ບັນດາແຂວງ ພາກກາງແກ້ໄຂ ຜົນຮ້າຍຈາກພາຍຸ Wutip
(ປະຊາຊົນພາກກາງແກ້ໄຂຜົນຮ້າຍຈາກພາຍຸ Wutip)
(vovworld) – ຕອນບ່າຍວັນທີ 3/10, ກ່ອນທີ່ກ້າວເຂົ້າວາລະເຮັດວຽກຂອງກອງປະຊຸມສູນກາງຄັ້ງທີ 8 (ຊຸດທີ 11), ຄະນະບໍລິຫານງານສູນກາງພັກກອມມູນິດຫວຽດນາມໄດ້ຈັດຕັ້ງການບໍລິຈາກ ສະໜັບສະໜູນປະຊາຊົນພາກກາງແກ້ໄຂຜົນຮ້າຍຈາກພາຍຸ Wutip. ກ່າວຄວາມເຫັນທີ່ພິທີ, ທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາຮຽກຮ້ອງໃຫ້ຄະນະພັກ, ອຳນາດການປົກຄອງ, ແນວໂຮມປະເທດຊາດທຸກຂັ້ນສືບຕໍ່ສູມໃສ່ຊີ້ນຳແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ, ຊ່ວຍໃຫ້ປະຊາຊົນໃນເຂດປະສົບພາຍຸມີຊີວິດເປັນປົກກະຕິຄືນໃໝ່. ໃນວັນດຽວກັນ, ຫ້ອງວ່າການສະພາແຫ່ງຊາດ, ຫ້ອງວ່າການລັດຖະບານກໍ່ໄດ້ປຸກລະດົມການບໍລິຈາກສະໜັບສະໜູນປະຊາຊົນພາກກາງ. ກ່ອນນັ້ນ, ຕອນບ່າຍວັນທີ 2/10, ໃນພິທີປຸກລະດົມ, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຮັບເງິນເກືອບ 29 ຕື້ດົ່ງ ເພື່ອຊ່ວຍເຫຼືອໃຫ້ປະຊາຊົນໃນເຂດປະສົບໄພທຳມະຊາດ. ສະພາກາແດງນະຄອນໂຮ່ຈີມິນ ກໍ່ໄດ້ປຸກລະດົມການບໍລິຈາກ ກູ້ຊ່ວຍປະຊາຊົນພາກກາງ. ທ່ານ ເລກວາງນິນ, ປະທານສະພາກາແດງນະຄອນ ໂຮ່ຈີມິນ, ໃຫ້ຮູ້ວ່າ:
“ວັນທີ 4/10, ພວກຂ້າພະເຈົ້າຈະສົມທົບກັບສະພາກາແດງ 5 ແຂວງຢູ່ທິດເໜືອຂອງພາກກາງ ຂົນສົ່ງສິນຄ້າກູ້ຊ່ວຍ ແລະ ຈະຈັດຕັ້ງການຢ້ຽມຢາມປະຊາຊົນຜູ້ປະສົບເຄາະຮ້າຍໂດຍກົງ. ໃນສັບປະດາໜ້າ, ສະພາກາແດງ ໂຮງໝໍ ຮຸ່ງເວືອງ ຈະຈັດຄະນະໄປຍັງແຂວງ ຮ່າຕິງເພື່ອຊ່ວຍເຫຼືອປະຊາຊົນຢູ່ທີ່ນີ້. ມາຮອດປະຈຸບັນ, ສະພາກາແດງບໍລິຈາກເງິນໄດ້ 1 ຕື້ດົ່ງແລ້ວ “
ໃນວັນທີ 3-4/10, ສະພາກາແດງແຂວງກວາງຈີ້ ໄດ້ມອບຂອງຂວັນ 200 ພູດ, ແຕ່ລະພູດມີມູນຄ່າ 1 ລ້ານດົ່ງໃຫ້ປະຊາຊົນປະສົບເຄາະຮ້າຍຈາກພາຍຸ Wutip. ໃນຂະນະນັ້ນ, ຂະແໜງສາທາລະນະສຸກບັນດາແຂວງພາກກາງ ພວມຮີບເຮັ່ງຜັນຂະຫຍາຍບັນດາມາດຕະການປ້ອງກັນ ແລະ ຕ້ານໂລກລະບາດ, ຮັບປະກັນສຸຂະພາບໃຫ້ແກ່ປະຊາຊົນ ພາຍຫຼັງພາຍຸນ້ຳຖ້ວມ.