ບັນດາການນຳລາວຮັບໃບປະກາດ ສະນີຍະບັດປະລິນຍາເອກກິຕິມະສັກ
(ພາບ:vietnamplus.vn)
(VOV)- ຕອນຄ່ຳວັນທີ 25/10 ຢູ່ນະຄອນຫຼວງວຽງຈັນ, ມະຫາວິທະຍາໄລເສດຖະກິດແຫ່ງຊາດຫວຽດນາມ ສົມທົບກັບຫ້ອງວ່າການລັດຖະບານລາວ ແລະ ມະຫາວິທະຍາໄລແຫ່ງຊາດລາວ ໄດ້ຈັດພິທີມອບໃບປະກາດສະນີຍະບັດປະລິນຍາເອກກິຕິມະສັກໃຫ້ແກ່ ບັນດາການນຳຂັ້ນສູງຂອງພັກ, ສະພາແຫ່ງຊາດ ແລະ ລັດຖະບານລາວ ຍ້ອນມີການປະກອບສ່ວນພິເສດດີເດັ່ນໃຫ້ແກ່ພາລະກິດພັດທະນາຂະແໜງການສຶກສາ, ບຳລຸງສ້າງ ແລະ ພັດທະນາວິທະຍາສາດເຕັກໂນໂລຊີຂອງຫວຽດນາມ ເວົ້າລວມ ແລະ ຂອງມະຫາວິທະຍາໄລເສດຖະກິດແຫ່ງຊາດຫວຽດນາມເວົ້າສະເພາະ, ປະກອບສ່ວນຢ່າງໃຫ່ຍຫຼວງເຂົ້າໃນການພັດທະນາສາຍພົວພັນມິດຕະພາບ, ນ້ຳໃຈສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດຫວຽດນາມ ແລະ ລາວ. ກ່າວຄຳເຫັນທີ່ພິທີ, ຕາງໜ້າໃຫ້ບັນດາການນຳລາວ ທີ່ໄດ້ຮັບຄວາມເປັນກຽດນີ້, ທ່ານນາຍົກລັດຖະມົນຕີລາວ ທອງສິງ ທຳມະວົງ ໄດ້ຕີລາຄາວ່າ: ນີ້ແມ່ນການຮັບຮູ້ ແລະ ຍ້ອງຍໍຊົມເຊີຍບັນດາຜົນງານຂອງບັນດາທ່ານຜູ້ນຳທີ່ໄດ້ຮັບໃບປະກາດສະນີຍະບັດ ແລະ ແມ່ນກຳລັງໜູນຊຸກຍູ້, ລະດົມກຳລັງໃຈບັນດາການນຳລາວ ເພື່ອຍົກສູງຄວາມຮັບຜິດຊອບໃນການຈັດຕັ້ງປະຕິບັດອຸດົມການຂອງພັກ, ໂດຍສະເພາະແມ່ນການສ້າງສາພັດທະນາປະເທດຊາດໃຫ້ຮັ່ງມີເຂັ້ມແຂງ, ສັງຄົມຍຸດຕິທຳ ສີວິໄລ ເພື່ອຄວາມຜາສຸກຂອງປະຊາຊົນລາວ. ທ່ານນາຍົກລັດຖະມົນຕີລາວ ທອງສິງ ທຳມະວົງ ຫວັງວ່າຈະພ້ອມກັບບັນດາການນຳພັກ, ລັດລາວ ພັດທະນາສາຍພົວພັນມິດຕະພາບ, ນ້ຳໃຈສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດຫວຽດນາມ ແລະ ລາວ ໃຫ້ນັບມື້ນັບກ້າວເຂົ້າສູ່ລວງເລິກ ແລະ ມີປະສິດທິຜົນກ່ວາອີກ, ນຳສອງປະເທດກ້າວໄປທັດທຽມກັບປະເທດຕ່າງໆໃນພາກພື້ນ ແລະ ໃນໂລກ.