(vovworld) - ໃນຂອບເຂດກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຫວຽດນາມ ຊຸດທີ 14, ຕອນບ່າຍວັນທີ 20/10, ທ່ານ ຫງວຽນຈີ໋ຢຸງ, ລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານແຜນການຂອງລັດຖະບານກ່ຽວກັບການສ້າງໂຄງປະກອບພື້ນຖານເສດຖະກິດໄລຍະ 2016-2020. ການສ້າງໂຄງປະກອບພື້ນຖານເສດຖະກິດໄລຍະ 5 ປີຈະມາເຖິງ ເພື່ອແນໃສ່ປ່ຽນແປງໂຄງປະກອບ ແລະ ລະດັບຂອງພື້ນຖານເສດຖະກິດ, ສ້າງເປັນໂຄງປະກອບເສດຖະກິດທີ່ເໝາະສົມ ແລະ ຂະຫຍັນຂັນເຄື່ອນກວ່າ, ມີຄວາມສາມາດແກ່ງແຍ້ງສູງກວ່າ, ມີຄວາມສາມາດບົ່ມຊ້ອນເຕີບໂຕໃຫຍ່ກວ່າ ແລະ ຮັບປະກັນການເຕີບໂຕຂຽວ, ສະອາດ ແລະ ໝັ້ນຄົງ.
ບົນພື້ນຖານນັ້ນ, ແຜນການສ້າງໂຄງປະກອບພື້ນຖານເສດຖະກິດໄລຍະ 2016-2020 ໄດ້ຍົກອອກ 5 ເນື້ອໃນສ້າງໂຄງປະກອບພື້ນຖານເສດຖະກິດຈຸດສຸມ. ເພື່ອປະຕິບັດ 5 ເນື້ອໃນດັ່ງກ່າວໃຫ້ໄດ້, ແຜນການວາງອອກຫຼາຍໜ້າທີ່ຢ່າງລະອຽດ, ໃນນັ້ນມີ 10 ໜ້າທີ່ທີ່ມີລັກສະນະບຸລິມະສິດສູງ, ຄວນສຸມໃສ່ແຫຼ່ງກຳລັງເພື່ອປະຕິບັດ.
“ປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ໜູນຊ່ວຍການພັດທະນາວິສາຫະກິດເອກະຊົນນັບທັງຂັ້ນສູນກາງ ແລະ ທ້ອງຖີ່ນ; ເດັດດຽວຫັນເປັນຫຸ້ນສ່ວນ, ປັບປຸງລະບອບຄຸ້ມຄອງການລົງທຶນພາກລັດ; ຍູ້ແຮງວິວັດການແກ້ໄຂໜີ້ເສຍ; ເປີດກວ້າງຂອບຂະໜາດ, ເພີ່ມທະວີດ້ານຈຳນວນ ແລະ ປັບປຸງຄຸນນະພາບນັກລົງທຶນ, ບັນດາຜະລິດຕະພັນສິນຄ້າ; ຍົກສູງປະສິດທິຜົນການເຄື່ອນໄຫວຂອງຕະຫຼາດຫຼັກຊັບ, ຕະຫຼາດທະນາບັດ ແລະ ຕະຫຼາດປະກັນໄພ…“.
ຄາດຄະເນວ່າ, ແຫຼ່ງກຳລັງເພື່ອປະຕິບັດແຜນການສ້າງໂຄງປະກອບພື້ນຖານເສດຖະກິດໄລຍະ 2016-2020 ແມ່ນປະມານ 10.567.000 ຕື້ດົ່ງ. ບັນດາສະມາຊິກສະພາແຫ່ງຊາດຈະປຶກສາຫາລື ແຜນການສ້າງໂຄງປະກອບພື້ນຖານເສດຖະກິດໄລຍະ 2016-2020 ຢູ່ຕາມໜ່ວຍໃນວັນທີ 22/10 ຈະມາເຖິງ.
ແລະກໍ່ໃນຕອນບ່າຍວັນທີ 20/10, ສະພາແຫ່ງຊາດກໍ່ຮັບຟັງບົດລາຍງານກ່ຽວກັບແຜນການການເງິນໄລຍະ 5 ປີ; ບົດລາຍງານກ່ຽວກັບຄາດໝາຍ, ທິດທາງລະດົມ, ນຳໃຊ້ທຶນກູ້ຢືມ ແລະ ຄຸ້ມຄອງໜີ້ສາທາລະນະ ໄລຍະ 2016-2020; ແຜນການລົງທຶນພາກລັດໄລຍະ 2016-2020 ແລະ ບັນດາບົດລາຍງານກວດກາບັນດາເນື້ອໃນດັ່ງກ່າວ.