາລູກຜູ້ດີເດັ່ນຂອງຊາດທີ່ໄດ້ສ້າງເປັນໄຊຊະນະອັນສະຫງ່າລາສີໃຫ້ແກ່ປະເທດຊາດ“.
ເຂົ້າຮ່ວມພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບຢູ່ແຂວງເກິ່ນເທີໃນຕອນຄຳ່ວັນທີ 28/4, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຕີລາຄາສູງການປະກອບສ່ວນຢ່າງໃຫຍ່ຫຼວງຂອງອົງຄະນະພັກ, ອຳນາດການປົກຄອງ, ກອງທັບ ແລະ ປະຊາຊົນເກິ່ນເທີໃນການຕໍ່ຕ້ານຕ້ານອາເມລິກາກູ້ຊາດ. ທ່ານເນັ້ນໜັກວ່າ:
“ຫວຽດນາມໄດ້ຜ່ານສົງຄາມຕ້ານສັດຕູຜູ້ຮຸກຮານຕ່າງໆ, ຍາດເອົາເອກະລາດແຫ່ງຊາດ, ໂຮມປະເທດຊາດເປັນເອກະພາບ. ອົງຄະນະພັກ, ອຳນາດການປົກຄອງ, ກອງທັບ, ປະຊາຊົນເກິ່ນເທີຈົ່ງສືບຕໍ່ເສີມຂະຫຍາຍມູນເຊື້ອປະຕິວັດ, ອົງອາດກ້າຫານ, ຮ່ວມແຮງຮ່ວມໃຈ, ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ສ້າງສານະຄອນເກິ່ນເທີ ໃຫ້ນັບມື້ນັບຮັ່ງມີ, ສວຍງາມ, ສີວິໄລ, ສົມກັບບົດບາດ, ທີ່ຕັ້ງສຳຄັນໃນເຂດ ກໍ່ຄືມູນເຊື້ອອັນດີງາມຂອງປະເທດຊາດ“.