ບັນດາອົງການຈັດຕັ້ງມິດຕະພາບ ຫວຽດນາມ ແລະ ລາວ ປະກອບສ່ວນເພີ່ມພູນຄູນສ້າງນ້ຳໃຈໄມຕີຈິດມິດຕະພາບ ລະຫວ່າງປະຊາຊົນສອງປະເທດ
(VOVWORLD) -ຕອນຄ່ຳວັນທີ 27 ກັນຍາ, ຢູ່ນະຄອນ ດົງຮ່າ, ແຂວງ ກວ໋າງຈິ, ທ່ານ ເຈິ່ນແທັງເໝິນ ຮອງປະທານຜູ້ປະຈຳການສະພາແຫ່ງຊາດ, ປະທານກຸ່ມສະມາຊິກສະພາແຫ່ງຊາດມິດຕະພາບ ຫວຽດນາມ - ລາວ ໄດ້ໃຫ້ການຕ້ອນຮັບຄະນະຜູ້ແທນເຂົ້າຮ່ວມງານມະໂຫລານມິດຕະພາບປະຊາຊົນ ຫວຽດນາມ - ລາວ ຄັ້ງທີ V.
 ການຕ້ອນຮັບ (ພາບ: TTXVN) |
ກ່າວຄຳເຫັນທີ່ການຕ້ອນຮັບ, ທ່ານຮອງປະທານຜູ້ປະຈຳການສະພາແຫ່ງຊາດ ຫວຽດນາມ ເຈິ່ນແທງເໝິນ ຢັ້ງຢືນວ່າ ສອງພັກ ແລະ ສອງລັດ ຫວຽດນາມ - ລາວ ຖືເປັນສຳຄັນວຽກງານການທູດປະຊາຊົນທີ່ສຸດ, ຍາມໃດກໍສະໜັບສະໜູນ, ສ້າງເງື່ອນໄຂສະດວກທີ່ສຸດໃຫ້ແກ່ການເຄື່ອນໄຫວຂອງກຸ່ມສະມາຊິກສະພາແຫ່ງຊາດມິດຕະພາບ ສອງປະເທດ. ທ່ານ ເຈິ່ນແທັງເໝິນ ຫວັງວ່າ ໃນໄລຍະຈະມາເຖິງ, ບັນດາອົງການຈັດຕັ້ງມິດຕະພາບສອງປະເທດຈະສືບຕໍ່ມີຂໍ້ລິເລີ່ມ, ຈັດຕັ້ງກິດຈະກຳຕ່າງໆດ້ວຍຫຼາຍຮູບແບບ ແລະ ເນື້ອໃນທີ່ອຸດົມສົມບູນ, ຫຼາກຫຼາຍ, ເພິ່ມພູນຄູນສ້າງໄມຕີຈິດຕິດຕະພາບລະຫວ່າງປະຊາຊົນສອງປະເທດ.
ງານມະໂຫລານມິດຕະພາບປະຊາຊົນ ຫວຽດນາມ - ລາວ ຄັ້ງທີ V ຖືກຈັດຂຶ້ນແຕ່ວັນທີ 27 – 30 ກັນຍາ ຢູ່ແຂວງ ກວ໋າງຈິ (ຫວຽດນາມ) ແລະ ສະຫວັນນະເຂດ (ລາວ). ໃນຂອບເຂດຂອງລາຍການຈະດຳເນີນບາງກິດຈະກຳຄື: ກອງປະຊຸມແບ່ງປັນບົດຮຽນປະສົບການໃນການເຄື່ອນໄຫວມິດຕະພາບປະຊາຊົນ ຫວຽດນາມ - ລາວ; ຈູດທູບໃຕ້ທຽນຢູ່ສຸສານນັກຮົບເສຍສະຫຼະຊີວິດເພື່ອຊາດ, ຢ້ຽມຢາມເຂດປູຊະນີຍະສະຖານປະຫວັດສາດປະຕິວັດ; ພົບປະສັງສັນຊອກຮູ້ກ່ຽວກັບສະພາບການດ້ານການເມືອງ, ເສດຖະກິດ, ສັງຄົມຂອງແຂວງ ແລະ ມອບຂອງຂວັນໃຫ້ແກ່ປະຊາຊົນເຂດຊາຍແດນທີ່ປະສົບກັບຄວາມຫຍຸ້ງຍາກ.