(ຊາວ ຫວຽດນາມ ຢູ່ ໂຮນລັງ ສະແດງສິລະປະ)
(vovworld) - ສະຖານທູດ ຫວຽດນາມ ປະຈຳ La Hay ປະເທດ ໂຮນລັງ ຫາກໍ່ຈັດງານຕ້ອນຮັບປີໃໝ່ປະຈຳຊາດປີວອກ 2016 ຢ່າງມີຄວາມເບີກບານມ່ວນຊື່ນ, ດ້ວຍການເຂົ້າຮ່ວມຂອງປະຊາຊົນຊາວ ຫວຽດນາມ ອາໄສຢູ່ຕ່າງປະເທດ, ນັກຮຽນ, ນັກສຶກສາທີ່ພວມຮ່ຳຮຽນ ແລະ ເຮັດວຽກຢູ່ ໂຮນລັງປະມານ 600 ຄົນ ແລະພ້ອມກັບເພື່ອນມິດ ໂຮນລັງ ທີ່ສະໜິດຕິດພັນ ກັບ ຫວຽດນາມ ຈຳນວນໜຶ່ງ. ກ່າວຄຳເຫັນທີ່ພິທີ, ທ່ານ ຫງວຽນວັນດ່ວານ ເອກອັກຄະລັດຖະທູດ ຫວຽດນາມ ປະຈຳ ໂຮນລັງ ຕີລາຄາສູງບັນດາການປະກອບສ່ວນຢ່າງຕັ້ງໜ້າຂອງພໍ່ແມ່ປະຊາຊົນຊາວ ຫວຽດນາມ ອາໄສຢູ່ ໂຮນລັງ ທີ່ມີຕໍ່ການພັດທະນາເສດຖະກິດ - ສັງຄົມຂອງປະເທດ ໂຮນລັງ ກໍ່ຄືມີຕໍ່ພາລະກິດສ້າງສາ ແລະ ພັດທະນາບ້ານເກີດເມືອງນອນ, ປະກອບສ່ວນເພີ່ີມທະວີການພົວພັນມິດຕະພາບ ແລະ ການຮ່ວມມືລະຫວ່າງ 2 ປະເທດ ຫວຽດນາມ ແລະ ໂຮນລັງ.
ສະຖານທູດ ຫວຽດນາມ ປະຈຳສະຫະພັນ ເມັກຊິກໂກ ກໍໄດ້ຈັດພິທີຕ້ອນຮັບບຸນເຕັດປີວອກ 2016 ແລະ ອວຍພອນກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກ, ສົມທົບກັບບັນດາການເຄື່ອນໄຫວໂຄສະນາດ້ານອາຫານການກິນ, ງານວາງສະແດງຮູບພາບກ່ຽວກັບປະເທດຊາດ ແລະ ຊາວ ຫວຽດນາມ. ທີ່ພິທີ, ທ່ານນາງ ເລລີງລານ ເອກອັກຄະລັດຖະທູດ ຫວຽດນາມ ປະຈຳ ເມັກຊິກໂກ ໄດ້ຫວນຄືນບັນດາຜົນງານຍິ່ງໃຫຍ່ຂອງ ຫວຽດນາມ ໃນວິວັດການເຊື່ອມໂຍງເຂົ້າກັບພາກພື້ນ ແລະ ສາກົນ, ພິເສດແມ່ນໄດ້ເນັ້ນໜັກເຖິງ: ລະດັບເຕີບໂຕ GDP ຂອງ ຫວຽດນາມ ບັນລຸເກືອບ 6,7%, ເຊິ່ງແມ່ນລະດັບສູງສຸດໃນຮອບ 5 ປີຜ່ານມາ ໂດຍບໍ່ຫົວຊາຕໍ່ບັນດາຄວາມຫຍຸ້ງຍາກຂອງເສດຖະກິດໃນທົ່ວໂລກ.
ວັນທີ 26/01, ສະຖານທູດ ຫວຽດນາມ ປະຈຳ ສາທາລະນະລັດ ສະຫະພັນ ເຢຍລະມັນ ໄດ້ສົມທົບກັບກົມຮ່ວມມືສາກົນຂຶ້ນກັບກະຊວງວັດທະນະທຳ, ກິລາ ແລະ ທ່ອງທ່ຽວ ແລະ ໂຮງລະຄອນ ໄວໜຸ່ມ ຈັດຕັ້ງລາຍການສະແດງສິລະປະ ເພື່ອຕ້ອນຮັບບຸນປີໃໝ່ປະຈຳຊາດປີວອກ ແລະ ຮັບໃຊ້ໃຫ້ປະຊາຊົນຊາວ ຫວຽດນາມ ອາໄສຢູ່ເຢຍລະມັນ.