ປະຕິບັດການນຳໃຊ້ໃບ ແຈ້ງອາການສຸຂະພາບ ໄວກ່ວາແຜນການເພື່ອ ປ້ອງກັນພະຍາດ Ebola
(ພາບປະກອບ)
(vovworld) –ຕໍ່ໜ້າການຜັນແປອັນສັບສົນຂອງພະຍາດ Ebola, ກະຊວງສາທາລະນະສຸກຫວຽດນາມ ໄດ້ຕົກລົງນຳໃຊ້ໃບແຈ້ງອາການສຸຂະພາບສຳລັບແຂກ ເຂົ້າເມືອງຈາກອາຟຼິກາ. ນັ້ນແມ່ນຂ່າວຈາກການປະຊຸມຄະນະຊີ້ນຳ, ປ້ອງກັນໂລກລະບາດທີ່ອັນຕະລາຍ ແລະ ຫາກໍ່ພົ້ນເດັ່ນຂຶ້ນ ຈັດຂຶ້ນເມື່ອຕອນບ່າຍວັນທີ 11/8 ຢູ່ຮ່າໂນ້ຍ. ທີ່ການປະຊຸມ, ກົມການແພດສຳຮອງ (ສັງກັດກະຊວງສາທາລະນະສຸກຫວຽດນາມ) ໃຫ້ຮູ້ວ່າ: ພະຍາດ Ebola ຖືກຈັດເຂົ້າກຸ່ມ A ຊື່ງແມ່ນກຸ່ມໂລກລະບາດອັນຕະລາຍ, ມີຄວາມສາມາດແຜ່ລະບາດອອກຢ່າງໄວວາ ແລະ ມີອັດຕາສ່ວນຄົນຕາຍສູງ. ຕໍ່ໜ້າເລື່ອງພະຍາດ Ebola ຢູ່ເຂດອາຟຼິກກາຕາເວັນຕົກພວມແຜ່ລະບາດອອກຢ່າງໄວວາ ແລະ ມີເກືອບ 1000 ຄົນເສຍຊີວິດ, ໃນນັ້ນມີພາລະກອນການແພດ 200 ຄົນນັ້ນ, ກະຊວງສາທາລະນະສຸກຫວຽດນາມ ໃຫ້ຂໍ້ສັງເກດວ່າ: ໂລກລະບາດມີໄພແຊກຊືມເຂົ້າຫວຽດນາມ, ໂດຍສະເພາະແມ່ນຜ່ານບັນດາຖ້ຽວບິນມາຫວຽດນາມ. ສະນັ້ນ, ກະຊວງສາທາລະນະສຸກຫວຽດນາມ ຕົກລົງປະຕິບັດໃບແຈ້ງອາການສຸຂະພາບສຳລັບແຂກເຂົ້າເມືອງຈາກບັນດາດ່ານສາກົນໄວກ່ວາແຜນການ. ທ່ານເຈິ່ນດັກຟູ, ຫົວໜ້າກົມການແພດສຳຮອງໃຫ້ຮູ້ວ່າ:
“ເຖິງວ່າ ກະຊວງສາທາລະນະສຸກຫວຽດນາມ ໄດ້ຮຽກຮ້ອງບັນດາແຂວງນຳໃຊ້ໃບແຈ້ງອາການຂຸຂະພາບໃນວັນທີ 15/8 ແຕ່ຕໍ່ໜ້າສະພາບການໂລກລະບາດ ແລະ ທ່ານນາຍົກລັດຖະມົນຕີໄດ້ຈັດການປະຊຸມດ່ວນ ແລະ ຊີ້ນຳນັ້ນ, ພວກຂ້າພະເຈົ້າໄດ້ຮຽກຮ້ອງວ່າ, ໃນມື້ນີ້, ດ່ານສາກົນເກືອບທັງໝົດຕ້ອງນຳໃຊ້ໃບແຈ້ງອາການສຸຂະພາບ. ຢູ່ສະໜາມບິນ ຕ້ອງເບິ່ງໜັງສືຜ່ານແດນວ່າກໍລະນີໃດມາຈາກປະເທດມີໂລກລະບາດ, ພວກເຮົາຈະນຳໃຊ້ໃບແຈ້ງອາການສຸຂະພາບ“./.