(vovworld) – ວັນທີ 12/07, ຢູ່ Hague, ປະເທດໂຮນລັງ, ນັກສຶກສາຫວຽດນາມ ພວມຮໍ່າຮຽນ ຢູ່ໂຮນລັງ ແລະ ປະຊາຄົມຊາວຫວຽດນາມ ໄດ້ຈັດຕັ້ງການເດີນຂະບວນຄັດຄ້ານຈີນ. ນີແມ່ນຄັ້ງທີ 2, ທີ່ປະຊາຄົມຊາວຫວຽດນາມ ອາໄສຢູ່ໂຮນລັງ ຈັດຕັ້ງການເຄື່ອນໄຫວດັ່ງກ່າວນັບແຕ່ຈີນ ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ຄະນະເດີນຂະບວນຮຽກຮ້ອງໃຫ້ຈີນ ຈົ່ງເຄົາລົບສົນທິສັນຍາກ່ຽວກັບກົດໝາຍວ່າດ້ວຍທະເລຂອງສະຫະປະຊາຊາດ, ຖອນຮ້ານເຈາະນ້ຳມັນອອກຈາກເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ຄະນະຊາວຫວຽດນາມ ກໍ່ແຈກຢາຍໃບປິວກວ່າ 500 ໃບ ທີ່ກ່າວປະນາມບັນດາການກະທຳລ່ວງລ້ຳຂອງຈີນ, ຢັ້ງຢືນໝູ່ເກາະຮ່ວາງຊາ ແລະ ເຈື່ອງຊາ ແມ່ນຂອງຫວຽດນາມ. ປະຊາຄົມຊາວຫວຽດນາມ ແລະ ເພື່ອນມິດສາກົນເຂົ້າຮ່ວມການເດີນຂະບວນກໍ່ໄດ້ລົງລາຍເຊັນໃສ່ໃບຄຳຮ້ອງຄັດຄ້ານຈີນ, ສົ່ງເຖິງສະຖານທູດຈີນ ປະຈຳໂຮນລັງ.
ແລະກໍ່ໃນວັນດຽວກັນ, ມີຊາວຫວຽດນາມ ກວ່າ 200 ຄົນທີ່ພວມດຳລົງຊີວິດ, ຮໍ່າຮຽນ ແລະ ເຮັດວຽກຢູ່ Hiroshima ແລະ ບັນດາແຂວງໃຫ້ຄຽງ, ເພື່ອນມິດຍີ່ປຸ່ນ, ຟີລິບປີນ, ໄທ ທີ່ຮັກຫອມສັນຕິພາບ ໄດ້ລົງຖະໜົນເດີນຂະບວນສັນຕິພາບເພື່ອຄັດຄ້ານຈີນ ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ຊາວຫວຽດນາມ ແລະ ເພື່ອມມິດສາກົນໄດ້ຮ້ອງໂຮ່ບັນດາຄຳຂວັນຮຽກຮ້ອງຈີນ ຖອນຮ້ານເຈາະນ້ຳມັນໄຮຢາງ 981 ອອກຈາກເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ; ສະເໜີໃຫ້ຈີນ ເຄົາລົບອະທິປະໄຕຂອງຫວຽດນາມ ແລະ ກົດໝາຍສາກົນ; ກ່າວປະນາມບັນດາການກະທຳທີ່ບັງອາດຂອງກຳປັ່ນຈີນ ຕໍາກຳປັ່ນຂອງຫວຽດນາມ ໃຫ້ຈົມນ້ຳ ແລະ ເຮັດໃຫ້ກຳປັ່ນປະຕິບັດກົດໝາຍຂອງຫວຽດນາມ ຖືກເປ່ເພ. ບັນດາຜູ້ເຂົ້າຮ່ວມການແຫ່ຂະບວນປະທ້ວງໄດ້ສະນັບສະໜູນຈຳນວນເງິນ 15 ລ້ານດົງໃຫ້ບັນດາຄອບຄົວເຈົ້າຂອງກຳປັ່ນຢູ່ດ່ານັ້ງ ຖືກກຳປັ່ນຂອງຈີນ ຕຳໃຫ້ຈົມນ້ຳ.
ໃນຂະນະນັ້ນ, ວັນທີ 13/07 ຢູ່ນະຄອນຫຼວງວຽງຈັນ, ປະເທດລາວ, ປະຊາຄົມຊາວຫວຽດນາມ ອາໄສຢູ່ລາວ ໄດ້ຈັດພິທີພາວະນາຂໍໃຫ້ປະເທດຫວຽດນາມ ຄົບຖ້ວນໄປດ້ວຍພືນແຜ່ນດິນ ແລະ ອະທິປະໄຕ. ພາຍຫຼັງພິທີພາວະນາ, ທຸກຄົນໄດ້ສະໜັບສະໜູນເງິນໃຫ້ຊາວປະມົງ, ກຳລັງຕຳຫຼວດທະເລ ແລະ ກຳລັງກວດກາການປະມົງ.