ປະຊາຄົມຊາວຫວຽດນາມ ໃນທົ່ວໂລກສືບຕໍ່ຄັດຄ້ານ ການກະທຳລ່ວງລະເມີດ ອະທິປະໄຕເຂດທະເລຂອງຫວຽດນາມ
ຮ້ານນເຈາະນ້ຳມັນຂອງຈີນນຳເຂົ້າເຂດທະເລຫວຽດນາມຢ່າງຜິດກົດໝາຍ
(ພາບປະກອບ)
(vovworld)- 10 ສະມາຄົມ/ຄະນະຫວຽດນາມ ຢູ່ຝະລັ່ງ ຫາກໍ່ອອກຖະແຫຼງການຮ່ວມຄັດຄ້ານບັນດາການກະທຳຂອງຈີນ ທີ່ໄດ້ຕັ້ງຮ້ານເຈາະນ້ຳມັນຢ່າງຜິດກົດໝາຍໃນເຂດທະເລຂອງຫວຽດນາມ. ຖະແຫຼງການຊີ້ແຈ້ງວ່າ: “ການກະທຳພຽງລຳພັງຝ່າຍດຽວນີ້ຂອງຈີນ ໄດ້ລະເມີດອະທິປະໄຕຂອງຫວຽດນາມ ຢ່າງຮ້າຍແຮງ; ນາບຂູ່ເຖິງຄວາມສະຫງົບປອດໄພໃນພາກພື້ນ; ລະເມີດຫຼັກການແກ້ໄຂບັນດາການພິພາດຢູ່ທະເລຕາເວັນອອກໂດຍສັນຕິວິທີ“. ບັນດາສະມາຄົມ/ຄະນະຫວຽດນາມ ຢູ່ຝະລັ່ງ ຮຽກຮ້ອງໃຫ້ປະຊາຄົມໂລກ, ພິເສດແມ່ນບັນດາປະເທດພວມມີຖະແຫຼງການອະທິປະໄຕຢູ່ທະເລຕາເວັນອອກຈົ່ງອອກສຽງຄັດຄ້ານການກະທຳເກາະຜິດ ແລະ ຮຸກຮານຂອງອຳນາດການປົກຄອງຈີນ. ຮອງສາດສະດາຈານ- ດຣ ຫງວຽນດຶກເຄືອງ, ປະທານສະມາຄົມຜູ້ຊ່ຽງຊານຫວຽດນາມ ປະຈຳຝະລັ່ງ ໃຫ້ຮູ້ວ່າ:
“ໃນຊຸມມື້ຜ່ານມາ, ສະມາຊິກທຸກຄົນລ້ວນແຕ່ມຸ້ງໄປເຖິງຫວຽດນາມ, ຕິດຕາມຂ່າວຄາວກໍ່ຄືຄຳປະກາດຢ່າງເປັນທາງການຂອງລັດຫວຽດນາມ ທີ່ມີຕໍ່ການກະທຳຮຸກຮານຂອງຈີນ. ພວກຂ້າພະເຈົ້າໄດ້ພ້ອມກັນລົງລາຍເຊັນໃນຖະແຫຼງການຮ່ວມຂອງບັນດາສະມາຄົມ/ຄະນະຊາວຫວຽດນາມ ອາໄສຢູ່ຝະລັ່ງ ຄັດຄ້ານບັນດາການກະທຳຜິດພາດທີ່ໄປຝືນກັບທຸກໆຫຼັກການມິດຕະພາບ, ການປະພຶດໂດຍພື້ນຖານ, ລະເມີດກົດໝາຍສາກົນ ແລະ ໄດ້ຕັ້ງໜ້າຂົນຂວາຍບັນດາຄູ່ຮ່ວມມືຂອງສະມາຄົມຢູ່ຝະລັ່ງ ແລະ ໃນໂລກ, ນຳສຽງເວົ້າຂອງປະຊາຊົນເຖິງວົງການຂ່າວສານ ຜ່ານນັ້ນຂົນຂວາຍເພື່ອນມິດສາກົນສະໜັບສະໜູນ ແລະ ຊ່ວຍເຫຼືອຫວຽດນາມ ໃນການຕໍ່ສູ້ດ້ານນິຕິກຳ ເພື່ອໃຫ້ຈີນ ຢຸດຕິບັນດາການກະທຳກໍ່ຄວາມວຸ້ນວາຍບົນທະເລຕາເວັນອອກ“.
