(ການນຳ 2 ປະເທດລົງນາມຖະແຫຼງການຮ່ວມ )
(vovworld) – ໂດຍໄດ້ຮັບຄຳເຊີນຂອງທ່ານປະທານປະເທດ ຫວຽດນາມ ເຈືອງເຕີ໋ນຊາງ, ທ່ານປະທານາທິບໍດີ ສ. ເບລາຣຸດ Aleksandr Lukashenko ຢ້ຽມຢາມທາງລັດຖະກິດ ຫວຽດນາມ ໃນລະຫວ່າງວັນທີ 08 - 09/12. ໃນໄລຍະຢູ່ຢ້ຽມຢາມ ຫວຽດນາມ, ທ່ານປະທານາທິບໍດີ Lukashenko ພົບປະເຈລະຈາກັບທ່ານປະທານປະເທດ ສສ ຫວຽດນາມ ເຈືອງເຕີ໋ນຊາງ, ພົບປະກັບທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູຈ້ອງ, ພົບປະກັບທ່ານນາຍົກລັດຖະມົນຕີ ຫງວຽນເຕີ່ນຢຸງ, ທ່ານປະທານສະພາແຫ່ງຊາດ ຫງວຽນຊິງຮຸ່ງ.
ເນື່ອງໃນໂອກາດນີ້, 2 ປະເທດໄດ້ອອກຖະແຫຼງການຮ່ວມ, ໃນນັ້ນ ເຫັນດີເປັນເອກະສັນເພີ່ມທະວີການພົບປະຂັ້ນສູງ, ຊຸກຍູ້ການແລກປ່ຽນຄະນະຜູ້ແທນທຸກຂັ້ນລະຫວ່າງລັດຖະບານ, ສະພາແຫ່ງຊາດ, ບັນດາທ້ອງຖິ່ນ, ບັນດາອົງການການເມືອງ - ສັງຄົມ 2 ປະເທດ, ຮັກສາບັນດາກົນໄກທາບທາມຄຳເຫັນ ເພື່ອແນໃສ່ສ້າງການພົວພັນດ້ານການເມືອງທີ່ໄວ້ເນື້ອເຊື່ອໃຈ, ເປັນພື້ນຖານເພື່ອພັດທະນາການຮ່ວມມືໃນທຸກຂົງເຂດ. 2 ຝ່າຍຢືນຢັນເຖິງ: ຄວາມສາມາດບົ່ມຊ້ອນອັນໃຫຍ່ຫລວງ ແລະ ເຫັນດີເປັນເອກະພາບພັດທະນາການຮ່ວມມືເສດຖະກິດ - ການຄ້າ ແລະ ການລົງທຶນ ກໍຄືຊຸກຍູ້ບັນດາກາລະໂອກາດໃໝ່ ຜ່ານສັນຍາການຄ້າເສລີ ຫວຽດນາມ - ພັນທະມິດ ອາຊີ - ເອີລົບ.
ຝ່າຍ ເບລາຣຸດ ຕີລາຄາສູງເລື່ອງຝ່າຍ ຫວຽດນາມ ຍົກເວັ້ນວີຊາໃຫ້ຊາວ ເບລາຣຸດ ເຂົ້າ ຫວຽດນາມ ໄລຍະສັ້ນແຕ່ວັນທີ 01/7/2015.
2 ຝ່າຍຕີລາຄາສູງ ໝາກຜົນແຫ່ງການຮ່ວມມືໃນໄລຍະຜ່ານມາ ລະຫວ່າງ ຫວຽດນາມ ແລະ ເບລາຣຸດ ຢູ່ບັນດາເວທີປາໄສຫລາຍຝ່າຍ, ຢືນຢັນວ່າ: ພ້ອມແລ້ວທີ່ຈະຮ່ວມມືຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນຢູ່ ສະຫະປະຊາຊາດ, ຂະບວນການບໍ່ຮ່ວມກຸ່ມ ແລະ ບັນດາເວທີປາໄສອື່ນໆ, ພ້ອມກັນມານະພະຍາຍາມ ເພື່ອເປົ້າໝາຍຊຸກຍູ້ການສ້າງຄວາມເປັນລະບຽບຮຽບຮ້ອຍດ້ານການເມືອງ ແລະ ເສດຖະກິດສາກົນໃຫ້ເໝາະສົມ ແລະ ຍຸຕິທຳ.
2 ຝ່າຍລ້ວນແຕ່ສະໜັບສະໜູນການແກ້ໄຂຄວາມຂັດແຍ້ງອະທິປະໄຕ, ໃນນັ້ນມີການຂັດແຍ້ງກັນຢູ່ທະເລຕາເວັນອອກ, ດ້ວຍສັນຕິວິທີຕ່າງໆ, ໂດຍບໍ່ນຳໃຊ້ກຳລັງອາວຸດ ຫລື ນາບຂູ່ນຳໃຊ້ກຳລັງອາວຸດ, ບົນພື້ນຖານບັນດາຫລັກການຂອງກົດໝາຍສາກົນ, ໃນນັ້ນ ມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982; ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ບັນລຸໄດ້ຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ ເພື່ອແນໃສ່ຮັບປະກັນຄວາມສະຫງົບປອດໄພ ແລະ ຄວາມເສລີໃນການເດີນທະເລຢູ່ທະເລຕາເວັນອອກ.