ການຍິງບັ້ງໄຟດອກຢູ່ຂົວເຍີດເຕິນ ຮ່າໂນ້ຍ
ພາບ:baomoi.com
|
(vovworld)- ຕອນເຊົ້າວັນທີ 1 ຂອງບຸນປີໃຫມ່ປະຈຳຊາດປີມະແມ ກົງກັບວັນທີ 19/2, ພະນັກງານ, ກອງທັບ ແລະ ປະຊາຊົນເມືອງເກາະ ລີເຊີນ ແຂວງ ກວ໋າງຫງາຍ ໄດ້ຈັດຕັ້ງພິທີເຄົາລົບທຸງຊາດຕົ້ນລະດູບານໃຫມ່. ກ່ອນຫນ້ານັ້ນ ຕອນຄ່ຳວັນທີ 18/2(ກົງກັບວັນທີ 30 ບຸນເຕັດ) ປະຊາຊົນບັນດາແຂວງ, ນະຄອນ ໃນທົ່ວປະເທດ ໄດ້ຕ້ອນຮັບຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ຢ່າງເບິກບານມ່ວນຊື່ນ. ຢູ່ຮ່າໂນ້ຍ, ຊາວນະຄອນຫລວງ ຮ່າໂນ້ຍ ນັບໝື່ນໆຄົນ ໄດ້ເຕົ້າໂຮມຢູ່ບັນດາສະຖານທີ່ຈັດຕັ້ງລາຍການສະແດງສິລະປະວັດທະນະທຳ, ຍິງບັ້ງໄຟດອກ ເພື່ອພ້ອມກັນຕ້ອນຮັບຈຸດເວລາສົ່ງທ້າຍປີເກົ່າຕ້ອນຮັບປີໃຫມ່. ແບ່ງປັນກ່ຽວກັບຄວາມຮູ້ສຶກຕ້ອນຮັບປີໃຫມ່, ອ້າຍ ໂງງອກດ໋ຽນ, ຢູ່ ຕາແສງ ຫວ້ານຟຸກ ເມືອງ ບາດີງ ໃຫ້ຮູ້ວ່າ:
“ຂ້າພະເຈົ້າປາດຖະຫນາວ່າ ປີໃຫມ່ ມີສຸຂະພາບເຂັ້ມແຂງ, ມີຄວາມຜາສຸກ ແລະ ຄອບຄົວໄດ້ຮັບຄວາມໂຊກດີຕະຫລອດປີ. ປີຜ່ານມາ ພື້ນຖານເສດຖະກິດຂອງປະເທດຊາດຍັງປະສົບກັບຄວາມຫຍຸ້ງຍາກຫລາຍຢ່າງ, ກ້າວເຂົ້າສູ່ປີໃຫມ່ ຫວັງວ່າ ພື້ນຖານເສດຖະກິດຂອງປະເທດຊາດ ພັດທະນາຢ່າງກະໂດດຂັ້ນ ແລະ ຮັບປະກັນໃຫ້ຄອບຄົວມີຄວາມອີ່ມໜຳສຳລານກວ່າ.”
ຢູ່ບັນດາເສັ້ນທາງໃຈກາງ ນະຄອນ ໂຮ່ຈິມີນ, ຊາວນະຄອນ ນັບໝື່ນໆຄົນ ໄດ້ເຂົ້າຮ່ວມບັນດາການເຄື່ອນໄຫວລະຫລິ້ນບັນເທິງຢ່າງເບິກບານມ່ວນຊື່ນ. ໃນຈຸດເວລາສົ່ງທ້າຍປີເກົ່າ, ຕ້ອນຮັບປີໃຫມ່, ຊາວນະຄອນ ໂຮ່ຈິມີນ ໄດ້ຮັບຊົມການຍິງບັ້ງໄຟດອກສິລະປະ ຊື່ງຈັດຂຶ້ນຢູ່ 8 ສະຖານທີ່.
ບັນຍາກາດຕ້ອນຮັບບຸນປີໃຫມ່ປະຈຳຊາດປີມະແມ ຢູ່ບັນດາແຂວງຄື: ດ້ຽນບຽນ, ອຽນບາຍ, ຊອກຈັງ, ບັກນີງ, ຟູ ອຽນ ແລະອື່ນໆໃນທົ່ວປະເທດ ກໍ່ໄດ້ຈັດຕັ້ງການເຄື່ອນໄຫວຫລາຍຢ່າງຄື: ຍິງບັ້ງໄຟດອກສິລະປະ, ລາຍການຟ້ອນສິງໂຕ ແລະ ການແຂ່ງຂັນມວຍສິລະປະ ດ້ວຍການເຂົ້າຮ່ວມຂອງຊາວທ້ອງຖິ່ນເປັນຈຳນວນຫລວງຫລາຍ.