(vovworld) - ໝາກຜົນແຫ່ງການຢັ່ງຫາງສຽງຫວ່າງມໍ່ໆມານີ້ ທີ່ຫາກໍປະກາດຢູ່ອາເມລິກາ ໃຫ້ເຫັນວ່າ, ປະຊາຊົນອາເມລິກາ ສ່ວນຫຼາຍໄດ້ສະໜັບສະໜູນການສ້າງສາຍພົວພັນເປັນປົກກະຕິກັບກຸຍບາ. ໂດຍລະອຽດແມ່ນ, ມີເຖິງ 75% ໃນຈຳນວນປະຊາຊົນອາເມລິກາ 1.000 ຄົນ ເຂົ້າຮ່ວມການສຳຫຼວດຖືວ່າ, ປະເທດນີ້ຄວນມີການພົວພັນທາງການທູດກັບກຸຍບາ. ນອກນັ້ນ, ມີ 58% ຈຳນວນຜູ້ຖືກຖາມເຫັນດີກັບຂໍ້ຕົກລົງຂອງທ່ານປະທານາທິບໍດີ Barack Obama ຟື້ນຟູການພົວພັນກັບ La Habana, ໃນຂະນະນັ້ນມີ 48% ສະໜັບສະໜູນການຍົກເລີກສ່ວນໜຶ່ງ ຫຼື ຄຳສັ່ງຂວ້ຳບາດດ້ານເສດຖະກິດທັງໝົດທີ່ແກ່ຍາວເປັນເວລາ 50 ປີ.
ການຢັ່ງຫາງສຽງໂດຍສຳນັກຂ່າວສານ AP ຂອງອາເມລິກາ ແລະ ບໍລິສັດຄົ້ນຄວ້າ GFK ສົມທົບກັນປະຕິບັດ, ກ່ອນທີ່ອາເມລິກາ ແລະ ກຸຍບາ ເປີດສະຖານທູດປະຈຳແຕ່ລະປະເທດ ຄືນໃໝ່ເປັນເວລາໜຶ່ງສັບປະດາ. ປະຈຸບັນ, ອາເມລິກາ ແລະ ກຸຍບາ ໄດ້ດຳເນີນການເຈລະຈາ 4 ຮອບ ຢູ່ນະຄອນຫຼວງຂອງ 2 ປະເທດ ດ້ວຍບັນດາຄວາມຄືບໜ້າໃນຫຼາຍບັນຫາສຳຄັນ. ອາເມລິກາ ກໍຍົກເລີກຮົ້ວກີດຂວາງໃຫຍ່ສຸດ ບົນເສັ້ນທາງຟື້ນຟູການພົວພັນ 2 ຝ່າຍ ເມື່ອລືບຊື່ກຸຍບາ ອອກຈາກບັນຊີລາຍຊື່ບັນດາປະເທດອຸປະຖຳໃຫ້ແກ່ການກໍ່ການຮ້າຍ.