(vovworld)- ວັນທີ 12/3, ບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆ ສືບຕໍ່ຮັບເອົາຄຳເຫັນປະກອບໃສ່ຮ່າງລັດຖະທຳມະນູນປີ 1992 ສະບັບປັບປຸງ. ທີ່ການເຮັດວຽກກັບແຂວງ ດົ່ງນາຍ ເພື່ອກວດກາວຽກງານຈັດຕັ້ງການຮັບເອົາຄຳເຫັນຂອງປະຊາຊົນໃສ່ ຮ່າງລັດຖະທຳມະນູນປີ 1992 ສະບັບປັບປຸງ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໃສ່ໃຈວ່າ: ແຂວງດົ່ງນາຍ ຄວນຍາດແຍ່ງການປະກອບຄຳເຫັນຂອງປັນຍາຊົນ, ນັກວິທະຍາສາດ, ຜູ້ເຮັດວຽກງານຄຸ້ມຄອງ.
ຕອນບ່າຍວັນດຽວກັນ, ທີ່ກອງປະຊຸມຮັບເອົາຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັບປຸງ ໂດຍກະຊວງຊັບພະຍາກອນ ແລະ ສິ່ງແວດລ້ອມຈັດຕັ້ງຂຶ້ນ, ບັນດາຜູ້ແທນໄດ້ສຸມໃສ່ປຶກສາຫາລືກ່ຽວກັບບັນດາເນື້ອໃນຂຶ້ນກັບຂົງເຂດສິ່ງແວດລ້ອມ, ຊັບພະຍາກອນທີ່ດິນ, ນ້ຳ, ໂລຫະ. ກ່ຽວກັບບັນຫາທະເລ, ທ່ານ ຟ້າມງອກເຊີນ, ຮອງຫົວຫນ້າກົມໃຫຍ່ກົມທະເລ ແລະ ໝູ່ເກາະ ຫວຽດນາມ ຍົກຄຳເຫັນວ່າ:
“ຂ້າພະເຈົ້າສະເຫນີເພີ່ມຕື່ມອີກ ມາດຕາຫນຶ່ງກ່ຽວກັບຊັບພະຍາກອນທະເລ. ເພາະວ່າ ມະຕິສູນກາງພັກຄັ້ງທີ 4 ໄດ້ເວົ້າວ່າ: ພວກເຮົາຈະອອກສູ່ທະເລ ແລະ ຈະເພີ່ມ GDP ຈາກທະເລແມ່ນໃຫຍ່ຫລວງ. ສິ່ງດັ່ງກ່າວຢັ້ງຢືນຢ່າງຈະແຈ້ງວ່າ ພວກເຮົາຈະຄຸ້ມຄອງຊັບພະຍາກອນທະເລ, ຂຸດຄົ້ນການນຳໃຊ້ຊັບພະຍາກອນທະເລເພື່ອຮັບປະກັນການຂຸດຄົ້ນແບບຍືນຍົງກໍຄືປົກປັກຮັກສາສິ່ງແວດລ້ອມ, ນັ້ນແມ່ນການກຳນົດທິດໃຫ້ແກ່ບັນດາກົດໝາຍສະເພາະຂະແຫນງໃນໄລຍະຕໍ່ໄປ.”