ບັນດາປະເທດອາຊຽນ ເພີ່ມທະວີການຮ່ວມມື ຕ້ານອາດຊະຍາກຳ ຂ້າມຊາດ
(ພາບປະກອບ: http://baosonla.org.vn)
(vovworld)- ແຕ່ວັນທີ 23-26/6, ກອງປະຊຸມເຈົ້າໜ້າທີ່ອະວຸໂສ (SOM) ອາຊຽນ ກ່ຽວກກັບການຕ້ານອາດຊະຍາກຳຂ້າມຊາດຄັ້ງທີ 14 (SOMTC 14)ໄດ້ຖືກຈັດຂຶ້ນຢູ່ນະຄອນຫຼວງ Bandar Seri Begawan ປະເທດ Brunei. ກອງປະຊຸມໄດ້ສຸມໃສ່ແລກປ່ຽນບັນດາຄວາມຄຶບໜ້າບັນລຸໄດ້ໃນການຕໍ່ສູ້ຕ້ານອາດຊະຍາກຳຂ້າມຊາດ, ບັນດາໄພນາບຂູ່ທີ່ພົ້ນເດັ່ນໃນຂົງເຂດນີ້ ກໍ່ຄືບັນດາຍຸດທະສາດແນໃສ່ຊຸກຍູ້ການປະຕິບັດບັນດາແຜນການວຽກງານ ຕ້ານອາດຊະຍາກຳຂ້າມຊາດຢ່າງທັນການ. ກອງປະຊຸມຍັງປຶກສາຫາລືກ່ຽວກັບການປະຕິບັດບັນດາຂໍ້ກຳນົດກ່ຽວຂ້ອງເຖິງແຜນການລະອຽດປະຊາຄົມການເມືອງ-ຄວາມສະຫງົບປອດໄພອາຊຽນ ໃນປີ 2015, ລາຍການເຮັດວຽກ SOMTC ໃນ 8 ຂົງເຂດກ່ຽວຂ້ອງເຖິງ ອາດຊະຍາກຳຂ້າມຊາດ, ໃນນັ້ນມີການຕ້ານກໍ່ການຮ້າຍ, ການຄ້າມະນຸດ ແລະ ຟອກເງິນ.
ອິນເດຍ ແລະ ອາຊຽນເພີ່ມທະວີການຮ່ວມມືໃນຫຼາຍຂົງເຂດ
ທີ່ກອງປະຊຸມເຈົ້າໜ້າທີ່ອະວຸໂສ (SOM) ອາຊຽນ-ອິນເດຍ ຄັ້ງທີ 16 (AISOM 16) ຈັດຂຶ້ນໃນວັນທີ 24/6 ຢູ່ນະຄອນຫຼວງ Bandar Seri Begawan ປະເທດ Brunei, ບັນດາຫົວໜ້າ SOM ຂອງອາຊຽນ ແລະ ອິນເດຍ ໄດ້ພ້ອມກັນພິຈາລະນາ, ຕີລາຄາຄວາມຄຶບໜ້າໃນການຮ່ວມມືລະຫວ່າງ ອາຊຽນ ແລະ ອິນເດຍ ໃນ 3 ເສົາຄ້ຳຕົ້ນຕໍ່: ການເມືອງ-ຄວາມສະຫງົບປອດໄພ, ເສດຖະກິດ ແລະ ວັດທະນະທຳ-ສັງຄົມ. ຄຽງຄູ່ກັນນັ້ນ, ກອງປະຊຸມກໍ່ໄດ້ມຸ້ງໄປເຖິງການເຊັນສັນຍາການຄ້າການບໍລິການ ແລະ ລົງທຶນອາຊຽນ-ອິນເດຍໂດຍໄວ ແລະປຶກສາຫາລືກ່ຽວກັບການກະກຽມໃຫ້ແກ່ກອງປະຊຸມລັດຖະມົນຕີການຕ່າງປະເທດອາຊຽນເປີດກ້ວາງກັບອິນເດຍ ຊື່ງຈະຈັດຂຶ້ນໃນເດືອນ 8 ທີ່ຈະມາເຖິງຢູ່ນະຄອນຫຼວງ Nay Pyi Taw ປະເທດມຽນມາ.
ໃນຂົງເຂດວັດທະນະທຳສັງຄົມ, AISOM 16 ຮັບຮູ້ການຮ່ວມມືຢ່າງແຮງລະຫວ່າງປະຊາຊົນອາຊຽນ-ອິນເດຍ ຜ່ານບັນດາການເຄື່ອນໄຫວແຕກຕ່າງກັນ, ໂດຍສະເພາະແມ່ນການແລກປ່ຽນນັກສຶກສາ, ບັນດາໂຄງການໂຄສະນາ ແລະ ການດຳເນີນການພົບປະປະຈຳປີຄັ້ງຕ່າງໆຄື: ການເຈລະຈາເດລີ ແລະ ການເຈລະຈາໂຕະມົນບັນດາຜູ້ຊ່ຽວຊານອາຊຽນ-ອິນເດຍ./.