ພາບປະກອບ:internet
|
(vovworld)- ຕອນບ່າຍວັນທີ 27/7, ກຳມາທິການເສດຖະກິດ, ກຳມາທິການວິທະຍາສາດ, ເຕັກໂນໂລຊີ ແລະ ສິ່ງແວດລ້ອມ, ກຳມາທິການວັດທະນະທຳ, ການສຶກສາ, ຊາວຫນຸ່ມ ແລະ ອະນຸຊົນເຍົາວະຊົນຂອງສະພາແຫ່ງຊາດຊຸດທີ XIV ໄດ້ດຳເນີນກອງປະຊຸມຄົບຄະນະຄັ້ງປະຖົມມະລຶກ.
ກ່າວຄຳເຫັນທີ່ວາລະປະຊຸມຂອງກຳມາທິການເສດຖະກິດ, ທ່ານ ຟຸ່ງກວກຫຽນ, ຮອງປະທານສະພາແຫ່ງຊາດ ໄດ້ຢືນຢັນວ່າ: ຫນ້າທີ່ຂອງກຳມາທິການເສດຖະກິດແມ່ນສຳຄັນທີ່ສຸດ, ບໍ່ພຽງແຕ່ຮັບຜິດຊອບຂົງເຂດເສດຖະກິດຂອງສະພາແຫ່ງຊາດເທົ່ານັ້ນ ຫາກຍັງມີຫນ້າທີ່ສົມທົບກັບສະພາຊົນເຜົ່າ, ບັນດາກຳມາທິການອື່ນຂອງສະພາແຫ່ງຊາດ ກວດກາໃນບັນດາຂົງເຂດພິເສດສະເພາະ. ທ່ານຮອງປະທານສະພາແຫ່ງຊາດ ຟຸ່ງກວກຫຽນ ໃສ່ໃຈວ່າ ກຳມາທິການເສດຖະກິດ ຄວນບຸລິມະສິດການເລືອກເຟັ້ນບັນດາບັນຫາຈຸດສຸມເພື່ອຕິດຕາມກວດກາເຂັ້ມງວດ, ພ້ອມກັນນັ້ນບັນດາສະມາຊິກກຳມາທິການຕ້ອງມີຈີນຕະນາການປ່ຽນໃຫມ່, ເສີມຂະຫຍາຍພູມປັນຍາລວມໝູ່ເພື່ອສຳເລັດຫນ້າທີ່ໄດ້ຮັບການມອບໝາຍ.
ໃນວັນດຽວກັນ, ທີ່ວາລະປະຊຸມຄັ້ງປະຖົມມະລຶກຂອງກຳມາທິການວິທະຍາສາດ, ເຕັກໂນໂລຊີ ແລະ ສິ່ງແວດລ້ອມ, ບັນດາສະມາຊິກກຳມາທິການໄດ້ກຳນົດວ່າ ໃນຊຸມເດືອນທ້າຍປີ 2016, ກຳມາທິການ ຈະເປັນເຈົ້າພາບກວດກາ ຮ່າງກົດໝາຍ 3 ສະບັບ, ຄຽງຄູ່ກັນນັ້ນ ກຳມາທິການຈະສືບຕໍ່ຜັນຂະຫຍາຍປະຕິບັດບັນດາຫົວເລື່ອງຕິດຕາມກວດກາສະເພາະກ່ຽວກັບການວາງແຜນພັດທະນາຕະຫລາດໄຟຟ້າ ແລະ ລາຄາຂາຍໄຟຟ້າຕາມກົນໄກການຕະຫລາດ, ການປະຕິບັດກົດໝາຍກ່ຽວກັບການຂຸດຄົ້ນ, ປົກປັກຮັກສາກິດຈະກຳຊົນລະປະທານ, ການປະກາດໃຊ້ບັນດາເອກະສານນິຕິກຳກ່ຽວກັບການປົກປັກຮັກສາສິ່ງແວດລ້ອມ.
ທີ່ວາລະປະຊຸມຄົບຄະນະຄັ້ງປະຖົມມະລຶກຂອງກຳມາທິການວັດທະນະທຳ, ການສຶກສາ, ຊາວຫນຸ່ມ, ອະນຸຊົນ ເຍົາວະຊົນຊຸດທີ XIV ຂອງສະພາແຫ່ງຊາດດຳເນີນໃນຕອນບ່າຍວັນດຽວກັນ, ບັນດາສະມາຊິກກຳມາທິການໄດ້ກຳນົດໄລຍະຈະມາເຖິງ ຈະສຸມໃສ່ຮັບເອົາຄຳເຫັນ, ອະພິປາຍກົດໝາຍວ່າດ້ວຍການເຊື່ອຖື ແລະ ເຫລື້ອມໃສສາສະຫນາເພື່ອຍື່ນສະເຫນີຕໍ່ສະພາແຫ່ງຊາດຊຸດທີ XIV ຮັບຮອງເອົາທີ່ກອງປະຊຸມສະໄຫມສາມັນເທື່ອທີ 2 ແລະ ກວດກາຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ).