ທ່ານຮອງນາຍົກລັດຖະມົນຕີ ຈິ້ງດິ່ງຢຸ໊ງ ໄດ້ໃຫ້ການຕ້ອນຮັບປະທານກອງທຶນຮ່ວມມືພັດທະນາເສດຖະກິດ ສ. ເກົາຫຼີ (EDCF), ປະທານສະມາຄົມມິດຕະພາບ ສ. ເກົາຫຼີ - ຫວຽດນາມ (KOVIFA) ແລະ ປະທານ, ຮອງປະທານບາງກຸ່ມບໍລິສັດເສດຖະກິດໃຫຍ່ຂອງ ສ. ເກົາຫຼີ ຄື: Huyndai Motor, Lotte, CJ, Hyosung,GS.

        ທີ່ການຕ້ອນຮັບປະທານກອງທຶນ EDCF, ທ່ານຮອງນາຍົກລັດຖະມົນຕີ ຈິ້ງດິ່ງຢຸ໊ງ ສະເໜີໃຫ້ສອງຝ່າຍສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍບ້ວງເງິນໜູນຊ່ວຍການພັດທະນາ 1,5 ຕື້ USD ໃນໄລຍະ 2016 -2020 ຢ່າງມີປະສິດທິຜົນ. ທ່ານປະທານກອງທຶນ EDCF ໃຫ້ຮູ້ວ່າ ໃນໄລຍະຈະມາເຖິງ, ນອກຈາກເລື່ອງສົມທົບກັນຜັນຂະຫຍາຍບັນດາໂຄງການ ODA ແລ້ວ, ກອງທຶນຈະຊຸກຍູ້ການໜູນຊ່ວຍບັນດາບ້ວງສິນເຊື່ອບູລິມະສິດໃຫ້ແກ່ບັນດາວິສາຫະກິດ ຫວຽດນາມ ແລະ ສ. ເກົາຫຼີ ເພື່ອປະຕິບັດບັນດາໂຄງການຄູ່ຮ່ວມມືພາກລັດ - ພາກເອກະຊົນ ຢູ່ ຫວຽດນາມ.

        ທີ່ການຕ້ອນຮັບທ່ານ Choi Young Joo, ປະທານສະມາຄົມມິດຕະພາບ ສ. ເກົາຫຼີ - ຫວຽດນາມ, ທ່ານຮອງນາຍົກລັດຖະມົນຕີ ຈິ້ງດິ່ງຢຸ໊ງ ສະເໜີທ່ານປະທານສະມາຄົມ, ພ້ອມທັງເປັນນັກທຸລະກິດທີ່ປະສົບຜົນສຳເລັດຢູ່ ຫວຽດນາມ, ສົ່ງເສີມບັນດາວິສາຫະກິດ ສ. ເກົາຫຼີ ເປີດກວ້າງການເຄື່ອນໄຫວ, ຊອກຮູ້ກາລະໂອກາດລົງທຶນເຂົ້າໃນຂະແໜງກະສິກຳ ແລະ ບັນດາຂົງເຂດໃໝ່ທີ່ມີຄວາມສາມາດບົ່ມຊ້ອນຫຼາຍຢ່າງ; ສະເໜີສະມາຄົມສືບຕໍ່ເອົາໃຈໃສ່, ໜູນຊ່ວຍປະຊາຄົມຊາວ ຫວຽດນາມ ທີ່ອາໄສຢູ່ ສ. ເກົາຫຼີ.

        ທີ່ການຕ້ອນຮັບການນຳບັນດາວິສາຫະກິດ ສ. ເກົາຫຼີ, ທ່ານຮອງນາຍົກລັດຖະມັນຕີ ຈິ້ງດິ່ງຢຸ໊ງ ຢັ້ງຢືນວ່າ ລັດຖະບານ ຫວຽດນາມ ຈະສືບຕໍ່ປັບປຸງສະພາບແວດລ້ອມແຫ່ງການດຳເນີນທຸລະກິດ, ສ້າງເງື່ອນໄຂສະດວກໃຫ້ບັນດານັກລົງທຶນຕ່າງປະເທດ, ໃນນັ້ນ ມີ ສ. ເກົາຫຼີ. ບັນດາວິສາຫະກິດ ສ. ເກົາຫຼີ ກໍຢັ້ງຢືນວ່າ ຈະສືບຕໍ່ເປີດກວ້າງການລົງທຶນຢູ່ ຫວຽດນາມ ໃນບັນດາຂົງເຂດພັດທະນາພື້ນຖານໂຄງລ່າງ, ການບໍລິການພາລາທິການ, ອຸດສາຫະກຳປຸງແຕ່ງ, ລົດໂອໂຕ…