(vovworld) – ຕອນເຊົ້າວັນທີ 25/07, ຢູ່ມະຫາວິທະຍາໄລ ຕົນດຶກທັ໋ງ, ນະຄອນໂຮ່ຈິມິນ, ສະຫະພັນໃຫຍ່ແຮງງານຫວຽດນາມ ໄດ້ຈັດກອງປະຊຸມສຳມະນາສາກົນ ກ່ຽວກັບທະເລຕາເວັນອອກ. ກອງປະຊຸມໄດ້ດຶງດູດຄວາມສົນໃຈຂອງນັກຮຽນຮູ້ຫຼາຍຄົນທັງຢູ່ພາຍໃນ ແລະ ຕ່າງປະເທດ, ໃນນັ້ນມີບັນດາຜູ້ຊ່ຽວຊານທີ່ມີຊື່ສຽງໃນໂລກກ່ຽວກັບທະເລຕາເວັນອອກ.
ກ່າວຄຳເຫັນໄຂກອງປະຊຸມສຳມະນາ, ທ່ານ ດັ້ງງອກຕູ່ງ, ປະທານສະຫະພັນໃຫຍ່ແຮງງານຫວຽດນາມ ເນັ້ນໜັກວ່າ.
“ກອງປະຊຸມສຳມະນານີ້ມີຄວາມໝາຍສຳຄັນຍິ່ງ ຍ້ອນບັນດານັກວິທະຍາສາດ, ບັນດາຜູ້ສ້າງກົດໝາຍ ຈະປະກອບສຽງເວົ້າເພື່ອເຮັດແນວໃດ ແຕ່ລະປະເທດຕ້ອງອີງໃສ່ກົດໝາຍສາກົນ, ອີງໃສ່ມູນເຊື້ອເພື່ອປົກປັກຮັກສາຄວາມສະຖຽນລະພາບຂອງເຂດທະເລນີ້. ເຮັດແນວໃດເພື່ອໃຫ້ທະເລຕາເວັນອອກ ກາຍເປັນແຫ່ງພົວພັນແລກປ່ຽນທີ່ສະດວກ, ກ່າຍເປັນເຂດສັນຕິພາບ, ຊາວປະມົງຫວຽດນາມ ຫາປາເປັນປົກກະຕິນັບແຕ່ດົນນານມາແລ້ວ ແລະ ກາຍເປັນສະຖານທີ່ປອດການຂັດແຍ້ງ”.
ບັນດາຄຳເຫັນທີ່ກອງປະຊຸມສຳມະນາລ້ວນແຕ່ຢືນຢັນວ່າ: ທະເລຕາເວັນອອກແມ່ນເຂດທະເລມີທີ່ຕັ້ງຍຸດທະສາດສຳຄັນ, ກ່ຽວຂ້ອງເຖິງສິດເສລີໃນການເດີນເຮືອຂອງປະເທດຕ່າງໆໃນໂລກ. ສະນັ້ນ, ຕ້ອງປົກປັກຮັກສາທະເລຕາເວັນອອກເປັນເຂດສັນຕິພາບ, ຮ່ວມມື ແລະ ວັດທະນາຖາວອນ. ທ່ານຫງວຽນແມ້ງຮຸ່ງ, ຜູ້ຊ່ຽວຊານດ້ານການເມືອງ ແລະ ພົວພັນກັບໂລກ ສະຖາບັນມະຫາວິທະຍາໄລ George Mason, ອາເມລິກາ ຊີ້ແຈ້ງວ່າ.
“ຖ້າຫາກເກີດການປະທະກັນ ຊາວປະມົງຈະບໍ່ໄດ້ຮັບປະກັນ ແລະ ຖືກເສຍຫາຍ, ສະນັ້ນມາດຕະການແກ້ໄຂຍາວນານຍັງແມ່ນສ້າງເງື່ອນໄຂເພື່ອໃຫ້ຊາວປະມົງສາມາດສືບຕໍ່ຫາປາໃນບັນດາເຂດຫາປາທີ່ມີມາແຕ່ດົນນານຂອງເຂົາເຈົ້າ. ຢາກເຮັດໄດ້ສິ່ງນັ້ນ, ຕ້ອງມີເຈດຕະນາດີ, ຮຽກຮ້ອງໃຫ້ມີຄວາມຄ່ອງແຄ້ວ ແລະ ຕ້ອງຈຳກັດຄວາມມັກໃຫຍ່ໄຝ່ສູງຫຼາຍເກີນໄປ. ຂ້າພະເຈົ້າຄິດວ່າ ຕ້ອງອີງໃສ່ກົດໝາຍສາກົນ”.