ປະຊາຊົນຫວຽດນາມ ແລະ ໂລກເອກອ້າງທະນົງໃຈຕໍ່ໄຊຊະນະ ການປະຕິວັດເດືອນສິງຫາ
ວັນທີ 19/8/1945, ຊາວນະຄອນຫຼວງຮ່າໂນ້ຍນັບໝື່ນໆຄົນໄດ້ເຕົ້າໂຮມກັນຢູ່ສະໜາມຫຼວງໂຮງລະຄອນໃຫຍ່ຮ່າໂນ້ຍ ເພື່ອຂ່ຳນັບຊົມເຊີຍໄຊຊະນະຂອງການປະຕິວັດເດືອນສິງຫາ |
(vovworld)- 70 ປີທີ່ໄດ້ຜ່ານພົ້ນໄປ, ແຕ່ເມື່ອຕີລາຄາຄວາມໝາຍປະຫວັດສາດຂອງ ການປະຕິວັດເດືອນສິງຫາ, ເພື່ອນມິດສາກົນລ້ວນແຕ່ໃຫ້ຂໍ້ສັງເກດວ່າ: ບໍ່ພຽງແຕ່ຊາດຫວຽດນາມເທົ່ານັ້ນ, ຫາກຊົນຊັ້ນຜູ້ອອກແຮງງານ ແລະ ບັນດາປະຊາຊາດຖືກກົດຂີ່ຂູດຮີດຕ່າງໆໃນໂລກ ລ້ວນແຕ່ມີຄວາມເອກອ້າງທະນົງໃຈວ່າ ເປັນຄັ້ງທຳອິດໃນປະຫວັດສາດປະຕິວັດຂອງບັນດາປະຊາຊາດທີ່ເປັນຫົວເມືອງຂຶ້ນ ແລະ ເຄິ່ງຫົວເມືອງຂຶ້ນ, ພັກໜຶ່ງທີ່ຍັງໜຸ່ມແໜ້ນ ໄດ້ສາມາດນຳພາການປະຕິວັດຢ່າງສຳເລັດຜົນ. ທ່ານສາດສະດາຈານ ຂະແໜງປະຫວັດສາດ ອາເມລິກາ Douglas Jardin ອະດີດເປັນອາຈານສອນຢູ່ມະຫາວິທະຍາໄລແຫ່ງຊາດຮ່າໂນ້ຍ ໃຫ້ຂ້ສັງເກດວ່າ :
“ ໃນເວທີສາກົນ, ຜົນສະທ້ອນຂອງເລື່ອງຫວຽດນາມຍາດໄດ້ໄຊຊະນະເມື່ອປີ 1945 ແມ່ນໃຫຍ່ຫຼວງທີ່ສຸດ. ໄຊຊະນະຂອງ ການປະຕິວັດເດືອນສິງຫາໄດ້ກາຍເປັນແບບຢ່າງໃຫ້ແກ່ບັນດາການຕໍ່ສູ້ປົດປ່ອຍຊາດຂອງປະເທດຕ່າງໆໃນໄລຍະຕໍ່ໄປ. ກຳລັງແຜ່ຂະຫຍາຍຂອງ ການປະຕິວັດເດືອນສິງຫາຢູ່ຫວຽດນາມບໍ່ພຽງແຕ່ຈຳກັດໃນພາກພື້ນອາຊີຕາເວັນອອກສ່ຽງໃຕ້ເທົ່ານັ້ນ, ຫາກມັນໄດ້ປະກອບສ່ວນສຳຄັນເພື່ອປຸກລຸກບັນດາປະຊາຊາດໃນໂລກພ້ອມກັນລຸກຮື້ຂຶ້ນທຳການຕໍ່ສູ້ເພື່ອປົດປ່ອຍຕົນເອງໃຫ້ຫຼຸດພົ້ນອອກຈາກແອກຄອບຄອງຂອງພວກລ່າເມືອງຂຶ້ນ ແລະ ຈັກກະພັດ ”