(vovworld)- ວັນທີ 1/1 ແມ່ນມື້ທີ 5 ຂອງບັ້ນຊອກຫາເຮືອບິນ QZ 8501 ຖືກຫາຍສາບສູນຢູ່ຊ່ອງທະເລ Karimata. ມາຮອດປະຈຸບັນ ຫນ່ວຍກູ້ໄພກູ້ຊີບໄດ້ຊອກເຫັນສາກສົບຂອງຜູ້ໂດຍສານ 7 ຄົນ. ບັນດາສາຍເຫດກໍ່ໃຫ້ເກີດກໍລະນີເຮືອບິນດັ່ງກ່າວຖືກຫາຍສາບສູນ ພວມໄດ້ຮັບການຄົ້ນຄ້ວາ, ໄຈ້ແຍກຈາກບັນດາຜູ້ຊ່ຽວຊານ.
ເມື່ອໄດ້ຮັບຂ່າວກ່ຽວຂ້ອງເຖິງກໍລະນີເຮືອບິນດັ່ງກ່າວຖືກຫາຍສາບສູນ, ວັນທີ 31/12/2014, ທ່ານເລຫາຍບີງ, ໂຄສົກກະຊວງການຕ່າງປະເທດຫວຽດນາມ ໃຫ້ຮູ້ວ່າ: ຫວຽດນາມ ປາດຖະຫນາວ່າ ບັນດາຄວາມມານະພະຍາຍາມຊອກຫາກູ້ໄພກູ້ຊີບຂອງລັດຖະບານບັນດາປະເທດ ຈະຊ່ວຍຊອກເຫັນບັນດາຜູ້ປະສົບໄພທີ່ຍັງເຫລືອໂດຍໄວ. ໃນວັນດຽວກັນ, ທ່ານປະທານປະເທດຫວຽດນາມເຈືອງເຕີນຊາງ ແລະ ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສົ່ງໂທລະເລກສະແດງຄວາມເສົ້າສະຫລົດໃຈມາຍັງທ່ານປະທານາທິບໍດີ ອິນໂດເນເຊຍ Joko Widodo. ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ກໍໄດ້ສົ່ງໂທລະເລກສະແດງຄວາມເສົ້າສະຫລົດໃຈມາຍັງທ່ານລັດຖະມົນຕີການຕ່າງປະເທດ ອິນໂດເນເຊຍ Retno Marsudi.