ບັນດາສະມາຊິກສະພາແຫ່ງຊາດປຶກສາກ່ຽວກັບແຜນນະໂຍບາຍກໍ່ສ້າງທ່າອາກາດສະຍານສາກົນລອງແທ່ງ
(ທ່ານ ຟ້າມກວາງງິ, ຫົວໜ້າຄະນະ ສສຊ ນະຄອນຮ່າໂນ້ຍ)
(vovworld) - ຕອນບ່າຍວັນທີ 4/11, ໃນຂອບເຂດກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຫວຽດນາມຊຸດທີ 13, ມີ ສະມາຊິກສະພາແຫ່ງຊາດ (ສສຊ) ຫຼາຍທ່ານໄດ້ສະໜັບສະໜູນແຜນນະໂຍບາຍລົງທຶນ ກໍ່ສ້າງທ່າອາກາດສະຍານສາກົນລອງແທ່ງ. ແຕ່ຄຽງຂ້າງນັ້ນ, ມີ ສສຊ ຫຼາຍທ່ານກໍ່ສະແດງຄວາມວິຕົກກັງວົນຕໍ່ແຜນນະໂຍບາຍ ກໍ່ສ້າງທ່າອາກາດສະຍານສາກົນລອງແທ່ງ ແມ່ນເກີນຄວາມສາມາດດ້ານເສດຖະກິດຂອງຫວຽດນາມ, ໃນສະພາບໜີ້ສາທາລະນະພວມຢູ່ໃນລະດັບສູງ, ຄວາມຕ້ອງການກໍ່ສ້າງບໍ່ທັນຈຳເປັນເທື່ອ. ທ່ານ ຟ້າມກວາງງິ, ຫົວໜ້າຄະນະ ສສຊ ນະຄອນຮ່າໂນ້ຍ, ຍົກຄຳເຫັນວ່າ:
“ຄວາມຈິງແລ້ວ, ຫວຽດນາມຈຳເປັນຕ້ອງມີສະໜາມບິນຂະໜາດໃຫຍ່, ແຕ່ຕ້ອງມີການຄິດໄລ່ຢ່າງລະອຽດ. ທີໜຶ່ງແມ່ນເງິນລົງທຶນມາຈາກໃສ. ໃນບົດລາຍງານຂອງລັດຖະບານໄດ້ເວົ້າເຖິງ 3 ແຫຼ່ງທຶນນັ້ນແມ່ນ: ງົບປະມານ, ODA (ຕ້ອງໃຊ້ດອກເບ້ຍ ເຖິງວ່າອັດຕາດອກເບ້ຍບໍ່ສູງ), ລະດົມທຶນຈາກພາຍນອກ (ອັນນີ້ແມ່ນບໍ່ແນ່ນອນ). ດັ່ງນັ້ນ, ພວກເຮົາຕ້ອງຄິດໄລ່ຢ່າງລະອຽດກວ່າ ແລະ ຖອດຖອນບົດຮຽນຈາກບາງໂຄງການກ່ອນນັ້ນ. ທີສອງແມ່ນ, ບັນດາປັດໃຈບໍ່ທັນແນ່ນອນແມ່ນຕ້ອງຄິດໄລ່ຄືນ, ນັບທັງການບຸກເບີກໜ້າພຽງ”.
ແລະກໍ່ໃນຕອນບ່າຍວັນທີ 4/11, ເມື່ອປຶກສາຫາລືກ່ຽວກັບສົນທິສັນຍາຂອງສະຫະປະຊາຊາດກ່ຽວກັບການຕ້ານທໍລະມານ ແລະ ບັນດາຮູບການປະພືດ ຫຼືລົງໂທດຢ່າງໂຫດຮ້າຍສາມານ, ໄຮ້ມະນຸດສະທຳສຳລັບຄົນ; ສົນທິສັນຍາຂອງສະຫະປະຊາຊາດກ່ຽວກັບສິດຂອງຄົນພິການນັ້ນ, ບັນດາ ສສຊ ໄດ້ເຫັນດີຕໍ່ເລື່ອງຫວຽດນາມໄດ້ໃຫ້ສັດຕະຍາບັນຕໍ່ສົນທິສັນຍາທັງສອງນີ້. ຕອນເຊົ້າວັນດຽວກັນ, ບັນດາ ສສຊ ປຶກສາຫາລືກ່ຽວກັບບັນດາຮ່າງກົດໝາຍປັບປຸງເພີ່ມເຕີມບາງມາດຕາຂອງກົດໝາຍວ່າດ້ວຍພາສີອາກອນ ແລະ ກົດໝາຍວ່າດ້ວຍອາກອນຈຳໜ່າຍພິເສດ.