(ພາບປະກອບ)
(vovworld) - ວັນທີ 19/12, ບັນດາຕົວແທນຜູ້ມີສິດເລືອກຕັ້ງຂອງ ອາເມລິກາ ໄດ້ສຳເລັດການປ່ອນບັດເລືອກຕັ້ງທີ່ມີລັກສະນະລະບຽບການ ເພື່ອເລືອກຕັ້ງຜູ້ສະໝັກເລືອກຕັ້ງຂອງພັກສາທາລະນະລັດ Donald Trump ເປັນປະທານາທິບໍດີ ອາເມລິກາ ຜູ້ທີ 45 ຂອງປະເທດນີ້, ໃນຂະນະນັ້ນທ່ານ Mike Pence ກໍ່ໄດ້ຮັບເລືອກຕັ້ງເປັນຮອງປະທານາທິບໍດີໃນອຳນາດການປົກຄອງຈະມາເຖິງ. ຕົວແທນຜູ້ມີສິດເລືອກຕັ້ງ 538 ຄົນ ຂອງ 50 ລັດ ແລະ ນະຄອນຫຼວງ ວໍຊິງຕັນ ໄດ້ດຳເນີນການປະຊຸມສະເພາະຢູ່ສຳນັກງານອົງການນິຕິບັນຍັດລັດຕ່າງໆ ເພື່ອປ່ອນບັດຮັບຮອງຜົນການເລືອກຕັ້ງປະທານາທິບໍດີຢ່າງເປັນທາງການ ເຊິ່ງດຳເນີນໃນວັນທີ 8/11 ຜ່ານມາ.
ຕາມຂໍ້ກຳນົດຂອງລັດຖະທຳມະນູນ ອາເມລິກາ ແລ້ວ, ສະພາແຫ່ງຊາດ ອາເມລິກາ ຈະດຳເນີນວາລະປະຊຸມຄົບຄະນະໃນວັນທີ 6/1/2017 ເພື່ອກວດຈຳນວນບັດຂອງຕົວແທນຜູ້ມີສິດເລືອກຕັ້ງຄັ້ງສຸດທ້າຍ, ພາຍໃຕ້ການຕິດຕາມກວດກາຂອງທ່ານຮອງປະທານາທິບໍດີ Joe Biden. ປະທານາທິບໍດີຜູ້ຫາກໍ່ໄດ້ຮັບໄຊຊະນະໃນການເລືອກຕັ້ງ Donald Trump ແລະ ທ່ານຮອງປະທານາທິບໍດີ Mike Pence ຈະສາບານຕົວຮັບດຳລົງຕຳແໜ່ງຢ່າງເປັນທາງການໃນວັນທີ 20/1/2017.