ກໍ່ໃນຕອນເຊົ້າວັນທີ 3/2, ຢູ່ນະຄອນ ໄທງວຽນ, ແຂວງ ໄທງວຽນ ໄດ້ຈັດຕັ້ງງານໂຮມຊຸມນຸມມິດຕິງສະເຫຼີມສະຫຼອງ 82 ປີ ແຫ່ງວັນສ້າງຕັ້ງພັກກອມມູນິດຫວຽດນາມ ແລະ ສະຫຼຸບຂະບວນການແຂ່ງຂັນຮັກຊາດ ປີ 2011. ກ່າວຄຳເຫັນທີ່ພິທີໂຮມຊຸມນຸມ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮູ່ງໄດ້ຢັ້ງຢືນວ່າ: ເມື່ອພັກກອມມູນິດຫວຽດນາມໄດ້ຮັບການສ້າງຕັ້ງຂຶ້ນປັນຂີດໝາຍບາດລ້ຽວຂອງການປະຕິວັດຫວຽດນາມ. ພາຍໃຕ້ການນຳພາຂອງພັກ ແລະ ປະທານ ໂຮ່ຈີມິນທີ່ແສນເຄົາລົບຮັກ, ປະຊາຊົນຫວຽດນາມ ສາມາດຍາດໄດ້ສັນຕິພາບ, ເສລີພາບ, ໂຮມປະເທດເປັນເອກະພາບ ແລະ ປະຈຸບັນ ພວມປະຕິບັດພາລະກິດປ່ຽນແປງໃໝ່, ສ້າງສາປະເທດຊາດໃຫ້ນັບມື້ນັບຮັ່ງມີ, ເຂັ້ມແຂງ, ຊີວິດການເປັນຢູ່ຂອງປະຊາຊົນນັບມື້ນັບມີຄວາມຜາສຸກ, ອີ່ມໜຳສຳລານ. ທ່ານປະທານສະພາແຫ່ງຊາດ ຫງວຽນຊິງຮູ່ງ ເນັ້ນໜັກວ່າ:
“ສະເຫຼີມສະຫຼອງ 82 ປີ ແຫ່ງວັນສ້າງຕັ້ງພັກກອມມູນິດຫວຽດນາມທີ່ມີກຽດສະຫງ່າ ແມ່ນໂອກາດເພື່ອໃຫ້ພວກເຮົາທວບທວນຄືນໄລຍະທາງທີ່ສະຫງ່າອົງອາດຂອງຊາດຫວຽດນາມ ແລະ ຂອງແຂວງໄທງວຽນ, ສືບທອດໃຫ້ແກ່ລຸ້ນຄົນຕໍ່ໄປກ່ຽວກັບມູນເຊື້ອຮັກຊາດ, ນ້ຳໃຈສາມັກຄີ, ອົງອາດກ້າແກ່ນ, ບໍ່ຍອມຈຳນົນໃນການຕໍ່ສູ້, ດຸໝັ່ນຂະຫຍັນພຽນ, ມີຫົວຄິດປະດິດສ້າງໃນການອອກແຮງງານ. ແລະການຮ່ຳຮຽນເພື່ອຫັນຄວາມເອກອ້າງທະນົງໃຈນັ້ນເປັນກຳລັງແຮງ, ເປັນການກະທຳຂອງແຕ່ລະອົງການຈັດຕັ້ງພັກ, ພະນັກງານ, ສະມາຊິກພັກແຕ່ລະຄົນ ແລະ ປະຊາຊົນໃນແຂວງສຸມໃສ່ຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງ ພັກກອມູນິດຫວຽດນາມ ແລະ ມະຕິກອງປະຊຸມໃຫຍ່ອົງຄະນະພັກແຂວງຄັ້ງທີ 18 ຢ່າງມີໄຊ, ເພື່ອນຳແຂວງໄທງວນ ພັດທະນາໄວກ່ວາ ແລະ ໝັ້ນຄົງກ່ວາ”
ກ່ອນໜ້ານັ້ນ, ທ່ານປະທານສະພາແຫ່ງຊາດ ຫງວຽນຊິງຮູ່ງ ໄດ້ໄປຖະຫວາຍທູບທຽນ ອາໄລຫາ ແລະ ເຂົ້າຮ່ວມພິທີປຸກລະດົມປູກຕົ້ນໄມ້ຍາມຕົ້ນລະດູບານໃໝ່ຢູ່ແຂວງ ໄທງວຽນ.
