ຕອນເຊົ້າວັນທີ 24/1, ພະນັກງານ, ນັກວິສາວະກອນ ແລະ ກຳມະກອນພວມເຮັດວຽກຢູ່ກິດຈະກຳ ເກົ່າຣົ່ງ (ຂົວຣົ່ງ) ນະຄອນ ດາຫນັງ ໄດ້ເລີ່ມຕົ້ນການຜະລິດຕົ້ນປີ. ໂຄງການເກົ່າຣົ່ງ ໄດ້ເລີ່ມລົງມືກໍ່ສ້າງເມື່ອເດືອນ 7 ປີ 2009 ແລະ ຄາດວ່າຈະໄດ້ຮັບການກໍ່ສ້າງສຳເລັດໃນວັນທີ 29/3/2013.
ວັນທີ 23/1 (ຄືວັນທີ 1 ຂອງບຸນເຕັດ) ພະນັກງານ, ກຳມະກອນທ່າກຳປັ່ນ ເຕີນທ້ວນ ແມ່ນຂຶ້ນກັບທ່າກຳປັ່ນ ໄຊງ່ອນ ນະຄອນ ໂຮ່ຈິມີນ ໄດ້ຂົນສິນຄ້າໃນ ກຳປັ່ນ3 ຖ້ຽວ ທຳອິດຂອງປີໃຫມ່ປີມະໂຣງ 2012. ອ້າຍ ຫງວຽນເທເຍື່ອງ ກຳມະກອນຂົນສິນຄ້າຢູ່ທ່າກຳປັ່ນ ເຕີນທ້ວນ ໄດ້ເວົ້າວ່າ:
“ ຫນ່ວຍຂົນສິນຄ້າພວກຂ້າພະເຈົ້າມາເຮັດວຽກໃນເວລາຕົ້ນປີໃຫມ່ ກໍໄດ້ຮັບຄຳອວຍພອນປີໃຫມ່, ການລະດົມກຳລັງໃຈຈາກການນຳທ່າກຳປັ່ນໄຊງ່ອນ. ພວກຂ້າພະເຈົ້າປາດຖະຫນາວ່າ ກ້າວເຂົ້າສູ່ປີໃຫມ່, ທ່າກຳປັ່ນໄຊງ່ອນຈະເປັນຫົວຫນ່ວຍດຳເນີນທຸລະກິດເປັນຢ່າງດີກວ່າ ເພື່ອສ້າງລາຍຮັບໃຫ້ພວກຂ້າພະເຈົ້າເປັນປົກກະຕິ ແລະ ຫລາຍກວ່າເກົ່າ.”
ໃນວັນດຽວກັນ, ງວດສິນຄ້າ 256 ໂຕນຂອງວິສາຫະກິດ ຮວາຟອງ ໄດ້ເຮັດສຳເລັດລະບຽບການພາສີຢູ່ດ່ານຊາຍແດນສາກົນ ລ່າວກາຍ. ນີ້ແມ່ນງວດສິນຄ້າທຳອິດໄດ້ນຳເຂົ້າຫວຽດນາມ ຜ່ານດ່ານຊາຍແດນສາກົນ ລ່າວກາຍ. ທ່ານ ເຈີນຫວູຮ່ວາງ, ຫົວຫນ້າສາຂາກົມພາສີ ດ່ານຊາຍແດນສາກົນ ລ່າວກາຍໃຫ້ຮູ້ວ່າ:
“ອາດຈະເວົ້າວ່າ ປີຜ່ານມາ ການເຄື່ອນໄຫວຂາອອກຂາເຂົ້າຜ່ານດ່ານຊາຍແດນສາກົນລ່າວກາຍປະສົບຜົນສຳເລັດ. ນັບແຕ່ຊຸມມື້ຕົ້ນປີໃຫມ່ ພວກຂ້າພະເຈົ້າກຳນົດໄດ້ຫນ້າທີ່ຂອງຕົນ, ຊັບຊ້ອນກຳລັງຢ່າງພຽງພໍເພື່ອຮັບໃຊ້ການເຄື່ອນໄຫວຂາອອກຂາເຂົ້າເປັນຢ່າງດີ.”