(vovworld) –ຕອນບ່າຍວັນທີ 28/7, ຢູ່ຮ່າໂນ້ຍ, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ໃຫ້ການຕ້ອນຮັບຄະນະຜູ້ແທນກຳມາທິການງົບປະມານສະພາຕ່ຳຍີປຸ່ນ ໂດຍທ່ານ Nikai Toshihiro ປະທານກຳມາທິການ, ທັງເປັນປະທານພັນທະພາບ ສ.ສ.ຊ ມິດຕະພາບຍີປຸ່ນ-ຫວຽດນາມເປັນຫົວໜ້າຄະນະ ຊຶ່ງພວມຢ້ຽມຢາມຫວຽດນາມ. ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ຂອບໃຈລັດຖະບານ, ບັນດາອົງການຍີປຸ່ນທີ່ໄດ້ສະໜັບສະໜູນຫວຽດນາມໃນການຕໍ່ສູ້ຄັດຄ້ານຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດນ່ານທະເລຂອງຫວຽດນາມ. ຕີລາຄາສູງການຮ່ວມມືດ້ານເສດຖະກິດການຄ້າລະຫວ່າງ 2 ປະເທດ. ທ່ານປະທານປະເທດຫວຽດນາມ ເຈືອງເຕີ້ນຊາງ ຢືນຢັນວ່າ ຫວຽດາມໄດ້ ແລະ ພວມປະຕິຮູບດ້ານລະບຽບການ, ກົນໄກນະໂຍບາຍເພື່ອດຶງດູດແຫຼ່ງເງິນລົງທຶນຈາກຕ່າງປະເທດຫຼາຍກ່ວາອີກ ໃນນັ້ນມີຍີປຸ່ນ. ກ່ອນໜ້ານັ້ນ, ຕອນເຊົ້າວັນທີ 28/7, ຢູ່ຮ່າໂນ້ຍ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ໃຫ້ການຕ້ອນຮັບຄະນະຜູ້ແທນກຳມາທິການງົບປະມານສະພາຕໍ່າຍີ່ປຸ່ນ ໂດຍທ່ານ Toshihiro Nikai, ປະທານກຳມາທິການ, ປະທານພັນທະພາບ ສສຊ ມິດຕະພາບຍີ່ປຸ່ນ - ຫວຽດນາມ ເປັນຫົວໜ້າຄະນະ ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ຂອບໃຈລັດຖະບານ ແລະ ປະຊາຊົນຍີ່ປຸ່ນ ທີ່ສະຫງວນໃຫ້ຫວຽດນາມ ການຊ່ວຍເຫຼືອ ແລະ ໜູນຊ່ວຍຢ່າງມີປະສິດທິຜົນ, ໂດຍສະເພາະແມ່ນໃນບັນດາໂຄງການ ODA. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ ຍາມໃດຫວຽດນາມ ກໍ່ຖືເປັນສຳຄັນ ແລະ ນຳໃຊ້ແຫຼ່ງທຶນ ODA ຢ່າງມີປະສິດທິຜົນ ແລະ ຖືກກັບເປົ້າໝາຍ, ພ້ອມທັງເຊື່ອໝັ້ນວ່າ 2 ປະເທດຈະສືບຕໍ່ພັດທະນາ ບໍ່ພຽງແຕ່ໃນຂົງເຂດເສດຖະກິດເທົ່ານັ້ນ ຫາກຍັງໃນຂົງເຂດວັດທະນະທຳ, ການສຶກສາ ແລະ ການປ້ອງກັນຊາດ, ປ້ອງກັນຄວາມສະຫງົບອີກດ້ວຍ. ໃນການຮ່ວມມືລະຫວ່າງ 2 ສະພາແຫ່ງຊາດ, ທ່ານປະທານສະພາແຫ່ງຊາດ ກໍ່ຕີລາຄາສູງການສະໜັບສະໜູນຂອງຍີ່ປຸ່ນ ບົນເວທີສາກົນ ແລະ ປາດຖະໜາວ່າ ພັນທະພາບ ສສຊ ມິດຕະພາບຍີ່ປຸ່ນ - ຫວຽດນາມ ແລະ ກຸ່ມ ສສຊ ມິດຕະພາບລະຫວ່າງ 2 ປະເທດ ສືບຕໍ່ຮ່ວມມື, ແລກປ່ຽນບົດຮຽນ ປະກອບສ່ວນນຳການພົວພັນຍຸດທະສາດໃຫ້ພັດທະນາຢ່າງຮອບດ້ານ, ມີປະສິດທິຜົນ. ກ່ຽວຂ້ອງເຖິງບັນຫາທະເລຕາເວັນອອກ, 2 ຝ່າຍເຫັນດີເພີ່ມທະວີການຮັກສາສະພາບແວດລ້ອມແຫ່ງສັນຕິພາບໃນພາກພື້ນ, ກໍ່ຄືການຮ່ວມມືມິດຕະພາບກັບບັນດາປະເທດໃນພາກພື້ນ.