(vovworld) – ຕອນເຊົ້າວັນທີ 6/5, ຢູ່ນະຄອນ ໂຮ່ຈີມິນ, ກຳມາທິການເສດຖະກິດ - ສະພາແຫ່ງຊາດ ຫວຽດນາມ ຊຸດທີ 13 ໄດ້ດຳເນີນວາລະປະຊຸມຄົບຄະນະຄັ້ງທີ 10. ໃນ 2 ວັນດຳເນີນວາລະປະຊຸມ, ກຳມະທິການ ເສດຖະກິດຈະປະກອບຄຳເຫັນໃສ່ຮ່າງກົດໝາຍ 4 ສະບັບນັ້ນແມ່ນ: ຮ່າງກົດໝາຍວ່າດ້ວຍວິສາຫະກິດ (ສະບັບປັບປຸງ), ຮ່າງກົດໝາຍວ່າດ້ວຍການລົງທຶນ (ສະບັບປັບປຸງ), ຮ່າງກົດໝາຍວ່າດ້ວຍການຄຸ້ມຄອງ, ນຳໃຊ້ແຫຼ່ງທຶນຂອງລັດເຂົ້າໃນການລົງທຶນ, ຜະລິດ ດຳເນີນທຸລະກິດ, ຮ່າງກົດໝາຍວ່າດ້ວຍການດຳເນີນທຸລະກິດອະສັງຫະລິມະຊັບ (ສະບັບປັບປຸງ). ປະກອບຄຳເຫັນໃສ່ຮ່າງກົດໝາຍວ່າດ້ວຍວິສາຫະກິດ (ສະບັບປັບປຸງ), ບັນດາສະມາຊິກສະພາແຫ່ງຊາດຖືວ່າ: ກົດໝາຍວ່າດ້ວຍວິສາຫະກິດ ໄດ້ຮັບການປັບປຸງພ້ອມກັບບັນດາກົດໝາຍສະບັບອື່ນທີ່ກ່ຽວຂ້ອງຄື: ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍອະສັງຫະລິມະຊັບ... ເພື່ອແນໃສ່ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ຮັບໃຊ້ການພັດທະນາ ຂອງວິສາຫະກິດໂດຍກົງ. ກົດໝາຍວ່າດ້ວຍວິສາຫະກິດ (ສະບັບປັບປຸງ) ຄັ້ງນີ້ໄດ້ອີງໃສ່ບົນພື້ນຖານຕົວຈິງ ດ້ວຍບັນດາບັນຫາເກີດຂຶ້ນໃໝ່, ເຕື້ອງເຖິງບັນດາຄວາມເຄັ່ງຮ້ອນ, ສິ່ງຄົງຄ້າງ, ຈາກນັ້ນມີຂໍ້ກຳນົດລະອຽດກ່ວາອີກ, ເພີ່ມເຕີມ, ປັບປຸງ ໃຫ້ເໝາະສົມ. ບັນດາສສຊ ຍັງປະກອບຄຳເຫັນວ່າ: ມີຫຼາຍບ່ອນຕ້ອງພິຈາລະນາ, ດັດປັບໃນຮ່າງກົດໝາຍສະບັບນີ້. ໃນນັ້ນ, ສຳຄັນທີ່ສຸດແມ່ນຮ່າງກົດໝາຍວ່າດ້ວຍວິສາຫະກິດ (ສະບັບປັບປຸງ) ຄວນລົບລ້າງພາກເວົ້າເຖິງລັດວິສາຫະກິດ ເພື່ອຫຼີກລ້ຽງການຈຳແນກປະພຶດ, ຮັບປະກັນລັກສະນະສະເໝີພາບ, ເສລີພາບໃນການແກ່ງແຍ້ງລະຫວ່າງບັນດາກຸ່ມວິສາຫະກິດ.