ພາບປະກອບ
|
(vovworld) – ວັນທີ 6/3, ສະຫະພາບ ເອີລົບ (ອີຢູ) ກ່າວປະນາມ ສປປ ເກົາຫຼີ ຍິງລູກສອນໄຟນຳວິຖີ 4 ລູກໃນວັນດຽວກັນ, ພ້ອມທັງໃຫ້ຮູ້ວ່າ: ອີຢູ ຈະທາບທາມຄວາມເຫັນກັບ ຍີ່ປຸ່ນ ແລະ ບັນດາຄູ່ຮ່ວມມືສາກົນກ່ຽວກັບບັນດາວິທີການຮັບມືກັບການກະທຳຂອງ ພຽງຢາງ. ຜູ້ຕາງໜ້າ ອີຢູ ຖືວ່າ: ພຽງຢາງ ຕ້ອງກັບຄືນສູ່ການໂອ້ລົມສົນທະນາກັບປະຊາຄົມໂລກ ແລະ ຢຸດຕິບັນດາແຜນການຍິງລູກສອນໄຟຄືແນວນັ້ນໃນອະນາຄົດໂດຍທັນທີ.
ຈາກນະຄອນຫຼວງ ປາຣີ, ກະຊວງການຕ່າງປະເທດ ຝຣັ່ງ ກໍ່ໄດ້ກ່າວປະນາມເລື່ອງ ສປປ ເກົາຫຼີ ຍິງລູກສອນໄຟ, ພ້ອມທັງໃຫ້ຮູ້ວ່າ ປາຣີ ຈະທາບທາມຄວາມເຫັນຂອງບັນດາສະມາຊິກຈາກສະພາຄວາມໝັ້ນຄົງ ສປຊ ກ່ຽວກັບບັນຫານີ້.
ແລະກໍ່ໃນວັນດຽວກັນ, ຈີນ ກໍ່ໄດ້ກ່າວປະນາມຕຳນິຕິຕຽນການກະທຳດັ່ງກ່າວຂອງ ພຽງຢ່າງ, ແຕ່ຖືວ່າ ສ. ເກົາຫຼີ ແລະ ອາເມລິກາ ຕ້ອງຮັບຜິດຊອບສ່ວນໃດສ່ວນໜຶ່ງກ່ຽວກັບເຫດການດັ່ງກ່າວ. ໂຄສົກຂອງວັງ Kremlin ທ່ານ Dmitry Peskov ໃຫ້ຮູ້ວ່າ: ມົດສະກູ ມີຄວາມວິຕົກວັງວົນທີ່ສຸດກ່ຽວກັບບັນດາເຫດທົດລອງ ລູກສອນໄຟ ຫວ່າງແລ້ວນີ້ຂອງ ສປປ ເກົາຫຼີ.
ໃນຂະນະນັ້ນ, ສຳນັກຂ່າວສານ Yonhap ຂອງ ສ. ເກົາຫຼີ ໄດ້ຄັດສະເໜີຄຳເວົ້າຂອງເຈົ້າໜ້າທີ່ກະຊວງການຕ່າງປະເທດ ຂອງປະເທດນີ້ໂດຍຖືວ່າ: ປະຈຸບັນ, ມີ 3 ປະເທດເຊິ່ງລວມມີ ສ. ເກົາຫຼີ, ອາເມລິກາ ແລະ ຍີ່ປຸ່ນ ພວມຕັ້ງໜ້າປຶກສາຫາລືກັບບັນດາປະເທດ ສະມາຊິກ ສປຊ ກ່ຽວກັບມາດຕະການຮັບມືກັບການກະທຳຍິງລູກສອນໄຟຂອງ ສປປ ເກົາຫຼີ.