ຢູ່ບັນດາແຂວງພາກກາງ ໄດ້ດຳເນີນການເຄື່ອນໄຫວຫຼາຍຢ່າງ ເພື່ອສະເຫຼີມສະຫຼອງ 82 ປີ ແຫ່ງວັນສ້າງຕັ້ງພັກກອມມູນິດຫວຽດນາມ. ຢູ່ນະຄອນ ດ່າໜັງ, ບັນດາເມືອງ ໃນບໍລິເວນນະຄອນ ໄດ້ຈັດຕັ້ງການເຄື່ອນໄຫວວັດທະນະທຳ, ສີລະປະວັນນະຄະດີສະເຫຼີມສະຫຼອງວັນສ້າງຕັ້ງພັກກອມມູນິດຫວຽດນາມ. ອົງຄະນະພັກນະຄອນ ດ່າໜັງໄດ້ຈັ້ງຕັ້ງພິທີມອບເຄື່ອງໝາຍພັກໃຫ້ແກ່ບັນດາສະມາຊິກພັກທີ່ມີການເຄື່ອນໄຫວໃນພັກກ່ວາ 30 ປີ ຂຶ້ນໄປ ຈຳນວນກ່ວາກ່ວາ 1.500 ຄົນ. ສ່ວນຢູ່ແຂວງ ບິນດິງ, ການນຳຄະນະພັກແຂວງ, ຄະນະກຳມະການປະຊາຊົນ, ຄະນະໂຄສະນາສຶກສາພັກແຂວງໄດ້ຈັດຕັ້ງການເຄື່ອນໄຫວດ້ານວັດທະນະທຳ, ສິລະປະທີ່ດີເດັ່ນຫຼາຍຢ່າງ, ດຶງດູດປະຊາຊົນທຸກຊັ້ນວັນນະເຂົ້າຮ່ວມເປັນຈຳນວນຫຼວງຫຼາຍ. ທ່ານ ເລກິມຕ່ວານ, ຫົວໜ້າຄະນະໂຄສະນາສຶກສາພັກແຂວງ ບິນດິງ ໃຫ້ຮູ້ວ່າ:
“ເນື່ອງໃນໂອກາດສະເຫຼີມສະຫຼອງ 82 ປີ ແຫ່ງວັນສ້າງຕັ້ງພັກກອມູນິດຫວຽດນາມ, ແຂວງໄດ້ແຕ່ງຕັ້ງບັນດາຄະນະໄປຖະຫວາຍທູບທຽນ, ວາງພວງມາລາ ຢູ່ຫ້ອງອະນຸສອນສະຖານໜ່ວຍພັກທຳອິດໄດ້ຮັບການສ້າງຕັ້ງຢູ່ແຂວງ ບິນດິງ. ໄປຄຽງຄູ່ກັນນັ້ນ, ຄະນະພັກແຂວງ ກໍ່ໄດ້ຊີ້ນຳການກວດກາ ເພິ່ມເຕີມບັນດາມາດຕະຖານດ້ານຄຸນສົມບັດຂອງພະນັກງານສະມາຊິກພັກ”
ກໍ່ໃນຕອນເຊົ້າວັນທີ 3/2, ຄະນະພັກແຂວງ ກ໊ວາງຫງາຍ ໄດ້ຈັດຕັ້ງການພົບປະສັງສັນກັບ ບັນດາສະມາຊິກພັກທີ່ດີເດັ່ນ, ທວບທວນຄືນໄລຍະທາງ 82 ປີ ແຫ່ງວັນສ້າງຕັ້ງ ແລະ ເຕີບໃຫຍ່ຂອງພັກກອມມູນິດຫວຽດນາມ.
