ທ່ານນາຍົກລັດຖະມົນຕີ Nguyen Tan Dung ເຂົ້າຮ່ວມ ພິທີໄຂ
ສົກຮຽນ ໃໝ່ຢູ່ໂຮງຮຽນລົງເລິກວິຊາ ເລຮົງຟອງ-ນະຄອນໂຮ່ຈິມິນ
( ພາບ :thanhnien.com.vn)
|
Vovworld- ຕອນເຊົ້າວັນທີ 5/9, ບັນດາໂຮງຮຽນໃນທົ່ວປະເທດໄດ້ໄຂສົກຮຽນ ໃໝ່. ໃນສົກຮຽນນີ້, ທົ່ວປະເທດມີນັກຮຽນກ່ວາ 20.000.000 ຄົນ. ໃນນັ້ນ, ມີເດັກຮຽນຂັ້ນອະນຸບານກ່ວາ 4.000.000 ຄົນ, ນັກຮຽນສາມັນ 15 ລ້ານຄົນ, ນັກຮຽນອາຊີວະຊັ້ນກາງ 610.000 ຄົນ ແລະ ນັກຮຽນຂັ້ນມະຫາວິທະຍາໄລ ແລະ ວິທະຍາໄລກ່ວາ 2 ລ້ານຄົນ. ເພື່ອບັນລຸໝາກຜົນຢ່າງຮອບດ້ານໃນສົກຮຽນ ໃໝ່ນີ້, ຂະແໜງສຶກສາ ແລະ ບຳລຸງສ້າງສືບຕໍ່ຜັນຂະຫຍາຍບັນດາໜ້າທີ່ທີ່ສຳຄັນ ແນໃສ່ມຸ່ງໄປສູ່ການປ່ຽນແປງໃໝ່ພື້ນຖານການສຶກສາໂດຍພື້ນຖານ ແລະ ຮອບດ້ານ, ຕອບສະໜອງຕາມຄວາມຮຽກຮ້ອງຕ້ອງການໃນການພັດທະນາເສດຖະກິດສັງຄົມ ແລະ ເຊື່ອມໂຍງເຂົ້າກັບສາກົນ. ທ່ານຮອງລັດຖະມົນຕີກະຊວງສຶກສາ ແລະ ບຳລຸງສ້າງຫວຽດນາມ Nguyen Vinh Hien ໃຫ້ຮູ້ວ່າ
“ ໃນສົກຮຽນນີ້, ຂະແໜງສຶກສາຈະສືບຕໍ່ປະຕິບັດບັນດາໜ້າທີ່ ປ່ຽນແປງໃໝ່ການສຶກສາ, ໃນນັ້ນຈຸດໃຈກາງແມ່ນປະຕິບັດໜ້າທີ່ແບ່ງຂັ້ນ, ແບ່ງສິດ, ສ້າງຄວາມເປັນເຈົ້າການໃຫ້ແກ່ບັນດາຮາກຖານ; ພ້ອມກັນນັ້ນກໍເພີ່ມທະວີການປັບປຸງບັນດາບັນຫາທີ່ເຄັ່ງຮ້ອນມາແຕ່ດົນນານໃນ ຂະແໜງສຶກສາ. ສືບຕໍ່ປັບປຸງບັນດາເນື້ອໃນໃນຫຼັກສູດ, ປ່ຽນແປງໃໝ່ວິທີການສອນ, ເປັນເຈົ້າການມີຫົວຄິດປະດິດສ້າງ, ຝຶກຝົນຫຼໍ່ຫຼອມວິທີຮຽນດ້ວຍຕົນເອງຂອງນັກຮຽນ. ສືບຕໍ່ຂະຫຍາຍຖັນແຖວພະນັກງານຄຸ້ມຄອງ, ຄູອາຈານ ແລະ ອື່ນໆ ”
ຢູ່ແຂວງ ບັກນິງ, ພ້ອມກັບ ຂະແໜງສຶກສາ ແລະ ບຳລຸງສ້າງ, ອຳນາດການປົກຄອງທ້ອງຖິ່ນຕ່າງໆໄດ້ສົມທົບກັບພາກສ່ວນກ່ຽວຂ້ອງເພື່ອປະຕິບັດວຽກງານສຶກສາເປັນຢ່າງດີ. ທ່ານ Nguyen Duc Buoi ຫົວໜ້າພະແນກສຶກສາ ແລະ ບຳລຸງສ້າງແຂວງ ບັກນິງ ໃຫ້ຮູ້ວ່າ :
“ ປີນີ້, ແຂວງບັກນິງສຸມໃສ່ຍົກສູງຄຸນນະພາບການສຶກສາ. ທີ່ 2 ແມ່ນປັບປຸງບາງບັນຫາກ່ຽວກັບບ້ວງລາຍຮັບໃນໂຮງຮຽນ, ຊີ້ນຳຢ່າງແໜ້ນແຟ້ນກ່ຽວກັບການສອນ ແລະ ຮຽນເພີ່ມ. ສຳລັບນັກຮຽນຂັ້ນອະນຸບານນັ້ນ, ອັດຕາຫ້ອງຮຽນໄດ້ຮັບການກໍ່ສ້າງແບບຖາວອນແມ່ນຍັງບໍ່ທັນສູງທໍ່ກັບໂຮງຮຽນສາມັນ, ດັ່ງນັ້ນ ໃນປີນີ້ຕ້ອງເພີ່ມທະວີການປັບປຸງພາຍຫຼັງບັນລຸລະດັບການສຶກສາຢ່າງທົ່ວເຖິງ, ເພີ່ມທະວີພື້ນຖານດ້ານວັດຖຸ ແລະ ບັນດາເງື່ອນໄຂໃຫ້ແກ່ໂຮງຮຽນຂັ້ນອະນຸບານເພື່ອຕອບສະໜອງຄວາມຕ້ອງການໃນການເປີດກ້ວາງຂອບຂະໜາດ ”