(vovworld) – ຕອນເຊົ້າວັນທີ 08/07, ກອງປະຊຸມຄັ້ງທີ 14 ສະພາປະຊາຊົນນະຄອນໂຮ່ຈິມິນ ຊຸດທີ 8 ໄດ້ໄຂຂຶ້ນຢູ່ນະຄອນ ໂຮ່ຈີມິນ. ນອກຈາກບັນດາບັນຫາຄື: ເລືອກຕັ້ງເພີ່ມເຕີມຕຸລາກິດປະຊາຊົນຂັ້ນເມືອງ ແລະ ຂັ້ນນະຄອນ, ຮັບຮອງເອົາມະຕິກ່ຽວກັບວຽກງານຕິດຕາມກວດກາໂຄງການປະຕິຮູບລະບຽບການບໍລິຫານຢູ່ນະຄອນແຕ່ປີ 2011 ຮອດປະຈຸບັນ… ບັນຫາຮັບປະກັນສະຖຽນລະພາບດ້ານເສດຖະກິດ ສັງຄົມ ໃນສະພາບທີ່ຈີນ ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ຈະໄດ້ຮັບການປຶກສາຫາລືຢ່າງລະອຽດໃນກອງປະຊຸມຄັ້ງນີ້. ກ່າວຄຳເຫັນໄຂກອງປະຊຸມ, ທ່ານນາງປະທານສະພາປະຊາຊົນນະຄອນໂຮ່ຈິມິນ ຫງວຽນທິເຕີມກວຽດ ເນັ້ນໜັກວ່າ.
“ຕໍ່ໜ້າສະພາບການຢູ່ທະເລຕາເວັນອອກໃນປະຈຸບັນ, ດ້ວຍບົດບາດເປັນນະຄອນນຳໜ້າດ້ານເສດຖະກິດທົ່ວປະເທດ, ນະຄອນໂຮ່ຈິມິນ ຕ້ອງສູ້ຊົນປະຕິບັດສຳເລັດບັນດາຄາດໝາຍທີ່ໄດ້ວາງອອກ, ມີການເຄື່ອນໄຫວຢ່າງແທດຈິງ, ຕໍ່ສູ້ຮຽກຮ້ອງຈີນ ຖອນຮ້ານເຈາະນ້ຳມັນ ແລະ ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ. ຂ້າພະເຈົ້າຮຽກຮ້ອງໃຫ້ບັນດາຜູ້ແທນຍົກສູງຄວາມຮັບຜິດຊອບ, ມີຄຳເຫັນປະກອບທີ່ສຳຄັນ, ສູ້ຊົນສຳເລັດບັນດາຄາດໝາຍໃນປີ 2014”.
ໃນຂະນະນັ້ນ, ກ່າວຄຳເຫັນໄຂກອງປະຊຸມສະພາປະຊາຊົນນະຄອນດ່ານັ້ງ ຄັ້ງທີ 10, ທ່ານເຈີນທໍ້, ເລຂາຄະນະພັກນະຄອນ, ປະທານສະພາປະຊາຊົນນະຄອນດ່ານັ້ງ ໃຫ້ຮູ້ວ່າ ກອງປະຊຸມນີ້ຈະຮັບຮອງເອົາມະຕິກ່ຽວກັບການຄັດຄ້ານຈີນ ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ.