ບັນດາຜູ້ນຳຫວຽດນາມສົ່ງໂທລະເລກອວຍພອນວັນຊາດລາວ
(vovworld)- ເນື່ອງໃນໂອກາດສະເຫຼີມສະຫຼອງ 38 ປີແຫ່ງວັນຊາດລາວ ( 2/12/1975-2/12/2013) ວັນທີ 1/12, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ, ທ່ານປະທານປະເທດຫວຽດນາມ ເຈືອງເຕີ້ນຊາງ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ແລະ ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ສົ່ງໂທລະເລກອວຍພອນເຖິງທ່ານເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ຈູມມາລີໄຊຍະສອນ, ທ່ານນາຍົກລັດຖະມົນຕີລາວ ທອງສິງທຳມະວົງ ແລະ ທ່ານນາງປະທານສະພາແຫ່ງຊາດລາວ ປານີຢາທໍຕູ້.
ແລະກໍໃນວັນດຽວກັນ, ທ່ານຮອງນາຍົກລັດຖະມົນຕີ, ປະທານຄະນະກຳມາທິການຮ່ວມມືຫວຽດນາມ - ລາວ ຫງວຽນຊວນຟຸກ ກໍໄດ້ສົ່ງໂທລະເລກອວຍພອນເຖິງ ທ່ານຮອງນາຍົກລັດຖະມົນຕີ, ປະທານຄະນະກຳມາທິການຮ່ວມມື ລາວ - ຫວຽດນາມ ສົມສະຫວາດ ເລັງສະຫວັດ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ແລະ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ກໍໄດ້ສົ່ງໂທລະເລກອວຍພອນເຖິງທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດລາວ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ທອງລຸນສີສຸລິດ.
ສ່ວນໜັງສືພິມຫວຽດນາມ ສະບັບຕ່າງໆອອກວັນທີ 2/12 ໄດ້ລົງພິມຂ່າວ ແລະ ບົດກ່ຽວກັບສະເຫຼີມສະຫຼອງວັນຊາດ ສປປ ລາວ ຄົບຮອບ 38 ປີ.