ກ່ອນໜ້ານັ້ນ,ຕອນຄ່ຳວັນທີ 2/2 ຢູ່ຮ່າໂນ້ຍ, ໄດ້ດຳເນີນລາຍການສີລະປະດົນຕີພິເສດ ໂດຍສະເຫຼີມ ສະຫຼອງ 82 ປີ ແຫ່ງວັນສ້າງຕັ້ງພັກກອມມູນິດຫວຽດນາມ (ຄືວັນທີ 3/2/1930 – 3/2/2012), ດ້ວຍຫົວຂໍ້ວ່າ: ”ໄວ້ເນື້ອເຊື່ອໃຈຕໍ່ພັກກອມມູນິດຫວຽດນາມຕະຫຼອດໄປ”. ລາຍການໄດ້ທົບທວນຄືນບັນດາ ຂີດໝາຍແຫ່ງ ປະຫວັດສາດອັນສະຫງ່າລາສີຂອງພັກກອມມູນິດຫວຽດນາມ, ໝາກຜົນ ແລະ ບຸນຄຸນອັນໃຫຍ່ຫຼວງຂອງປະທານໂຮ່ຈີມິນ ທີ່ມີຕໍ່ພາລະກິດປະຕິວັດ, ນຳພາການປະຕິວັດຫວຽດນາມຍາດໄດ້ໄຊຊະນະນີ້ ຕະຫຼອດມາ, ຍາດໄດ້ເອກະລາດມາໃຫ້ແກ່ປະເທດຊາດ, ເສລີພາບໃຫ້ແກ່ປະຊາຊົນ, ກໍ່ສ້າງປະເທດຫວຽດນາມສັງຄົມນິຍົມຮັ່ງມີເຂັ້ມແຂງ, ສີວິໄລ. ລາຍການກໍ່ມີຄວາມໝາຍຢັ້ງຢືນ ແລະ ສັນລະເສີນບັນດາຜົນງານອັນຍິ່ງໃຫຍ່ຂອງປະຊາຊົນຫວຽດນາມ ໃນສົງຄາມປະຕິບັດກໍ່ຄືຜົນງານທີ່ມີຄວາມໝາຍປະຫວັດສາດໃນພາລະກິດປ່ຽນແປງໃໝ່, ກໍ່ສ້າງ ແລະ ພັດທະນາປະເທດຊາດ, ພາຍໃຕ້ການນຳພາຂອງພັກກອມມູນິດຫວຽດນາມ. ນີ້ກໍ່ແມ່ນໂອກາດສຶກສາອົບຮົມມູນເຊື້ອຮັກຊາດ ແລະ ປະຕິວັດ, ປັບປຸງ, ເພີ່ມທະວີຄວາມໄວ້ເນື້ອເຊື່ອໃຈໃຫ້ແກ່ພະນັກງານ, ສະມາຊິກພັກ ແລະ ປະຊາຊົນທຸກຊັ້ນວັນນະ, ພິເສດແມ່ນລຸ້ນໜຸ່ມ ກ່ຽວກັບບົດບາດນຳພາຂອງພັກທີ່ມີຕໍ່ພາລະກິດປະຕິວັດໃນສະພາບການໃໝ່, ມຸ້ງໄປເຖິງຈຸດໝາຍ ”ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມຍຸຕິທຳ, ປະຊາທິປະໄຕ, ສີວິໄລ”. ກ່າວຄຳເຫັນໄຂລາຍການ, ທ່ານ ຫວູວັນຟູກ, ບັນນາທິການໃຫຍ່ວາລະສານ ກອມມູນິດ ຊີ້ແຈງວ່າ:
“ສືບທອດ ແລະ ເສີມຂະຫຍາຍມູນເຊື້ອປະຫວັດສາດນັບພັນປີຂອງຊາດຫວຽດນາມ, ຕະຫຼອດໄລຍະ 82 ປີທີ່ຜ່ານມາ, ພັກກອມມູນິດຫວຽດນາມ ນັບມື້ນັບສົມເປັນການນຳ ແລະ ຈັດຕັ້ງທຸກໆໄຊຊະນະຂອງການປະຕິວັດຫວຽດນາມ, ແມ່ນຜູ້ ຮັບໃຊ້ທີ່ຈົ່ງຮັກພັກດີຂອງປະຊາຊົນຜູ້ອອກແຮງງານຫວຽດນາມ, ແມ່ນນັກຮົບທີ່ໄວ້ເນື້ອເຊື່ອໃຈ ແລະ ສັດຊື່ບໍລິສຸດ, ເພື່ອນມິດທີ່ບໍລິສຸດເມດຕາ, ຜູກຜ່ອງ ແລະ ປອງດອງ. ຂອງສະຫາຍ ແລະ ເພື່ອນມິດສາກົນ ແລະ ພາຍໃຕ້ຄັນທຸງຂອງພັກ, ປະເທດຫວຽດນາມໄດ້ຮຽງບ່າຮຽງໄຫຼ່ກັບບັນດາປະເທດໃນເວທີສາກົນ ເພື່ອໃຫ້ປະຊາຊົນຫວຽດນາມແຕ່ລະຄົນເຖິງວ່າຢູ່ພາຍໃນ ຫຼື ຕ່າງປະເທດກໍ່ຕາມກໍ່ລ້ວນແຕ່ເອີ້ີນວ່າ: ພັກກອມມູນິດຫວຽດນາມ ແມ່ນພັກຂອງເຮົາ”.