(vovworld) - ຕອນເຊົ້າວັນທີ 23 ສິງຫາ, ຢູ່ນະຄອນດ່ານັ້ງ, ກະຊວງກໍ່ສ້າງ ແລະ ຄະນະກຳມະການປະຊາຊົນນະຄອນດ່ານັ້ງ ໄດ້ຈັດກອງປະຊຸມສຳມະນາທົ່ວປະເທດເພື່ອ ປະກອບຄຳເຫັນໃສ່ຮ່າງກົດໝາຍວ່າດ້ວຍເຮືອນຢູ່ ແລະ ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ (ສະບັບປັບປຸງ). ຮ່າງກົດໝາຍວ່າດ້ວຍເຮືອນຢູ່ ແລະ ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ (ສະບັບປັບປຸງ) ໄດ້ຮັບການສ້າງບົນພື້ນຖານໝາກຜົນຂອງການຕີລາຄາ, ສະຫຼຸບການປະຕິບັດຂອງ 2 ກົດໝາຍພວມປະກາດໃຊ້ ໂດຍກະຊວງກໍ່ສ້າງຮຽບຮຽງ. ຮ່າງກົດໝາຍວ່າດ້ວຍເຮືອນຢູ່ (ສະບັບປັບປຸງ) ມີ 12 ພາກ 186 ມາດຕາ, ໃນນັ້ນມີບາງເນື້ອໃນໃໝ່ໄດ້ຮັບການປັບປຸງຄື: ບັນຫາກຳມະສິດ, ນະໂຍບາຍເຮືອນຢູ່; ຂໍ້ກຳນົດກ່ຽວກັບເຮືອນຢູ່ ຢູ່ຫວຽດນາມ ຂອງຊາວຫວຽດນາມ ອາໄສຢູ່ຕ່າງປະເທດ ແລະ ບັນດາອົງການສ່ວນບຸກຄົນອາໄສຢູ່ຕ່າງປະເທດ... ກ່າວຄຳເຫັນທີ່ກອງປະຊຸມສຳມະນາ, ທ່ານຮອງລັດຖະມົນຕີກະຊວງກໍ່ສ້າງ ຫງວຽນເຈີນນາມ ໃຫ້ຮູ້ວ່າ.
“ເລື່ອງປັບປຸງຮ່າງກົດໝາຍ 2 ສະບັບດັ່ງກ່າວ ແມ່ນເພື່ອແນໃສ່ສ້າງກອບກົດໝາຍເພື່ອໃຫ້ລັດມີກົນໄກ, ນະໂຍບາຍຊ່ວຍເຫຼືອກ່ຽວກັບເຮືອນຢູ່ ໃຫ້ແກ່ເປົ້າໝາຍທີ່ມີລາຍຮັບຕໍ່າ, ນະໂຍບບາຍສັງຄົມ, ຄອບຄົວທຸກຍາກ, ປະກອບສ່ວນຮັບປະກັນຊີວິດສັງຄົມ. ພ້ອມທັງຈຳກັດການພັດທະນາເຮືອນຢູ່ຕາມຂະບວນການ, ບໍ່ປະຕິບັດຕາມແຜນກຳນົດ, ແຜນການຄືໃນໄລຍະຜ່ານມາ”.