ບັນດາສະມາຊິກລັດຖະສະພາອີຕາລີຮ້ຽກຮ້ອງເອີລົບອອກສຽງກ່ຽວກັບການກະທຳຂອງຈີນຢູ່ທະເລຕາເວັນອອກ
(ບັນດາການກະທຳລະເມີດກົດໝາຍສາກົນຂອງຈີນ
ຢູ່ທະເລຕາເວັນອອກ)
(vovworld)- ວັນທີ 14/7, ໃນການອະພິປາຍຢູ່ກຳມາທິການການຕ່າງປະເທດສະພາຕ່ຳອີຕາລີ ກ່ຽວກັບບັນຫາທະເລຕາເວັນອອກ ແລະ ສະພາບຄວາມສະຫງົບປອດໄພໃນພາກພື້ນ, ບັນດາສະມາຊິກລັດຖະສະພາອີຕາລີ ໄດ້ຮຽກຮ້ອງລັດຖະບານປະເທດນີ້ ແລະ ບັນດາປະເທດເອີລົບ ອອກສຽງຢ່າງແຮງກ່ຽວກັບບັນດາການກະທຳລະເມີດກົດໝາຍສາກົນຂອງຈີນ ຢູ່ທະເລຕາເວັນອອກ. ນີ້ເປັນຄັ້ງທຳອິດທີ່ກຳມາທິການການຕ່າງປະເທດສະພາຕຳ່ອີຕາລີ ຈັດຕັ້ງການອະພິປາຍ ກ່ຽວກັບບັນຫາທະເລຕາເວັນອອກ ແລະ ເຊີນທ່ານເອກອັກຄະລັດຖະທູດຫວຽດນາມ ປະຈຳອີຕາລີ ຫງວຽນຮ່ວາງລອງ ເຂົ້າຮ່ວມ.
ກ່າວຄຳເຫັນທີ່ການອະພິປາຍ, ທ່ານເອກອັກຄະລັດຖະທູດ ຫງວຽນຮ່ວາງລອງ ຢືນຢັນວ່າ: ອະທິປະໄຕຂອງຫວຽດນາມ ສຳລັບບັນດາເກາະໃນທະເລຕາເວັນອອກ, ທັດສະນະສະເໝີຕົ້ນສະໝີປາຍຂອງຫວຽດນາມ ໃນການແກ້ໄຂບັນຫາທະເລຕາເວັນອອກ ແມ່ນບັນດາຝ່າຍຕ້ອງເຄົາລົບສະພາບເດີມ, ບໍ່ນຳໃຊ້ ຫຼື ນາບຂູ່ນຳໃຊ້ອາວຸດ, ແກ້ໄຂຄວາມຄັດແຍ້ງກັນໂດຍສັນຕິວິທີບົນພື້ນຖານເຄົາລົບເອກະລາດ, ອະທິປະໄຕຜືນແຜ່ນດິນອັນຄົບຖ້ວນ, ເໝາະສົມກັບກົດໝາຍສາກົນ, ພິເສດແມ່ນສົນທິສັນຍາກ່ຽວກັບກົດໝາຍວ່າດ້ວຍທະເລປີ 1982 ຂອງສະຫະປະຊາຊາດ, ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC), ເພື່ອຊອກຫາວິທີແກ້ໄຂໂດຍພື້ນຖານ ແລະ ຍາວນານ, ຕອບສະໜອງຜົນປະໂຫຍດອັນຊອບທຳຂອງບັນດາຝ່າຍ, ມຸ່ງໄປເຖິງກໍ່ສ້າງທະເລຕາເວັນອອກ ກາຍເປັນເຂດທະເລແຫ່ງສັນຕິພາບ, ຮ່ວມມື ແລະ ພັດທະນາ.