ປະຊາຊົນແຂວງກາເມົາ ໄຫວ້ອາໄລພົນເອກ
ພາບ:internet
|
(vovworld)- ວັນທີ 11/10, ຢູ່ຫລາຍທ້ອງຖິ່ນໃນທົ່ວປະເທດໄດ້ຈັດຕັ້ງການເຄື່ອນໄຫວຕ່າງໆເພື່ອອາໄລຫາພົນເອກຫວໍງວຽນຢາບ. ຢູ່ ແຂວງດ້ຽນບຽນ, ໃນເວລາເກືອບອາທິດຫນຶ່ງ, ມື້ໃດ ປະຊາຊົນບັນດາເຜົ່າຢູ່ແຂວງດ້ຽນບຽນ ກໍມາຖະຫວາຍທູບທຽນຢູ່ແທ່ນບູຊາພົນເອກທີ່ຖືກຕັ້ງຢູ່ກອງບັນຊາການທະຫານແຂວງ ແລະ ສຳນັກບັນຊາບັ້ນຮົບດ້ຽນບຽນຝູ ຢູ່ເມືອງຟັງ ເທິງໂນນພູ E2 ດ້ວຍຈິດໃຈເຄົາລົບນັບຖື. ທ່ານ ຕາວວັນຄືນ, ປະທານສະມາຄົມນັກຮົບເກົ່າ ແຂວງ ດ້ຽນບຽນ ເວົ້າວ່າ:
“ຂ້າພະເຈົ້າຮູ້ສຶກໂສກເສຍດາຍທີ່ສຸດເມື່ອອ້າຍກົກຜູ້ທີ່ບອກສອນໃຫ້ພວກຂ້າພະເຈົ້າກາຍເປັນບັນດານາຍທະຫານຊື່ງໄດ້ຮັບການເຊີດຊູຈາກພັກ ແລະ ປະຊາຊົນໃນວັນນີ້ໄດ້ຈາກໄປບໍ່ມີວັນກັບຄືນ.”
ໃນຊຸມມື້ນີ້, ຢູ່ຫໍພິພິດທະພັນໄຊຊະນະດ້ຽນບຽນຝູໄດ້ຕ້ອນຮັບນັກທ່ອງທ່ຽວ ແລະ ປະຊາຊົນບັນດາເຜົ່າເຂົ້າຢ້ຽມຊົມບັນດາວັດຖຸພັນ, ຮູບພາບຂອງພົນເອກຫວໍງວຽນຢາບໃນບັ້ນຮົບຊຸມປີກ່ອນນີ້.
ສ່ວນຢູ່ແຂວງ ທາຍງວຽນ, ຕອນເຊົ້າວັນທີ 12/10, ໄດ້ໄຂງານວາງສະແດງຮູບພາບກ່ຽວກັບ ພົນເອກຫວໍງວຽນຢາບ ກັບທາຍງວຽນ - ບັກ ທີ່ງານວາງສະແດງ ມີຮູບພາບເອກະສານ 120 ແຜ່ນໄດ້ວາດພາບເຖິງ ພົນເອກຫວໍງວຽນຢາບ, ລູກສິດດີເດ່ັນຂອງປະທານໂຮ່ຈິມີນໃນຊຸມວັນດຳລົງຊີວິດ ແລະ ເຮັດວຽກຢູ່ເຂດສະຫນາມຮົບຫວຽດບັກ ແລະ ເຂດປອດໄພ ດີ້ງຮວາ ທາຍງວຽນ ໃນໄລຍະຕໍ່ຕ້ານຕ້ານພວກລ່າເມືອງຂຶ້ນຝລັ່ງ(1946-1954) ພ້ອມກັບບັນດາຮູບພາບເມື່ອ ພົນເອກຫວໍງວຽນຢາບ ກັບເມືອຢ້ຽມຢາມແຂວງ ທາຍງວຽນ ພາຍຫລັງປະເທດຊາດໄດ້ຮັບສັນຕິພາບ.
ຢຸ່ແຂວງ ບັກນິງ, ຫໍສະມຸດແຂວງໄດ້ຈັດງານວາງສະແດງເອກະສານພາຍໃຕ້ຫົວເລື່ອງວ່າ: ຫວໍງວຽນຢາບ ພົນເອກຂອງປະຊາຊົນ”, ໃນນັ້ນ ແນະນຳປື້ມ 100 ຫົວທີ່ຂຽນກ່ຽວກັບຊີວິດ, ພາລະກິດຂອງ ພົນເອກ ຫວໍງວຽນຢາບ ພ້ອມກັບຫນັງສືພິມຮ້ອຍສະບັບທີ່ລົງພິມຂ່າວ, ບົດ, ຮູບພາບກ່ຽວກັບພົນເອກ ຫວໍງວຽນຢາບ.
ຄະນະຊາວຫນຸ່ມນະຄອນ ຫາຍຟ່ອງ ໄດ້ຈັດຕັ້ງເວທີປາໄສ“ພົນເອກ ຫວໍງວຽນຢາບ ໃນດວງໃຈຂອງໄວຫນຸ່ມຫາຍຟ່ອງ”.
ໃນວັນທີ 11/10, ທີ່ຫໍປະຊຸມຄະນະພັກແຂວງ ຮ່າຕີ້ງ, ການນຳຄະນະພັກ, ສະພາປະຊາຊົນ, ຄະນະກຳມະການປະຊາຊົນ, ຄະນະກຳມະການສູນກາງແນວໂຮມປະເທດຊາດ ພ້ອມກັບພະນັກງານ, ນັກຮົບ ແລະ ປະຊາຊົນທ້ອງຖິ່ນ ໄດ້ໄປຖະຫວາຍທູບທຽນ ອາໄລຫານາຍພົນຜູ້ປີຊາສາມາດຂອງປະເທດຊາດ.
ສ່ວນສະມາຄົມນັກຮົບເກົ່າແຂວງ ກວ໋າງຈີ້ ໄດ້ຕັ້ງແທ່ນບູຊາເພື່ອໃຫ້ບັນດານັກຮົບເກົ່າ ແລະ ປະຊາຊົນໃນແຂວງ ມາຖະຫວາຍທູບທຽນ, ອາໄລຫາ ພົນເອກ ຫວໍງວຽນຢາບ.