ທ່ານນາຍົກລັດຖະມົນຕີ ຫງວຽນເຕີ໋ນຢຸງ ແລະ
ປະທານອົງການຮ່ວມມືສາກົນ ສເກົາຫຼີ
(ພາບ: VGP/NhatBac)
(vovworld) - ວັນທີ 30/11, ເນື່ອງໃນໂອກາດເຂົ້າຮ່ວມກອງປະຊຸມ COP 21, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ມີການພົບປະສອງຝ່າຍກັບບັນດາການນຳຂອງ 24 ປະເທດເຊັ່ນ: ອັງກິດ, ເຢັຍລະມັນ, ຍີ່ປຸ່ນ, ສເກົາຫຼີ, ອິນໂດເນເຊຍ, ບຣາຊິນ, ຮອນລັງ, ອົດຕະລິດ, ນອກແວ, ແຟງລັງ, ຈີເລ, ອີຣານ, ໄທ, ກູບາ, ກຳປູເຈຍ, ຟິລິບປິນ, ຢູແກຼນ, ສໂລເວເນຍ, ອານເຊຣີ, ບຸນກາຣີ, ອີຕາລີ, ປານາມາ, ນິວຊີແລນ ແລະ ລາດເວຍ.
ທີ່ການພົບປະ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຢືນຢັນນະໂຍບາຍສະເໝີຕົ້ນສະເໝີປາຍຂອງ ຫວຽດນາມໃນການຊຸກຍູ້, ເພີ່ມທະວີການພົວພັນມິດຕະພາບ ແລະ ການຮ່ວມມືຢ່າງແທດຈິງ, ນັບມື້ນັບເລິກເຊິ່ງ ມີປະສິດທິຜົນກັບທຸກປະເທດ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ສະເໜີປະເທດຕ່າງໆສືບຕໍ່ສະຫງວນໃຫ້ ຫວຽດນາມການໜູນຊ່ວຍໃນໄລຍະຍາວ, ແທດຈິງໃນພາລະກິດສ້າງສາ ແລະ ພັດທະນາປະເທດຊາດໃນໄລຍະຈະມາເຖິງ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ກໍ່ສະເໜີບັນດາມາດຕະການລະອຽດ ເພື່ອແນໃສ່ເພີ່ມທະວີການພົວພັນຮ່ວມມືຫຼາຍດ້ານກັບປະເທດຕ່າງໆ; ພ້ອມທັງສະເໜີບັນດາປະເທດຄູ່ຮ່ວມມືສືບຕໍ່ສົມທົບກັນຢ່າງແໜ້ນແຟ້ນກັບ ຫວຽດນາມຢູ່ບັນດາເວທີປາໄສຫຼາຍຝ່າຍ, ສະໜັບສະໜູນການສະໝັກເລືອກຕັ້ງເຂົ້າບັນດາອົງການສຳຄັນຂອງສະຫະປະຊາຊາດ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຢືນຢັນວ່າ, ຫວຽດນາມຈະສືບຕໍ່ເສີມຂະຫຍາຍບົດບາດເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ, ເປັນເຈົ້າການປະກອບສ່ວນຢ່າງຕັ້ງໜ້າເຂົ້າໃນການຮັກສາສະພາບແວດລ້ອມສັນຕິພາບ, ສະຖຽນລະພາບ, ການຮ່ວມມືເພື່ອພັດທະນາຢູ່ພາກພື້ນ ແລະ ຢູ່ໃນໂລກ; ຮຽກຮ້ອງເພື່ອນມິດສາກົນສະໜັບສະໜູນຫຼັກໝັ້ນຂອງອາຊຽນ ແລະ ຫວຽດນາມທີ່ກ່ຽວຂ້ອງເຖິງທະເລຕາເວັນອອກ.
ການນຳປະເທດຕ່າງໆຢືນຢັນຖືເປັນສຳຄັນ ແລະ ປາຖະໜາຢາກຊຸກຍູ້, ເພີ່ມທະວີການພົວພັນມິດຕະພາບ ແລະ ການຮ່ວມມືຫຼາຍດ້ານກັບຫວຽດນາມ. ບັນດາການນຳໃຫ້ຄຳໝັ້ນສັນຍາສືບຕໍ່ສະໜັບສະໜູນ, ຊ່ວຍເຫຼືອ ຫວຽດນາມໃນພາລະກິດພັດທະນາປະເທດຊາດ ແລະ ຮັບມືກັບການປ່ຽນແປງຂອງດິນຟ້າອາກາດ, ສິ່ງແວດລ້ອມຢ່າງມີປະສິດທິຜົນ, ມຸ່ງໄປເຖິງການປະຕິບັດບັນດາຄາດໝາຍພັດທະນາຢ່າງໝັ້ນຄົງ (SDG) ເຖິງປີ 2030 ຂອງສະຫະປະຊາຊາດໃຫ້ສຳເລັດຜົນ. ການນຳຫຼາຍປະເທດກໍ່ສະແດງຄວາມເຫັນດີເຫັນພ້ອມກັບຫຼັກໝັ້ນຂອງຫວຽດນາມ ແລະ ອາຊຽນໃນບັນຫາທະເລຕາເວັນອອກ.