ວັນທີ 12/5, ຄະນະຕິດຕໍ່ພົວພັນປະຊາຄົມຊາວຫວຽດນາມ ຢູ່ສິງປະໂປ ໄດ້ຝາກຈົດໝາຍເຖິງບັນດາການນຳຫວຽດນາມ, ສະແດງຄວາມໂກດແຄ້ນຕໍ່ການກະທຳເປີດແປນຂອງຈີນ ຊື່ງໄດ້ຕັ້ງຮ້ານເຈາະນ້ຳມັນໄຮຢາງ 981 ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ພ້ອມທັງຢັ້ງຢືນວ່າ: ປະຊາຄົມຊາວຫວຽດນາມ ຢູ່ສິງປະໂປ ພ້ອມແລ້ວທີ່ຈະກັບເມືອປະເທດ, ພ້ອມກັບປະຊາຊົນປະກອບສ່ວນສ້າງສາ ແລະ ປົກປັກຮັກສາປະເທດຊາດ.
ສະມາຄົມຊາວໜຸ່ມ - ນັກສຶກສາ ຫວຽດນາມ ຢູ່ ອາເມລິກາ ຄັດຄ້ານຢ່າງຮຸນແຮງຕໍ່ເລື່ອງ ຈີນ ລ່ວງລ້ຳອະທິປະໄຕເຂດນ່ານທະເລຂອງ ຫວຽດນາມ, ຮຽກຮ້ອງບັນດານັກສຶກສາ ຫວຽດນາມ ຢູ່ ອາເມລິກາ ເວົ້າສະເພາະ ແລະ ໃນທົ່ວໂລກເວົ້າລວມຈົ່ງກາຍເປັນນັກການທູດສື່ຂ່າວໃຫ້ແກ່ເພື່ອນມິດສາກົນຮູ້ກ່ຽວກັບເລື່ອງ ຈີນ ລວງລ້ຳອະທິປະໄຕເຂດນ່ານທະເລຂອງ ຫວຽດນາມ. ຖະແຫຼງການສື່ມວນຊົນໃນໜ້າເວັບ http://www.sinhvienusa.org ຂອງສະມາຄົມຊາວໜຸ່ມ - ນັກສຶກສາ ຫວຽດນາມ ຢູ່ ອາເມລິກາ ເນັ້ນໜັກວ່າ: “ ພວກຂ້າພະເຈົ້າເປັນຊາວ ຫວຽດນາມ ທີ່ຮັກຫອມສັນຕິພາບ, ເຄົາລົບສົນທິສັນຍາສາກົນ ແລະ ຍາມໃດກໍ່ປາດຖະໜາຢາກຮັກສາສາຍພົວພັນມິດຕະພາບກັບ ຈີນ. ແຕ່ວ່າ, ຕໍ່ໜ້າບັນດາການກະທຳລະເມີດຂອງ ຈີນ, ສະມາຄົມຊາວໜຸ່ມ - ນັກສຶກສາ ຫວຽດນາມ ຊຶ່ງແມ່ນອົງການຈັດຕັ້ງຂອງຊາວໜຸ່ມ - ນັກສຶກສາ ຫວຽດນາມ ຢູ່ ອາເມລິກາ ຢ່າງເປັນທາງການ, ຖະແຫຼງຄັດຄ້ານຢ່າງຮຸນແຮງ ແລະ ຮຽກຮ້ອງປະຊາຊົນໃນທົ່ວໂລກ, ໃນນັ້ນມີປະຊາຊົນ ຈີນ ແລະ ປະຊາຊົນ ອາເມລິກາ ຜູ້ຮັກຫອມສັນຕິພາບພ້ອມກັນອອກສຽງຄັດຄ້ານການກະທຳຂອງ ຈີນ ແລະ ຮຽກຮ້ອງ ປັກກິ່ງ ຫຼຸດຜ່ອນການປີນຂັ້ນໄດຄວາມເຄັ່ງຕຶງ, ຢຸດຕິບັນດາຄວາມຮຽກຮ້ອງທວງເອົາອະທິປະໄຕຢູ່ເຂດທະເລທີ່ຜິດພາດເພື່ອຄວາມໝັ້ນຄົງໃນພາກພື້ນ.