ທ່ານນາຍົກລັດຖະມົນຕີ ຫງວຽນຊວນຟຸກ
ຕ້ອນຮັບ ທ່ານນາງ ຫຼີຊຽວຫຼີນ
(vovworld) - ເນື່ອງໃນໂອກາດການຢ້ຽມຢາມມິດຕະພາບສາທາລະນະລັດ ປະຊາຊົນ ຈີນ ຢ່າງເປັນທາງການ ຕອນເຊົ້າວັນທີ 13/09 ທີ່ນະຄອນຫລວງ ບັກກີງ ປະເທດ ຈີນ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ໃຫ້ການຕ້ອນຮັບຄະນະຜູ້ແທນສະມາຄົມມິດຕະພາບການຕ່າງປະເທດປະຊາຊົນ ຈີນ ແລະ ຜູ້ຕາງໜ້າການນຳສະມາຄົມມິດຕະພາບ ຈີນ - ຫວຽດນາມ ໂດຍທ່ານນາງ ຫຼີຊຽວຫຼີນ ປະທານສະມາຄົມມິດຕະພາບການຕ່າງປະເທດປະຊາຊົນ ຈີນ ນຳໜ້າ. ກ່າວຄຳເຫັນທີ່ພິທີຕ້ອນຮັບ ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ: ຫວຽດນາມ ຍາມໃດກໍ່ຖືເປັນສຳຄັນເລື່ອງ ຮັກສາ, ສືບທອດ ແລະ ເສີມຂະຫຍາຍນ້ຳໃຈສາມັກຄີມິດຕະພາບທີ່ເປັນມູນເຊື້ອ ຫວຽດນາມ - ຈີນ. ນ້ຳໃຈມິດຕະພາບພິເສດລະຫວ່າງປະຊາຊົນ 2 ປະເທດແມ່ນຊັບສົມບັດອັນລ້ຳຄ່າ ຄວນສືບຕໍ່ໄດ້ຮັບການຮັກສາ ເສີມຂະຫຍາຍ ເພື່ອຜົນປະໂຫຍດຂອງປະຊາຊົນ 2 ປະເທດ: ເພື່ອສັນຕິພາບ ແລະ ຄວາມວັດທະນາຖາວອນໃນພາກພື້ນ ແລະ ໃນໂລກ. ທ່ານນາຍົກລັດຖະມົນຕີ ປາດຖະໜາວ່າ: 2 ພັກ, 2 ລັດ ແລະ ປະຊາຊົນ 2 ປະເທດ ຈີນ - ຫວຽດນາມ ຕ້ອງຮັກສາ, ເສີມຂະຫຍາຍນ້ຳໃຈສາມັກຄີ, ການພົວພັນທີ່ເປັນມູນເຊື້ອ, ຄວາມສະໜິດຕິດພັນ ເພື່ອພ້ອມກັນຮ່ວມມື, ພັດທະນາ, ເປັນຕົ້ນແມ່ນ ໃນການພົວພັນດ້ານການຄ້າ, ການລົງທຶນ, ການທ່ອງທ່ຽວ. ທ່ານນາຍົກລັດຖະມົນຕີກໍ່ປາດຖະໜາວ່າ 2 ຝ່າຍຕັ້ງໜ້າຮ່ວມມື ເພື່ອແກ້ໄຂບັນດາຄວາມບໍ່ລົງລອຍກັນກ່ຽວກັບບັນຫາທະເລຕາເວັນອອກ ດ້ວຍມາດຕະການສັນຕິພາບ; ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາກົດໝາຍວ່າດ້ວຍທະເລຂອງສະຫະປະຊາຊາດປີ 1982. ເຄົາລົບວິວັດທະນາການ ການທູດ ແລະ ນິຕິກຳ.
ແລະກໍ່ໃນຕອນເຊົ້າຂອງວັນດຽວກັນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ພົບປະກັບຄະນະບັນດາຜູ້ແທນສະມາຄົມຄອບຄົວອະດີດທີ່ປຶກສາ ຈີນ ທີ່ເຄີຍຊ່ວຍເຫຼືອ ຫວຽດນາມ ໃນການຕໍ່ສູ້ຕ່າງໆ.